رياض الباهيات

رياض الباهيات 🤍 الجزء 44

(كانت واقفة قدامو ودفعات جبتها وقررات تكلم معاه وللي ليها ليها)
جورية: على ما بدا ليا شفتي بعينيك وسمعتي كلشي بودنيك منحتاجش دابا نبرر ولا نجيب الحجة والبرهان
سمع أ عثمان غادا نقول ليك شي كلام كان واحل فحلقي من شحال ...واش يصحاب ليك السلطان و الجاه هو الحريم و سوار القصر ...هو المال و الجواهر ...باش نتا سلطان ؟و ناس بلادك مظلومة ..مضيومة ...مسلوب حقها ..والغم كاسيها من ساسها لراسها
السلطان: عندك الحق ولكن ...
جورية:(قاطعاتو )..غير خليني عافاك حتى نكمل كلامي...
قنات منسية من هاد البلاد ما واصلاها ما ولا نعمة و زايدينها بولادهم للي كيتخطفو كل نهار ويتباعو ويتشراو ورزقهم لي كيتنهب
باش سلطان أمولاي ؟ ...بالخلوة و النخوةو للي تكلم يتقطع لو اللسان ولا يتشوا
باش سلطان و بنات كيف الوردات كينهش لحمهم الذياب!!
أنا للي نقول عليه سلطان ...هو للي رعيتو يفديوه برواحهم و يدعيو معاه فصلاتهم ... للي مللي يحط راسو على المخدة يقول واش كلشي شبعان فبلادي ...للي يبيت المظلوم بعشاه والظالم بلا كساه ..ماشي للي يتوسد ريش النعام ولا فخض جارية و مللي يصبح عليه الصباح يفاصل ويحكم و يزمم بالقلم بلاما يشوف ويعلم
السلطان أمولاي لي يبغيني لزيني ويتبع النسا ...يجي نهار والزين يذبل وللي ما فيه خير فولاد بلادو ما فيه خير مع أم ولادو .....فيق أ مولاي وعيق ...السلطان هو للي يخرج يسمع هموم الناس و ياخد حق الضعيف قبل القوي ولكان كلام الحق كيقلق مولاي غير يقطع راسي و يدير مزية فيا
نيت قطرة من دمي ما غادا تدي ما تجيب قدام دمايات جرات فأرض هاد البلاد و رشمات كل قناتها..دمي ودم كل عذرا تغصبات فشبابها ،تباع لحمها وتشرا ،ذابغ فركاني الرياضات و القصور
(السلطان بقا غير ساكت وكيشوف ،فمو تلجم قدام صحة كلامها،وعقلو بدا يخدم لقا راسو هامل البلاد و العباد ..بقا تابع غير راسو وكيجري ورا الولاد من مرا لمرا حتى كيل ذنوب الناس ودا تقليدهم على عاتقو بالعرام...)
السلطان: شنو المعمول دابا ..فات الفوت وشلا رواح تزهقت و تظلمت والناس لاش كانت ساكتة حتال دابا
جورية: مازال شلا رواح غادا ضيع لبقيتي جالس ..خرج شوف الناس ...التجار تقهرو بالضرائب ..الفلاحة جاعو .... راك أ مولاي عايش غير نتا و كبار البلاد أما ما بقا من العباد ميتين بالحياة ...الناس ساكتة حيت مكين لمن يشكيو واش يشكيو للسلطان من السلطان لي كل ظلم كان كيتم بمرسوم منو ...أناعارفة نتا معالم على والو وكلشي مزورو علي وليني شكون قال هادشي للناس
مك يدها واصلة لكلشي و حقها كتشدو فكل بيعة وشرية واش لهاد الدرجة نتا فدار غفلون لي خلاه علي كملاتو وراه
واش تهناو من علي مللي قالو مات خرجات ليهم لي كثر منو ...راه لي هضر راسو كيطير ولا كيترزا فكبدتو
السلطان لي باغا أنا هو لي الناس تبغيه وتحتارمو  وتخاف عليه ماشي لي تخاف منو
حضيتي لالة وملي ونسيتي باللي الحكام تقليد و سومو غالي ..بالحق قوليا السلطان للي ما حماكش نتي للي تخطفتي من وسط قصرو عاد غادي يحمي ما بقا من العباد ...
تزير السلطان من كلام جورية لي مشات تخشات فالفراش وخلاتو غادي جاي ديك الليلة ولا بغا يجيه النعاس
#يتبع