استغل السلطان غياب مو من القصر و فتش فجناحها على شي حاجة تفيدو يرجع حقوق العباد المنهوبة وليني بلا فايدة..
جورية: وحدة لي كانت عارفة قنات هاد القصر شنو مخبية وهي للي تقدر تعاونك
السلطان: شنو فيقك بكري ..علامن كتكلمي ( كان كيهضر معاها وهو حادر منها العين )
جورية: كنقصد عناية... هي لي كانت كتعرف ركاني السلطانة و كترافقها ديما ...أكيد عندها باش تعاونك...
السلطان: كضني بللي تقدر تعرف فين حاطة السلطانة وراق حوانت الناس و ملكيات أراضيهم ...السلطانة خيالها و مكتيقش فيه بقا غير تيق فعناية
جورية : عناية بفمها قالت ليا حضي راسك من السلطانة راه للي عارفاه عليها معارفو حد ...لازمك تخليها ترجع للقصر علا وعسا تنفعنا فشي حاجة ماشي بالضرورة تكون عاطياها سرها ..وليني تقدر تكون شايفة لي مكنتيش نتا شايفو
(..العشية تعاشات و هاشم وقف قدام السلطان فالديوان)
هاشم : مولاي لالة ام سيدي راه وافقات تعاون معانا وليني بشرط
السلطان: واش هي دايرا للي تستاهل عليه قطيع الراس ومزال كتشرط ...راه لجينا الحق مكاين لا مي لا جدة ..خاصها تعاقب أ هاشم واش دوك الرواح لي تسلبو ما عندهم والدين ...أنا مزال تابعك فهبالك وليني منضمنش ليك من بعد اش ندير
هاشم: غير ساعفني أ مولاي وتهدن ...لالة خناتة قالت ليك لبغيتيها توريك طريق علي تنصب مولاي عدنان والي على مدون الشمال و تسلمو قصر الياقوت و طلق جورية
السلطان: هههههه ..قول بغاتني نخليها ليهم سايبة كثر ما سابت ..باش عاد دير مبغات..بغات تشد الركنة فجناحها مرحبا شي حاجة اخرى راها كتحلم وطريق علي غادي نوصل ليها
هاشم: سبقت ليها الكلام بللي غادي ترفضو أ مولاي ...جاوباتني قاصح و قالت ليا ولو تنطابق السما مع الأرض طريق علي متوصلوها و غادا تعلمو يخوي البلاد ويتحالف مع العدو ...ومخفاكم أ مولاي راه لقالوها يقدو بيها ...راهم عارفين الشادة والفادة على البلاد و غادي يولي ساهل يدخل علينا العدو و بلاصة ما سيادتكم باغين ترجعو للشعب حقوقهم غادي تولي البلاد غارقة دم
السلطان: ( تنهد وهو معاجبو حال..حس براسو تكتف) الناس تحارب مع العديان و أنا دمي للي محاربيني وشكون يا حسرا مي ...جيبها قدامي
السلطانة: (دخلات بلا موجب شرع للديوان ) ولدي حبيبي مالك مكشكش ...غير تهدن
السلطان: ( غير كيشوف فيها و كيكرزز على سنانو) علاش هادشي كامل هادي هي لالة خناتة الدريويشة الحنينة
السلطانة: ههه معرفتيش علاش ..السلطانة خناتة كانت مرات السلطان غير بالفم ... ما تخرج ما درج ما تشوف الشمس .. ما تأمر ما تنهي وحتى لي كانت كاتملك مكانش فاسمها ...نهار شكيت هز باك كل جواهري فرقهم على العبيد وخلاني الله كريم و مللي ولا ولدي سلطان و قلت الدنيا غادا تزيان متسوقش ليا و مرجعش ليا حقوقي..
السلطان: على إنا حق كدوي ...ياك كل مكتمناي كيجيك ..ياك مزرزا ذهب و ياقوت ...ياك القصر المخير هديتو ليك ..لاش تنهبي و تقتلي على ود الملاك واش عمرك قلتي ليا بغيت هادي وقلت ليك لا ...مخليك تصرفي كيف بغيتي و عمري دخلت فيك ولا هبشت وراك ...كنت كنقول مي مرا رزينة وعارفة بينها وبين الله ..طلعتي غول مخبي ورا دفينة واش طغيتي حتى نسيتي بللي هم الدنيا يبقا فيها
السلطانة:هههه هاي هاي ...وا تسرح ليك اللسان من نهار دخلات بيناتنا ديك اللفعة ديال جورية..وليتي تعطي الموعظة ..بدا بعدا غير براسك أنا عارفة شغلي وكتقول كنتي كتعطيني..اش عطيتيني ...عطيتيني الفقصة ..كون كان علي ولدي كون راني مالكة الدنيا بللي فيها ...واحد ضعيف بحالك مكانش خصو يكون سلطان ...دابا عاد بقاو فيك الناس ..فين كنتي شحال ...ههه كنتي باغي الولد...ها الولد جا ...فنظرك غادا نخلي ولد مومس يتنصب ولي العهد .. ههه راه كيقولوها العايق فالدوار كيديها شيخة...
السلطان: (هز يدو حتى السما و كون ما دخل هاشم كان غايمدها على مو ويتسخط عند الله ) هاشم ديها لجناحها و حط عليها العسة ..ونهار تخرج نتا لي غادي تلام
#يتبع
أنت تقرأ
رياض الباهيات
Ficção Históricaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
