رياض الباهيات

رياض الباهيات 🤍 الجزء 6

صبح الصباح كلشي كان باقي خامر فالرياض  حتى فاقو دقة وحدة على صوت جورية كتغوت.. بعدما فاقت من ديك الليلة الكحلة لقات راسها معرية و الدم فوق الفراش عرفات بللي الكفرة بالله تكرفصو عليها
مسعود:(دفع عليها الباب وهي تكمش فليزار) مالك أ ديك خيتي فيقتينا على النبوري تركدي لا ولا نجي نصليها معاك ..شوفي هاه أنا راه تجيني تال النعاس نشتف على ريتك ...بنت الهم بايتة فلالة ومالي بالسيف ما تحسيش بينا حنا للي الدق كلو فوق كتافنا
جورية: شهادشي درتو فيا أ ولاد الحرام
الحمانية: تي واش ما بغيتيش تحشمي  حنا ولاد الحرام أ الشايطة..مسعود المشويطة أ مسعود وفوت الوجه قفزاتني بنت الهم
مسعود: أنا نتولاها  هاد فليفلة سيري كملي نعاسك أ لالة حبيبتي نوريها ولاد الحرام من ولاد الحلال...هاي هاااي ترابي من والا تحل ليها الفم
(خرجات الحمانية دارت القطن فودنيها ورجعات تكمل نعاسها)
(ناضت بالخف لبسات عليها..ما جا فين يشحط مسعود معاها  حتى جرات المشويطة من يدو جاراه معاها حتى لسق مع الحيط و سدات الباب وضارت ليه)
جورية: هنا فين بغيتك ..نبرد فطسيلتك حر القديم والجديد
مسعود : ويلي مالكي حماقيتي ..بعدي من ساحتي يا هاد الهيشة ( ماعرف باش تبلا...هرب منها جيهة الباب مع حلو لقا بذرة ونوارة عند راسو دفعوه الداخل و سدو تاني ..خشاو ليه كتانة ف فمو و خلاو جورية  سلخاتو مزيان وهو كيفركل كيف الدجاجة المذبوحة )
مسعود: ( مللي حيدات ليه بذرة الكتان من فمو) وا العاداااو ..والله ما تبقا فيكم يا السايبات ...أ ربي عضامي ..والله ما تبقا فطواسلكم هلكاتني عوجة المسلان..اليوما تباتو عند الباشير حكرتوني اااح أمي نصي طاب ...
جورية: والله يا جدك و تحل داك الفم المدود عندك مزال ..غير لما كنت مشوهاك فالرياض بين نساه و رجالو و نكلع ليك كاع هاد الضسارة...نوريك ترجل عليا غير أنا ..ظل تفنطز علينا...
بذرة: هضر باش نعاودو للالة حليمة على فعايلك و معيورك ليها..ما يعرف كَعّو من بَعُّو و جاي يتلوا علينا...
نوارة: نوضي يا الزغبية هلكتيه باراكة عليه غير الي فيه..عضوماتو كيتقرقبو غير بوحدهم يولي مسبب عليك هههه للي غلب يعف...نوضي أ ختي نغسلو ليك ونكمدو عضامك و مولاها ربي هادا راه  مخليتي ليه لا ذراع للخدمة لا وجه للسعاية ..زوقتيه..
جورية: غادي تغسلو ليا عاري .؟.. رزاوني فشبابي كان الله فراجل مي للي لاحني هاد اللوحة ...بغيتو يبقا غادي ولحمو يتفرتت قدامو  ... بغيتو يموت فنهار كحل ما يلقاو مَا يغسلو ما يلقاو قبر يلمّو
بذرة: ايييه نتي بعدا راجل مك لي وصلك لهاد المواصل أنا راه مي لي خدات فيا جوج ريالات و رماتني بخاطرها للذياب...ديري عقلك صافي من نهار دخلنا هنا تحكم علينا بالخسران..أنا بعدا للي بغاوها نديرها بخاطري ولا هاد الحالة
نوارة: سكتينا باركة غا للي فيها نوضيها معايا
دازت شلا يام والبنات ولفو على الخدمة فالرياض و الحمانية ميكات على جورية حيت حنات الراس ومن ديك الليلة ما عاودات دخلات عليها شي واحد خلاتها غير للشطيح بغات حتى لجاتها شي هميزة تاني وتصيدها بيها و مسعود ولا داير بحسابها...البلاصة للي تعمرها هي يخويها هو