مسعود: (كان كيمسد للحمانية رجليها)لالة حبيبتي شقال ليك سيد التهامي
الحمانية: ااااه يا مسيعيد ، جاتنا دجاجة سمينة بكامونها، غادي نصورو منها رزق صحيح
بغاني نوجد ليه عزبة مسكدة تكون قادة و مقدة ...واياك تنطق بكلمة قدام حليمة راك عارفها ما كتبغيناش نبيعو العواتق العزبات توللي معايا فشد ليا نقطع ليك
مسعود: بيعي ليه وحدة من دوك الجدادات ...ونلقاو ليها تصريفة
الحمانية: داكشي للي قلت ..شكون بانت ليك فيهم تحمر الوجه
مسعود: هوما بثلاثة كي البلارات....البياض و كلشي زعر و القد مرسوم و عامر و ليني وحدة فاتهم بالزين والعقل غا هي سليطة ولسانها سابق سنانها ماتكر فيها عصا ولا معيار شهماتني
الحمانية: شكون فيهم ؟
مسعود: جورية .. حتى من حليمة محملتها مقبلاتها ظل تمشوط فيها باش تقاد ... كون صابت تغززها بنت الهم فاقصاها أما لخراينات خوافات و حشوميات غا حادرات الراس
الحمانية: ايوا العقل فات الزين و سعدات من حازهم بتنين.. أنا بغيت الماضية فيهم للي غادا تقن ليا الشغل و تعلم دغيا شبغيت بالحشوميات ...شوف هي لي بغيت ..التهامي ناسو زربانين وأنا خاصيني الفلوس ..الرياض مايتة فيه الحركة هاد ليام ... خاص راسها يتهرس باش تسمع الهضرة .. حرش لبنات يعطيوها شي ترييشة ويعريوها و ليني النبشة منلقاهاش فلحمها ولا وجها و دخل عليها البشير يدير راسو غادي يتعدا عليها ...أنا أنبقا نتفرج من الفوق و قبل هادشي صيفط حليمة لشي قنت راك عارفها
مسعود: بغيت غير نعرف لاش دايرا بحساب حليمة باش نافعاك..راه الوجه المشروك ما يتغسل ..ديما حليمة دايرا لينا العصا فالرويضة
الحمانية: يا الهاتر ..كندير ليها الخاطر وليني كندير لي مسلكاني. ..فطريقها كنحلب التهامي لي كيجيب لينا الهمازي و القصاير غير باش ترضي عليه..لشديت معاها الضدد تحرشو ويتقطع رزقنا ومتنساش باللي عندها معارف كثار كيخليو المخزن ميك علينا ...حليمة هي باش كنشريو سكات الناس من غيرها يحكرونا..و زيد عليها هي طريقنا باش التهامي يخلينا نديرو يدينا معاه فجواري القصر وديك الساعة غادي تشوف الفلوس ديال الصح وراني النص بالنص معاها فهاد الرياض..
