(قرصات جورية مريشة قرصة خفيفة فكتفها)
جورية: سخرتك اللاروب..مللي نتيا مكتعرفيش تشطحي لاش كتقولي الأرض عوجة .. مقديتي تجيبي حتى مرسول مقاد...كان غادي يطير راسي بسباب الكلاخ للي فيك ..دوي دابا طلقيني فين قالك غادا نلقاه
مريشة: سمحي ليا أمولاتي راه خلعني السلطان معرفت ما نقدم ولا نوخر...قاليك راهم حطو الرحال فدويرة ورا الجامع الكبير
جورية: حتى هي جات معاه ؟
مريشة: والله ما نعطيك خبار...ونتي أ لالة غادا تخرجي عندهم فهاد الليل
جورية: (شافت فيها زعما ديها فراسك شوية.. لاحت عليها سلهامها و فظهرها عثمان وخرجت قاصدة الخيل )..
هاشم: فين غادا لالة فهاد الليل ؟
جورية:(قفزات من بلاصتها) بقا دير الحس أ هاشم راك كنتي اتسكت ليا القلب
هاشم: السماحة منك أ لالة جورية .. قال ليك مولاي مكين لاش تخرجي من القصر فالصباح مرادك يكون عندك
جورية: قول لمولاك...يخرج سوقي ...شغلي قادة بيه (بغات تكمل طريقها هو يمنعها )
هاشم: أنا غير عبد مأمور أ لالة ..
جورية: (حتى كانت غادة ورجعات عندو)هاشم خالتي حليمة حابسها علي عندو .. كيف ندير نعتقها من يدو قبل ليصفيها ليها...
هاشم: كوني هانية مولاي غادي يوقف بنفسو على هاد الأمر ويجيبها حتال عندك..غير رجعي دابا لجناحك
(صاطت فوجهو و رجعات لجناحها ... بدلات حوايجها و شدات ولدها بين يديها )
مريشة: لالة ...جات كروسة دابة للقصر ...ونزلات منها لالة عناية مرات سيدي وقصدات جناحو
جورية: مرا وحدة للي عند مولاك هاد الساعة وساعة اخرى وللي بقا فعمرو وللي هي أنا ...
كتبقا فيا ديك السيدة...مفيها نفس ..مسح فيها رجليه كيف بغا و قبلات ترجع تعاونو ...العجب زعما تكون نيت رجعات القصر باش تعاونو
مريشة: جايا مقادة الحالة تقولي عروسة وهادي ليلتها
جورية: نوضي تݣلعي من قدامي جيبي خبارهم ...أحيياني عليها جاية معولة.. راه قالوها ..قالو الشطاحة تموت ونصها كيلوّز ..غادا ترجع تاني لتطياح النفس
*****
مور شوية ديال الوقت رجعات مريشة لاقية جورية غادية جاية فالجناح بحالة حاكين ليها السودانية
جورية: أمضرا كاينة شي خبيرة
مريشة: مع الدخلة يا لالة عنقاتو وقالت ليه توحشتكم أ مولاي ...هادي ما جاية فعوين...نيتها باينة فالسلطان تقولي كانت موجدة لهاد النهار ...فين عناية المتقلة و الخويويفة ..طارت عليه شداتو مطلقاتو...مولاي مشا ليك من يديك أ لالة مشا ..شداتو شدة العما فالظلمة
جورية: طير عليكم مولات الواد نتي وياها ..تشدكم من عناقكم..فمي لي جابها ليا ...مبانت ليا غير هي نقول ليه تعاونو ...وهو عنقها ؟
مريشة: واييه تقولي بحالة عمر الغيار كان بيناتهم ...و شد من يديها جلسها حداه و طفاو الشمع
جورية: اويلي على طفاو الشمع ..اري ليا سلهامي يا كحلة العفطة (فهاد اللحظة تقطع حس مريشة و طفا شمع الجناح
وحسات جورية بيد معنقاها من ظهرها و همس فودنها )
السلطان : يخ منو و عيني فيه
جورية:( طلقات منو ومشات للشرفة)
السلطان : (تبعها وهو كيطلب السماح) عارف راسي غلطت فحقك عذريني ..راني فوقت للي وليت راسي كنشك فيه
جورية: لاش جاي عندي رجع عند عناية ..كنتي غا على سبة
السلطان: ههه ..زعما هادي كلها غيرة ..مكين لعناية لا غيرها ..حسيت بخديمتك جايا تقصي الخبار ..وصيتها على داك الكلام تقولو ليك .. عناية راها فجناح السلطانة هاد الساعة ..فهمها هاشم خدمتها و أنا جيت نطل على سلطانة قلبي علا وعسى يحن قلبها عليا و طلق ديك الغوباشة
جورية: حتى تجيني ديك السليعفانة ونوريها البهوت ... اممم سير تنعس باش ترتاح راه مشا الحال
السلطان: خليني معاك نتي هي راحتي
( جلسو بجوج كيتسامرو تحت القمرة ..حط راسو على كتفها و طلب منها تغني ليه..)
🎶🎶🎶🎶🎶🎶🎶🎶
العين زايغة تعشق الزين أ لاااالة ...اه يا لا لااال
والقلب الرزين عاد سايب يا سيدي ....اااااه يا لال
ما تبرد جمار ليعتو غير بشويفة يا لالة ...اه يا لا لااال
عشقو رشا داتي يا سيدي..اه يا لا لااال
هو يعلم ما بيا يا لالة...ااه يا لااال
رويني و زيد يا المليح أ سيدي ..اه يا لالال
سكرني من غرامو ما علينا رقيب أ لالة ...اه يا لالال
ما تفرق جواري ولو الشمس تغيب أ سيدي...ما تخلي داري اه يا لا لاال
باتو ديك الليلة فحضان بعضياتهم و صبح عليهم صباح جديد هازين فيه هم هاد البلاد
فاق السلطان قبل منها مشا يقضي شلا حوايج وخلاها مرتاحة
#يتبع
أنت تقرأ
رياض الباهيات
Ficción históricaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
