هي و شكون هي ؟
هي كيف الطوير المحبوس فقفصو
مكسور جناحو ما يعرف مساه من صباحو
ما يغرد ما يطير يتسمع غير بكاه و نواحو
شوقو يذاعب السما يفرفر ويتطلق سراحو
زينها فتنة و حبال نجا ..حنينة و قلبها الراشي قصحاتو فعايل العباد ،شربات من كاس الرياض وداقت بنة السياد
خلات كلشي على بابو واقف يتمنا و يتسنا بالتنهاد
هي وشكون هي ؟
هي للي حكايتها غادي ينسجوها صبيعاتي و أنا جالسة فوق السحاب نفكر ونخمم واش نخليها غارقة فالهم ولا ندلي خيوطي نعتقها من القهرة و الغم
هي و شكون هي !؟
هي العسل مقطر لي غادي يولي مر يلسع القلب قبل اللسان و يحرق الروح كثر من الجمر
هي وشكون هي ؟!
حْجَارْ هاد البلاد كُونْ قدرات تتْكَلّمْ و تقول شكون هي بلاما ترفد دبيلة ولا هم.... كون غْبَارها قدر يتساس من حيوط قناتها تروات بَالدَّمّْ
لوكان غير قدرات تتكلم !! كون تترْدَمْ عْلَى اللِّي جَارُوا و ستحلاو الظُّلْمْ
وتقول بللي الضعيف مَسْلُوبْ و ذْلِيلْ مَالُو قِيمَة ومازالو راضي و يحشم..راضي بَلْجَامْ اٍيجُرُّو و بعبد كيفو يحكرو و يضرو..و حتى لين !؟
مَهْمَا كلمة الْحَقّْ ما تتسمع مَقْبُورة بين سنان الغشيم
مَهْمَا ليل الظالم على المساكن عتيم
مَهْمَا الْحَالْ يضياق و يتسلب حق اليتيم
يجي يوم الْبَاطَلْ يتعدم
وَ سوارو الراشية تتْهَدَّمْ
الْغُمَّة تْزُولْ و المظلوم يحكم
و فوق طبلة الحكام الظالم يَغْرَمْ
بغيتو تعرفو شكون هي ؟ تبعوني فهبالي لي خلاني نسهر الليالي باش نتصنت لكلامها الموزون و نخيط ليكم منو حكاية تونسني قبل ما تونسكم ..تمعنو فالكلام و المعاني و قلبو بين السطور على الغاية من البداية حتال النهاية.
أنت تقرأ
رياض الباهيات
Narrativa Storicaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور