رياض الباهيات

رياض الباهيات 🤍 الجزء 29

(مللي تقطع الحس و كلشي حط راسو و سرح عجول لاخرة..جبدات جورية الكتوبة للي كانت لاوياهم فكتانة و خازناهم )
باتت الليل كامل كدور فصفاحي الكتوبة ...وداكشي للي قرات لمشا حتى تكشف و تعرف غادي يقلب القصر باللي فيه  فكل صفحة كتزيد تأكد بللي الناس للي كيدوي عليهم الكتاب بْحَالْ حَمَّالِينْ النّْعُوشَة إِيدِّيوْ وُمَا يرَدُّوا ... او والَو بَكْرَاعْ دْجَاجَة كانو قْاضيين حَاجَة...وفهمات من ورقة كان فاصل السلطان بيها  بين وراق الكتاب بللي مزال يالله قاري غير الصفاحي اللولين وموصلش للصح الصحيح...
صبح عليها الصباح مبوقة والضباب قدامها... نزلات غير بزز  للفطور
( فطابلة الفطور وهي كتكمع بالنعاس)
السلطانة: مالكي ياك لاباس ..منعستيش ولا شنو
جورية: عذروني أ مولاتي بت سهرانة مع وليداتي منعسوش بايتين ينينو
السلطان: سلطانة اليوم حولي جورية او ولادها لجناح علي
السلطانة: (بحالة معجبهاش الحال) واخا ...فين عناية أوليدي رأف بحالها كيف ما كان الحال راها كانت مراتك
السلطان: (خلاها وناض وهو مخنزر) بصحتكم ..الله يدومها نعمة
جورية: مولاتي ولفت جناحي ..معرت لاش مولاي بدلنا منو كون غير قلتي ليه يخلينا فيه
السلطانة: دابا السلطان قال كلمتو ومتعاود وراها غير الصلاة على النبي..نوضي رضعي ولادك وجميعي حوايجك راه الخدم يعاونوك
(مشا السلطان لعند عناية)
السلطان: امضرا رطاب ليك داك الراس ولا باقي متهرس
عناية: والله أمولاي يلا مظلومة ماشفت كتاب ما قربت جيهتو راه خفّت الحكام كطيح الباطل بالعرّام..
السلطان: واش نكذب الحرس ونتيقك نتي ...دابا لبغيتي تنجي راسك من حبل المشنقة نطقي بمكان الكتاب
عناية: مالك على هاد الظلم كلو وعلى هاد قصوحية القلب ...دعيتك لله من نهار دخلت لقصرك وأنا معدبة ومدلولة ..كون خديتو غير براح ولا سراح ونلقا فيه المحنة ...أسيدي غير قتلني وهنيني ..نرتاح منك ومن قصرك ومن شرك وعرف بللي الدُّنْيَا قَشّْ اللِّي تَنْفَخْ فِيهَا لاَزْمْ يَتْفَشّْ و الكفن ما فيه جيوب يجيك نهار و تكمط فيه و نهار نتقابلو قدام مول الحق كُلّْ وَاحَدْ يَتْجَازَى عْلَى قَدّْ فَعْلُو
السلطان: تحل ليك الفم أ الخاينة...بعتيني ما مرا ما جوج و باغاني نسمح ليك ...طوال لسانك على السلطان وسخا عليك عمرك ....الكتاب غادي نجيبو فين ما كان .
(شاف فهاشم و قال)..هاااشم ...مع الفجر يتقطع راس هاد الخاينة ....هاااااااشم راسها يتقطع ولا راسك نتا لي غايطير ها ودني منك
******
جورية:(بعدما حطو الخدم الحوايج ورتبوهم وخرجوا) الله يا زنوبة هاد الجناح شحال مفجج و مبهج ... دابا وليت قريبة للسلطان ...
الحاجة الثانية خاصني نصيفط ديك ختو زهور عليا من هنا ...حيت حسيت بيها بحالا بدات تعمر مها وليني معرفتش منين نشدها
زنوبة : ايوا حلي ودنيك أ لالة وسمعيني ...دابا أنا نيت كنت باغا نقوليك ردي بالك منها راه سمعتها مور الفطور كتحرش لالة خناتة ..قالت ليها بللي شافتك شي ليلة مع مولاي فالجردة و قالت ليها راك كضوري بيه وقربتي لجناحو بلعاني .. وقالت ليها دخلات للقصر ضيفة حتى ولات معزبة فيه
جورية: وهانتي ليك اللفعة..كِيفْ الطُّوبَّة الْمَسْلُوخَة لاَ شْفَارْ لاَ حَاجْبْ وباغا دير راسها من راسي...هادو مالهم معايا ياك موقراهم ..ولا جلوسي هنا كيف الشوكة واحلة ليهم كل وحدة فهاد القصر بْحَالْ الُوقِيدَة تْقِيسيهَا تَشْعَلْ مْعَاكْ..وباش جوباتها هي ؟

