(فرياض علي دخل واحد غير شافو مرمق معاه)
علي: قول ليا الحمار تاع بوك شنو كنتي كدير فالقصر النهار الفلاني باغي تخرج ليا على سنين و منين ديال الحرث أولد الكلب
****: أنا أ سي علي بالعما
علي: (شد ليه من فكو تقول غادي يطرطقو ليه) ما غاديش نعاود نسولك
****: (شوية تفكر بلهلا يطرّيه ليه..بدا كيعاود و علي عاطيه ودنيه)
علي: هي قول ليا السيدة بغات تبدا تحفر ورايا نسات راحنا فالهوا سوا والواد لي غايديني مايخليها ..ولاش مقلتي ليا والو
****: مشات ليا من البال أ مولاي راك عالم شحال من مطرقة فالراس
علي: سمع نقوليك غادي تغبر من البلاد هاد ليام .. أنصيفط للسلطان مرسال بللي لقيتك وقريب نديك ليه من بعد نقوليه هربتي فالطريق ولا نلقا شي سبة المهم ريحتك متبقاش دور هنا ... وحسابك نتا وياها من بعد ..غبر عليا رهطك دابا
(مشا الراجل وعلي جلس حدا نافورة الرياض كيفكر ويهضر فخاطرو...و فهاد الوقت كانت السلطانة جالسة مع مسك الليل كيذاكرو )
مسك الليل : مولاتي بغيت نقوليك شي حاجة وتبقا بيناتنا حتى نتأكد من صحتها عاد يكون الكلام من بعد
فاخيتة: تكلمي الله يسمعنا خبار الخير
مسك الليل: الصراحة معرفت منين نبدا ليك ...مولاي علي..
فاخيتة: دوي راك وغوشتيني..مال علي
مسك الليل: شامة فيه ريحة الغضر... شي حاجة كينوعر ورا ظهر مولاي ...
فاخيتة: شهاد الكلام كنسمع منك أ مسك الليل ..واش عارفة عقوبة هاد الهضرة ولا غير داوية بلا برهان ..
مسك الليل: عرفتك مغاداش تيقي بيا ..المهم أنا غير قلت ليك و قريب يوصل بين يديا الدليل وديك الساعة قولي قالتها ليا مسك الليل
فاخيتة: سمعي شغادي يجيك مليح ..علي ولد خويا مربياه على يدي و عز ليا من ولادي للي حاسبينو خوهم ماشي ولد خالهم.. علي مكينش فمحنتو و أمانتو شي حد ..بلاما ديري الفتنة بين الخوت ها ودني منك ..أي حاجة خبريني بيها قبل ما تقصدي السلطان .. و ديها غير فجنابك لبغيتي تبقاي فهاد القصر
(دخلات عناية وهوما يقلبو الهضرة)
***********
(هاد الكلام قراه السلطان حرف بحرف و سطر بسطر وهو متمني يوقف قدامو علي و يقول ليه غير لاش دار فيه هادشي..لاش غضرو و نهبو و ضيع ناس بلادو فمالهم و ولادهم...)
(حس السلطان بالعيا هو يسد الكتاب و نوا يكمل للي فيه حتى الغد.. خرج يشم الهوا من الشرفة ديال الجناح وهو كيفكر ففعايل علي للي صدماتو وكيقول مسك الليل ماتت مقتولة على ود هاد السرار للي فالكتوبة ..شكون ليه المصلحة يبقاو هاد السرار مخفية
فهاد الوقيتة كان شي حد داير سلهام كيتسلت لجناح مسك الليل مع غادي يحل بابو وهي تْحط عليه يد خلاتو مصمر )
جورية: شكاديري هنا فهاد الليل أ لالة عناية ...باز ليك مخفتيش دخلي لبلاصة تشنقات فيها وحدة
عناية: خرجتيها مني صحابلي هاشم ولا السلطان...غير جيت نصلي شي ركيعات ونطلب الله يغفر ليها ...نتي لي شكاديري هنا ومخليا ولادك
جورية: كيما كتشوفي هازة القلة نعمرها بالما ...مبغيتش نفيق زنوبة ... مالك شفتك شفتيني قلبتي جلايلك فوق راسك وتلفتي
عناية :لا غير جاب ليك الله ..نخليك دابا نمشي نعس
جورية: و الصلاة ؟
عناية: مرة آخرا ..جورية خليها بيناتنا كنبغي عمال الخير تبقى مستورة
جورية: عليك لامان..(طلعات حاجبها و هي متعجبة)كملات طريقها الكوزينة تعمر الما
(مللي دخلات لقات دادة عبوش جالسة ودايرة يديها على خدودها و سارحة ودموعها على خدها)
جورية:دادة عبوش ..ياك لاباس ؟
عبوش: (جمعات الوقفة وهي كتمسح عينيها بطرف قميصها) لالة جورية ..اش حب الخاطر ياكما فيك الجوع نوجد ليك شي حاجة
جورية:(شداتها من يديها ورجعاتها تجلس) قولي ليا مالكي ...أش مطيح عليك هاد الضيم كُلو ؟ بلاما تقلبي الهضرة ... غير دوي عليك لامان
عبوش: شغادا نقوليك أ لالة ومنين نبدا ليك لي لمّاتو النملة فعام هزو الفيل بعفسة... عطاني الله راجل نقرة حرة غُرة ..غبر فيها نحاسي ولدت معاه سبع بنات كيف البلارات ...زوجت ربعة منهم وبقاو تلاتة ...ودابا طاح ليا زماني وهلكو المرض و خلاه شاد الفراش خسرت للي ورايا وللي قدامي عليه ها العار غير يبرا ليا...كنت معاونة معاه على الزمان ..ملي مرض تهرسات ركيزة صحيحة فالدار ..ويد وحدة ما دير والو أ بنيتي ...
ومن الزهر ...ميمون بناتي بتلاتة تكعد فدقة وحدة و جاو فيهم الخطاب وما لقيت كيف ندير نردهم ...البنات كبرو و أنا ما دايمة ليهم...عقوبتهم يدقو وتادهم ويولدو ولادهم ..ومجاتش نزوج وحدة ونجري لُخرات على سعدهم...لقيتيني سايرة نبكي من همي كيف غاندير نعرس ليهم ولا نجهزهم كيف للي سبقوهم و منخليش الفام تحل عليهم ولا يحكروهم وأنا اليد قصيرة والعين بصيرة
أنت تقرأ
رياض الباهيات
Ficção Históricaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
