رياض الباهيات

رياض الباهيات 🤍 الجزء 28

(كانت جالسة كترضع فولادها و التبسيمة واصلة لودنيها)
جورية: هههه زنينيب والله يا العفيريتة الا خاصك الحلاوة ...داكشي لي نوينا وقع ..السلطان حولني حداه و دخلت فبالو بللي عناية دخلات وراه للجناح يعني لرد البال للكتاب غادي يقول هي للي هزاتو...
زنوبة: للي تأمر بيه مولاتي أنا معاها ..بقطيع الراس
جورية: عمري نفرط فيك ..راك وليتي عويناتي فالقصر و خابية سراري
(وصل الليل وتجمعو على طابلة العشا ...ملي جات رحمة تجلس جرا عليها السلطان قدام كلشي و قلل منها ...كون صابت الأرض تشق ودخل فيها ..هنا جورية عرفات بللي للي ضمرات ليه جرا ..حنات راسها وتبسمات )
(مللي سلاو تبعاتها للجردة للي كانت غادة جاية فيها مخنوقة وكتصوط كيف الرابوز)
رحمة:( غير شافتها بغات طير عليها ) وصلتيها ليه دغيا ...كون راك بيقيتي تغبني عليه وتبوحطي يا الروحانية..كنتي دَرْوِيشَة غِيرْ ولدتي السَّنْطِيحْ اللْول وليتي عِيشَة قَنْدِيشَة ..عدتي تعمري عليا و تكيْلي فالبهوت
جورية: حرام عليك أ مي رحمة ضلمتيني ...أنا مرضيتش مللي دار ليك ديك الحالة ..زاد فيه يحتارم غير شيبتك
رحمة: الغمة تغمك منين جاتني مك...شيبتي ...كاين شي شايبة قدك يا السايبة يا العايبة
جورية: ياك سري أنا للي جاتني عليك النفس ...قلت فخاطري شوف هاد السلطان الظالم كيحكر ليا عجوزتي ..فوق ما هو كلا ليها رزق ولدها ..و أنا للي كيف الهبيلة جايا نقوليك كيفاش ترجعي حقك و أملاك ولدك للي   تحرق ما تم وترجعي لعزك ..معرفت مالي ما عندي معاك زهر الا ماصيفطتي ليا الدقة للراس تصيفطيها للظهر...دوزي بخير
رحمة:(قلشو ودنيها مللي سمعت حس الفلوس ) أجي لهنا...كفاش قادرة ترجعي رزق ولدي واش داوية بصح ولا دايراني ضحكة
جورية : ( جراتها لواحد القنت) حنا ما طَامعين لْحَدّْ فْمَالُو غير رزق ولدك وبغيتيه لاش نَخضعو لِيهْ كَانْ نَمْلَة ولا كان فِيلْ، صافي غير هو سلطان يدير فينا ما بغا، اللِّي تَطْمَعْ فِيهْ تَضْحَى عَنْدُو ذْلِيلْ حنا راضيين غير بَللِّي عْطَانا مُولاَنَا الَكْفِيلْ ..ما بغينا والو من غير حقنا
(دارت يديها على كتفها معنقاها)شبان ليك أ عجوزتي لدرنا اليد فاليد ونرجعو رزق ولدك علي نتي مو ولا بيه او ولادو يعيشو من خير باهم ماشي محاوزين ..حنا باش عرفنا هضرتهم بصح ولا غير باطل هداك باش نبقاو تحت جناحهم ...أنا قادرة نرجعك تلعبي بالفلوس لتبعتيني)
رحمة: كيفاش غادا ديري ليها
جورية: قاليك..اللِّي مَاعَنْدُو دْوَازْ يَاكُلْ الحَرْفِي، وُاللِّي مَا عَنْدُو مْرَا إِيبَاتْ عَنْدْ الكَانُونْ مَكْفِي، وَاحْدْ مْزَوَّجْ، وَاحْدْ مْكُوَّزْ، او وَاحْدْ جَا حْدَى الَمْكُوّْزِينْ وُكُوَّزْ
رحمة: كيفاش ..مفهمتش لاش سايرة ضربي عليا فالمعاني ..جيني ݣود
جورية: وا بعدا خاص نتأكد راك معايا و موس واحد يدبحا
رحمة: مللي القضية فيها ترجعي ليا رزق ولدي و طرطقي ليا عين العديان أنا معاك من اليوم ..شنو المطلوب مني
جورية:قصدت بللي مولاي خاصو مرا ..و هاد المرا هي أنا.. بغيتك دخللي لأم السلطان هاد الهضرة فراسها ...بللي متلقاش حسن مني نكون مرا لولدها ونولد ليه للي يخلفو ..وخللي جواري القصر يمدحوني قدام الغادي والجاي وبالخصوص فحضور مولاي ..حتى يولي متمني غير شوفة فيا وديك الساعة خلي الباقي عليا ..كُلْشِي بَالْحِيلَة إِلَى دَرْتِ الزِّيتْ ديك الساع تَشْعَلْ الَفْتِيلَة ..وكنواعدك غادا ترجعي نتي الآمر الناهي فالقصر والداخلة والخارجة على يديك ...(قاصتها فعنقها) وهاد العنق يعمر بالجوهر و الذهوبات ...و هاد اليدين يتزرزرو نبايل ...دابا هادا قفطان تلبسو ام وزير غير قولي ليا ..حكروكم نيشان
رحمة:(بعدما فاقت من حلامها) كوني هانية ولاكن بشرط .. كلشي يرجع تحت يدي دْيَالْ النَّاسْ مَا يِدَّارْ فَالسَّاسْ ..نبغي أنا نكون الامر الناهي
جورية: ألالة رحمة أنا ما باغا حتى حاجة باغا غير ترضاي عليا و تقبلي ولاد ولدك وكلشي ديالك و أنا لتزوجت السلطان ضامنة ليك عيشة الهنى و الغنى كيف قلت ليك
(رجعو للداخل بعدما سمعو غوت عناية للي كان جارها السلطان من شعرها )
عناية: والله أمولاي ما درت شي حاجة ولا هزيت شي كتاب
السلطان: وزايداها بالحلوف و البهتان ...الحرس أكدو ليا باللي مكينش من غيرك فغيبتي للي دخل للجناح ...يا يحضر الكناش يا راسك يطير ختاري
فاخيتة: الله يرضي عليك أولدي كلشي بالعقل ..ياك غا كناش اش فيه كاع ...
السلطان: مي دخلي سوق راسك ...و كلشي يمشي يركد ...بيا ولا بيها هاد الليلة (عيط الهاشم هبطها هو والحرس للحبس وكلوها ما كلا الطبل ولا بغات تكر
و رجع السلطان مكشكش لجناحو )...مسرقات الكتاب أ هاشم حتى كاينة ان تم
#يتبع
حَطّْ الَفْلُوسْ فِي فَمّْ الْمَدْفَعْ يَسْكُتْ..
و الفَارْ الَمْقَلَّقْ مَنْ سَعْدْ المَشّْ الجيعان