زنوبة: قالت ليها ما عند المقص ما يدي من الضس من المستحيل تكون ليه ولا تقرب جيهتو ...هي مرات علي وجالسة هنا بصيفتها مراتو وغادا تبقا مراتو  ..
جورية: بنَادْمْ بْحَالْ القُلَّة مَا تْعَرْفُو جَايْبْ لَفْعَة وُلاَّ عَلَّة ..واش أنا نقول تهنيت من وحدة تخرج ليا لي كثر منها ..شنو دواها دابا هادي لاش زعما سايرا تعمرها عليا معارفاش بللي الْمَشْرَارْ بْحَالْ الدّْلُو الْمَقْعُورْ يُوصَلْ الْمَاء وُيَرْجَعْ خَاوِي
زنوبة: ݣاعلا يبقا فيك الحال كاين دواها أ لالة  هي عَايْبَة وُتْعَيَّبْ وُخْيَالْهَا ِإيشِيِّبْ... كانت حاطة العين على ولد هاشم قبل الزواج و داك النهار جا شاف باه فالقصر رديت ليها البال ولا فيها فار يدردك مللي شافتو واخا السيد مزوج و بولادو بانو ليا تبادلو الشويفات
جورية : (جلسات جورية كتفكر شوية بدات تكتب شي حاجة مقلدة خط رحمة وكتبات شي حاجة فكتاب رحمة حتى هو) شوفي غادا ترجعي هاد الكتاب لبلاصتو الليلة ..و هاد المرسول حطيه فجناح للي متسما خت السلطان و هاد المرسول طيري حطيه لولد هاشم فشي قنت يبان ليه فيها
او واياك يشوفك شي حد..وهدا هو المهم حطيه فجناح السلطان
زنوبة: وفين غادا نلقا ولد هاشم فهاد الوقت
جورية: زنوبة ...هاد الخويتم يخليك تلقايه؟
زنوبة: (خرجات عينيها )ويلي يا لالة نلقاه و نلقا جدودو لبغيتي ..هو أصلا كيكون مخشي غير فجنان الزيتون
جورية: احياني عليك يا الطميميعة ..يالله تحركي ..ومللي يتقضا الغرض حلاوتك كبيرة
(هاد الكتوبة للي طاحو بين يديا  كنز لعرفت كيفاش نخدمهم لمصلاحتي كلشي غادي يولي عند رجلي ..نفدي القديم والجديد ...كنت غير دريويشة أش قضات ليا ضرافتي من غير الحكرة و قلة الشي كنت كيف الشَّاةْ الْمَذْبُوحَة مَا يضَرّْهَا سْلِيخْ .. ولفت نحني الراس حتى عاد القريب والبعيد داير ليا بردعة وشواري وينغزوني بسيخْ..من اليوم لي يحك نحاسي نوريه باسي)

#يتبع