قالو ناس بكري ، النية زوج ويدان
- الواد الأول : صافي و فيه النقى ، عوم و شقى ، تلحق تلقى و قدرك يبقى
- الواد الثاني : واد لخدع ، شرو يلمع ، يقولك تبع تغرق و من غدرو تشبع
يا سادة يا كرام يا عشاق الحكايات يا هل الغرام نستهل الكلام بالصلاة والسلام على سيدنا محمد الامام ونقول ليكم مرحبا بالسامعين و القاريين حروف حكاية رياض الباهيات.. هاد الرياض للي مكيدخل ليه غير للي بغا يحيد الغمة و ينسى الهم.. يسهر الليل ومايجيه طويل .. رياض هاز شلا حريم من جميع البلدان والقبايل... كيف الوردات المفتحات تعشقهم العين و الريوك يسيلو عليهم...ها الزعرة ها الخمرية ها السمرة...رماتهم يامهم بين يدين مرا ما تعتق ما ترحم سلباتهم حريتهم و عذريتهم وللي بقا فحياتهم..داو على عيشتهم فيه أو ولا هو دنيتهم ...دنيتهم الملعونة المسقية بالعلقم ..فيهم لي ما لقا جهد باش يبدلها وفيهم لي غارق فيها و فوسخها وعاجباه و غاراه... فيه النقرة الصافية للي مهما تدنس لحمها , بقا قلبها بيض هاز المحبة وخا رافد هم الدنيا والدين , وفيه الحديد اللي يلمع وكي تحكو يبان الصدا للي فيه منين ومنين..
رياض حكايتنا الداخل ليه كايرمي وراه الحزان ويخرج شاد الدنيا من الخفيف ... غير بشويفة و تبسيمة كيحط لي وراه ولي قدامو بالخاطر ماشي بالسّيف...عتبتو غرارة ..للي تخطاها مابقا ليه منها هروب هو يبعد وهي تجرو من الشكارة ...رياضنا الزين فيه عمرو ما بْلا و العويتقات فيه كتباع و كتشرا ... أجيو نحطو وديناتنا على بابو نسرقو السمع و نجيبو خبارو ونفضحو سرارو ..
*************
(كانت مرا متكية على ظهرها و مسندا راسها بدراعها ودايرة رجل فوق رجل ..سيكانها معريين بياضهم كيقشقش تكلمات بصوت مبحوح وهي كتشوف فوراق الدالية لي واصلين السطح )
الحمانية: طلق راسك خلاص جيب ليا دوك الخانزات نشوف واش غادي يطوعو هاد المرا ولا لا
مسعود: كوني هانية أ لالة حبيبتي هاد المرة ماخليتش ليهم فين يهزو الراس ولاو طالبين السلة بلا عنب
الحمانية: ها حنا غادي نشوفو ..ولا نخلطك معاهم ..صبرت عليك سيمانة لهلا يزيد كثر واش منخدموش ...
(مشا مسعود بخطاوي زربانين هبط مع شي دروج وهو يوقف عند بيت بابها كبير وبدا يحل فالقفل )
مسعود: جاكم الفرج(دار واحد الضحكة مزروبة بحال ديال العيالات وقلبها بتخنزيرة) ...والله يا دوك الكلبات وما ديرو للي علمتكم وقريتكم حتى نغززكم بسناني ..تحل فيكم شي وحدة فمها الخانز هاد المرة قدام لالة حبيبتي بغير السمع والطاعة نعلقها من كندادتها..
(كانو واقفين قدامو ثلاثة البنات مضويات كيف البدر فليلة حزينة...الزين و القد والقامة ..ظاهر عليهم العيا والجوع وأثار الضرب ) تحركو قدامي ياللاه
(جوج طاوعوه وتقدمو والثالتة عكسات..ماطا يدو يجرها وهي طير عليه بعضة خلاتو مصمر بلاصتو )
مسعود: اح أ سيدي ربيييي ...ويلي ويييلي على الكلبة المسعورة بغات ترزيني فصبيعاتي ....عتقني يا الباشييييير عندها منشار ماشي سنان ..أجي يا بنت الهم لهنا بيا ولا بيك دقة فيا ودقة فيك حتى نشوفو اش فجهدك ..لقيتي لحمي رطب ساهل على دركومك ..سرك غا سوط الباشير
الباشير : مالك تصريح غواتك العلّام تاني
مسعود: شوف شغلك مع هاد زرقة القنانف مللي جات وهي دافعة كبير تقول بنت قاضي القضا ... الله يعطيها دقة بلا عتقة كانت غادا طير ليا يدي ،مكرجة النيف مصننة القنات شدوني عليها ( جا يقرب منها خرجات فيه عينيها هو يرجع اللور خاف تعاود ليه شي عضة)
بقا عليها الباشير مسيكينة بالدق شري تربح حتى خلاها تزاوك
******
الحمانية: ياك كنقوليك أداك وجه الضركة ضرب وفوت الكمارة ...واش عند بنات هاد الرياض من غير سيفتهم و القامة الزينة باش يمشيو ليا الشغل
مسعود: راهم عذبوني وشهموني غزالات فثوب نمرات شوية وياكلوني منفعني فيهم غير سوط البشير .. وهاد المسعورة جهدها ما بغا يتحد .. ونزيدك أ لالة حبيبتي عندهم من غير زين العينين زين الغار الدفين للي مزال ماوصلوه ولاد عيان ولا سلاطين، سرهم لي يطلق عليهم شي هيش ينهش لحمهم بالخصوص هاد المسلكمة مو نص محسوك
الحمانية: هادي سلعة زينة وهوتة قليل فين كنطيحو عليها ...ايلا وصلت للي فبالي غاديا نتهلا فيك مزيان غير ساعف معاهم..
قربو عندي لهنا قربو ..متخافوش ..أحميماتي للي غادين يبيضو ليا الذهب
اللولة فالحاجات للي نقولو ما نعيدو مرتين وهو للي يكون، للي غادا تشد فيكم معايا الطريق ميخصها خير تعيش مفطحة وللي يسخن عليها راسها ويحكها جلدها البشير موجود وداك التفنطيز و الفشوش ما ديروهش هنا
مسعود: (بعدما جات هضرات ليه وحدة فودنيه و أمرها تمشي)لالة حبيبتي ..سي التهامي جا وكيتسناك
الحمانية: ديهم حممهم وعطرهم ولبسهم و من بعد جمع ليا بنات الرياض كاملات بيدما ساليت شغلي
أنت تقرأ
رياض الباهيات
Fiksi Sejarahسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
