زهور: والله أمولاي حتى فهمتي غالط ... والله ما بيني وبينو شي حاجة ...
السلطان:(رماها تحت رجلين مو) هادشي لاش باغا تخليها هنا بغيتيها تحل فينا الفام ..ولات تمعشق بالعلالي فالجنانات
هاشم: فين ما كان غادي نجيبو عند رجليك أمولاي يبوس ترابها ...للي غلب يعف أمولاي ها العار أمولاي عوينة وحدة للي عندي مترزينيش فيها
زهور: (للي كان شادها السلطان من شعرها) على هو أ هاشم عارف بحق الكبدة راك كدوي مع حجرة والحجرة وهشيشة على قلبو..ربي ما حرمك من الخلفة غير بسباب ظلمك مكتعرف غير ذبح وسلخ ..هذا مبقاك هكا أ الظالم حݣل ربي فيك أالحكار
(كلشي للي فالقصر تصمر من هضرة زهور وجرأتها على السلطان..وقالو هادي اللخرة ليها)
السلطان: طلق يدو منها(عينيه حمارو او ودنيه بداو يصوطو ...تكلم بصوت حادر ...داك الصوت للي كتكون فيه بحة ) سلطانة جوج كلمات ...دي بنتك من قدامي قبل ما ندم ... حدر راسو و خرج بلا مايدير حتى ردة فعل
(فهاد الوقت كانت جورية وقفات عند راس عناية بعدما ستغلات توشويش الحراس على ما جاري بين السلطان وختو
تسلات بشوية وحلات عليها ...)
جورية: غادا نوصلك لعودك ورا القصر ..هاكي هاد الفلوس وهربي أ بنت الناس ... أرض الله واسعة
عناية: (واخا العصا للي كلات باقا شادة فراسها) عمري نسا خيرك أ ختي جورية ...عتقتيني من الموت الله يحفظ ليك وليداتك ...غادا نصحك لوجه الله خرجي من هاد القصر قبل ما يوصلك صهد عوافيه..أنا كنت غادا نمشي بين الرجلين لامن سال ولا طل عليا ..السلطانة يا حسرة و تقول كانت باغاها فيا
جورية: علامن داوية
عناية:(همسات فودنها بكلام خلاها فحيرة)
جورية: ماشي وقت الكلام دابا زيدي قبل ما يحصلونا...
******
السلطانة : (عطات لزهور واحد التصرفيقة حتى عنقها دار) كفاش عطاك خاطرك تهضري مع خوك بديك القصوحية ...واش نسيتي بللي هو السلطان ..وعمر العين تعلا على الحاجب
زهور: مالك مدويتي ملي كان مجرجرني من شعري قدام للي يسوا وللي ما يسوا ولا حيت هوا السلطان يدير ما بغا ...جي من جيهتي غير مرة وحدة فحياتك
السلطانة :قطعي الحس .. أنا لي رخيت ليك الحبل ...من اليوم جناحك متخرجيش منو ..تقابلي ولادك و تشدي الأرض .. حتى نشوفو مولاي شنو غادي يدير معاك أ المسخوطة ...الا خرجتك من هادي مقالها حد لحد
زهور: يدير للي عجبو مبقاش كيهمني ...ولا يأمر وينهي ويحكم و يفاصل بلا موجب شرع ما يخللي الكلمة حتى تخرج من فم الواحد
السلطانة: مزال زايدة فيه ..سدي عليا فمك أ المسخوطة
#يتبع
أنت تقرأ
رياض الباهيات
Ficção Históricaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