مسعود: وا راك معلمة نيت أ لالة حبيبتي
الحمانية: ايوا تعلم ما يليق بيك وبشوية على داك الصاك راك طيبتيه مالك مهاوش (دفعاتو برجليها ينوض)سير دير للي قلت ليك
*****************
(فجناح لالة عناية كانت كتكلم وصيفتها وهي معصبة)
عناية: بهدلني ومخلاش ليا أ رقية مسح فيا رجليه بغيت غير نعرف ما تزوج عليا ما طلقني لاش باقي محرزني فهاد القصر دفن ليا شبابي باطل
رقية: على ما سمعت كيروج بين الحريم بللي مولاي فيه العيب وهو للي مكيولدش تلقايه خايف يطلقك ويثبت عليه العقر و لا تزوج الثانية ومحملاتش عاد فين غادا تكمل ليه، داكشي لاش كيجيب غير الجواري بلا زواج
عناية: سكتي من التخربيق ..ولا نقطع ليك داك اللسان ...مولاي دخلت لخلوتو مرة وحدة كي بغيتيني نحمل
عناية: سكتي من التخربيق ..ولا نقطع ليك داك اللسان ...مولاي دخلت لخلوتو مرة وحدة كي بغيتيني نحمل
رقية: وا ماشي أنا لي قلت أنا غا وصلت ليك شنو سمعت ...نتي مولات العقل أ لالة دوز شلا جاريات مالهم حتى وحدة محملات و كلهم غبر ليهم الأثر
عناية: وسوستيني ... زعمة لكانت هاد الهضرة بصح ... راه ضعت ...لا ولاد لا راجل لا عيشة كيف الناس محبوسة فسمية سلطانة
رقية: شكون بحالك عمرك تجيك الضرة .. بعدا ضمنتيه ليك وحدك ... ما ديريهاش مني قلة الصواب أ مولاتي ...كوني لالة و تحركي باش تدي قلبو متبقايش غير راخية الحبل وعاطياها البكا والكفة مكفية عليك...ما شفتيش بللي المحضيات عندهم قيمة كتر منك فهاد القصر ونتي للي مرات السلطان ما عندك كلمة ولا حكام لا على حريم ولا خدم ..نجيب ليك أمولاتي شبيبة و حرمل نبخرك ما تعرفي تكون ضارباكم العين
عناية: اش تنفع تقضي التباخر أ رقية و الدّا من الداخل..
وا شوري عليا شنو ندير باش يبغيني وباش نوللي الكل فالكل ويعود تا أنا يشد ليا الخاطر؟
*********************
الليلة كان السلطان معروض عند ولد خالو ولي هو الوزير ديالو فنفس الوقت دخلات عليه مو السلطانة الجناح تفكرو حيت عارفاه كينسا حتى لقات داك الجناح كللو مشقلب سفاه على علاه ... أمرات الخدم يجمعوه و خرجات للجردة الخاصة للي ممنوع على أي كان يحط رجلو فيها او وقفات عند الباب
السلطانة الأم (فخيتة):مولاي عرفتك غادي تكون هنا ...
عثمان: سلطانة لاش خرجتي من جناحك ونتي عيانة
فخيتة: جيت نطل على وليدي ونفكرو بعراضة الليلة
عثمان: ما عندي كانة..صيفطت مرسول باش يأجلوها لنهار خر
فخيتة: ايوا فيها خير.. مال مولاي خاطرو خاسرة ومعبس البشرة و هادشي غير قدامو مو يا حسرا
عثمان: والو غا داقت بيا الدنيا و ثقالو كتافي بدنوب العباد ... فطريق روح وحدة زهّقت شلا رواح .... ما خليت طبة ما خليت دوا العرب ....العشوب ديال الشيخ عام وانا نشرب فيهم طيبو ليا معدتي على والو حتى حاجة ما كرات ..
فخيتة: للي جات من الله مرحبا بيها و كل شي بأجل و عرف راه للي مقسما ليك مكاين للي يسلبها منك..شوف نسا هادشي و رخف النفس فيك راه هاد العصاب حتى هو ما مزيانش (مدات ليه كركوبة من العشوب لي كيشرب معجونين فالتمر) ... كول هادي اللخرة لي بقات ليك ومتقطعش ياسك ...و سير للخلوة ديالك وأنا غادا نرسل ليك لي تونسك وتطيب نعاسك و تخفف عليك باسك
عثمان: عام وأنا ناكل فهاد العجب حيديه عليا ..ما بغيت لا لي تونسني لا لي تهوسني أمريهم يخويو القصر من الجواري للي فيه ويجيبو جواري جداد و...و
فخيتة: و شنو
عثمان: و صيفطي ليا عناية للخلوة
فخيتة: الله يرضي عليك أوليدي هكا نبغيك ...راه ما دوم ليك غا مراتك مسكينة قلبها كيفدفد عليك
#يتبع
"السلطان بهيبتو وكدوي العباد فغيبتو"
أنت تقرأ
رياض الباهيات
Fiksi Sejarahسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
