رياض الباهيات

رياض الباهيات 🤍 الجزء 40

(فواحد الليلة كانت الشتا خيط من السما ..جورية كانت ناعسة او ولدها بين يديها ...
دخل السلطان لقاها غارقة فنعاسها باس جبهتها و هز ولدو و غطاها ..وجلس مقابل معاها )
السلطان : سبحان لي خلق هاد الزين فوجهك ..من نهار شفتك ماتو نسا الدنيا كلها فعينيا ...وقتاش يجي النهار لي تبغيني فيه كيف باغيك ...السلطان للي كانو الجواري تحت ݣدامو  عاجز قدام عيونك ...كلشي قادر نعرفو ونوصل ليه حتال قلبك مزال مقدرت نملكو ...لوكان نعرف طريقو نبيع الدنيا بللي فيها
(فنص الليل ضربات جورية الفيقة لقات ولدها ماشي حداها وهي تخلع وبدات كتبكي  وكتغوت ولدي ولدي....)
السلطان: (ناض حط ليها عثمان بين يديها و جاب ليها الما)باسم الله عليك هاهوا ...غير لقيتك معدبة فالنعسة و شديتو عليك..
(عنقات جورية السلطان من الخلعة وبقات كتبوس فولدها )
السلطان: ماحدي حي عمرك تخافي ...لي يفكر يقرب ليك نتي او ولدي نمحيه من الدنيا ( بقا كيطبطب عليها بيدو )
جورية: عمرك أمولاي تخليهم يأديو ولدي ولا يديوه من يدي
السلطان: متخافيش ..خوي راسك من هاد الوسواس ..نعسي دابا ( ناض من حداها )
جورية: مولاي خليك
(رجع السلطان حداها ونعسوا بتلاتة فسرير واحد ..وبقات شادة فطرف كمّو و مزيرة عليه حتى داها النعاس..)
مللي صبح الصباح حلات جورية عينيها فالسلطان ناعس حداها بقات كتمعن فيه حتى حل عينيه فيها و نطق بصوت رجولي مبحوح )
السلطان: صباح الورد أ وردة القصر ..معمري شفت شي وحدة كتفيق من النعاس زينها بحالك ..ما كذبش للي قال سر الزين كلو كامن فالعين و عينيك سهامها ترشكات فقلبي بلا هواه وعاد بيك سقيم
جورية:(كانت دايرة يدها تحت خدها للي موسد ريش النعام وكتكلم بصوت حنين )اممم ...السلطان لي مخلا حتى مكان ومخلا حتى عاتق فالبلدان معمرو بغا ولا شاف بحال زيني ... نقص فيخرات
السلطان:(كحّز راسو جيهة وسادتها)هههه ...عمر قلبي دخلاتو مرا من قبلك من غير وحدة
جورية: ها للي قلنا ..أصلا ماشي سوقي
السلطان: زاد قرب جيهتها ...مال حنيكاتي تزنكو و عويناتي حمارو
جورية: ايوا صافي شللا
السلطان: اممم ..راه قصدت غير السلطانة فاخيتة بكلامي ...نوضي نفطرو نوضي ..عرفتك مغيارة من نهار خرجتي الجواري من القصر
جورية: تبسمات بلاما تبين ليه ...أنا نغير ...و علامن عليك لاش ..معندي شهية لا لفطور لا لوالو خليني غير حدا ولدي
السلطان: اممم ..ماشي بݣانتك ميدوزش ليا الطعام الا مكليتيش ..وما بقات تحلى ليا حتى حاجة الا مكنتيش قدامي..
(هز ولدو باسو  وباس جبهتها ودخل للحمام)
(سبقاتو جورية لطابلة الفطور لي كانت السلطانة جالسة فيها بوحدها حتى تمت جورية جاية هي ورحمة .. مللي شافتهم  كحلات بالعما)
السلطانة:شكاديري نتي هنا ..شكون خرجك من الحبس
رحمة: السلطان أ لوستي العزيزة
السلطانة: شافت فجورية بخبت ..باغا تحداي حكامي...شفتك تبدلتي عليا و دخلتي سخونة للقصر ..ناسية بللي أنا الكل فالكل هنا وبكلمة مني يغبر ليك الأثر
جورية: العفو منك أ سلطانة معرفتش علاش كتهضري
(المهم وصل السلطان هو و خالو و خوه وهوما يسكتو ..داز داك الفطور شي حاضي من شي... وشي محامل شي )
مع ميقات القيالة كانت غادا جورية لعند هاشم .. محسات براسها حتى جراتها يد لواحد الجناح ودخلاتها
جورية: شكون نتا شبغيتي مني ..(سدات ليها اليد فمها وقرب منها عاد حيد القب على وجهو)

#يتبع