بنت الرياض فنة همة وشان تهدي من المحبة كيسان تونسك تنسيك الهم ولحزان هدية الزمان زهرة فايحة مزينة الجنان يدوخك عطرها ويسبيك زينها الفتان الا جفاك النوم قضي ليلك عندها سهران تسد شراجم الغبينة وتفتح ليك للضحكة بيبان ********** (الغنا كان خدام وحليمة والحمانية كيهضرو مع بعضياتهم بعيد من البنات) الحمانية: دابا غير قولي ليا لاش منبيعوهش ليه ونمشيو لقنت خر نكملو فيه خدمتنا..راه غادي يبقا تابعنا حتى يخلي دار بونا و ملي تشوفي الفار زعم حدا المش عرفي الغار قريب حليمة: شغلي وقادة بيه معندو ما يصور ..الا هو سي علي أنا راه حليمة وأجرك على الله ..شطّحت قومان على هوايا بقا غير هو غادي يمرّضني ويرجع دايا الحمانية: الله يهديك واش تساوي راسك بوزير البلاد لي مدور العباد كيف الخاتم فصبعو ولا كلام بعد كلامو حليمة: كاع كبار البلاد لي معادي معاهم عارفهم فصفي و كيجو للرياض للنزاهة ...غير بكلمة مني يوصلو خبار فسادو للسلطان ويوقف شغلو للي عند راسو مجايباش خبارو الحمانية:اينا شغل؟ وشنو مسكتهم عليه حتال دابا ...الا كانو قادرين ينوضو عليه النحل حليمة: هو طايح ليهم على نبايصهم وهوما طايحين ليه على نبايصو وواحد فيهم كيتسنى للاخر غير السبة باش يسل الخيط من الكبة و يدير من الحبة قبة ...وعلي أنا للي مشية ليه تجارة الحريم ..دايرني قنطرة ومكينش فالبلاد لي قادر يمشًي ليه الخدمة كيف بغا بلا دخّان ..وعديانو فصفي حيت شاريين سكاتي...كل واحد فيهم مراتو لعرفات فعايلو غادا تردو كيف هيضورة الذبيحة مسلوخ ومنتوف وكل ما يملك يتسلب منو حيت مخفاك واخدين غير بنات الهمة والحجرة الثقيلة...ايوا كيف كايقولو عدو عدوك صديقك ... الحمانية: نتي تعرفي أنا غير خايفة عليك وعلينا ليصدقو ضايرين عليك ضورة الرحا ما حنا بديالنا بقا ما حنا بوجهنا تنقّا حليمة: شتي لكان غير الرياض عمرو ولا يحلم بيه أنا عارفاه لاش بغاه ..أش يعرف الݣليوّل لركوب الخيل هاي هاي معامن دارها..اييه أنا خايبة ومنسواش وليني منقدرش نتسبب فالفتنة وأنا عارفة بابها هو هاد الرياض الحمانية: هههه على هادشي لي سايريين نديرو فيه ماشي بلا وفتنة نوضي نوضي أالفقيهة المراجلة.. حليمة: فين داك سود السعد ديال مسعود يجيب ليا باش نقاد المجاج عيطي ليه ******* علي: (كيضحك حتى بانت ليه ضرسه العقل وهو كيطل على الذهب لي محملينو فالصنادق وغادين بيه يكملوه فالخدمة)..ايوا شتي دابة هكا نبغيك واخا باقي ما نضيتي الشغل ..هاد الولاد نبغيهم يباتو ميصبحو *****: كون هاني أمولاي ...من هنا للسفينة علي: شديتي تمنهم بعدا *****: اه أمولاي كل راجل فالسفينة شرا ولد يقضي بيه غراضو و مللي يطلع ليه فراسو كيف للي سبقوه يلوحو فعرض البحر .. واخا راهم ولاو طالبين البنات قاليك الولاد راسهم يابس علي:غادي نغبر شي يامات ها الرجال معاك..العينين ولاو عليا ..مانبغيش الذبانة تزهق #يتبع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
