كانت الشمس كدوخ..طيح الطيور من السما وتنشف البير من الما .. وراق الشجر مكتحركش ...ومع الشركي سخون ..الواحد نفسو ميقدرش يطلعها ..
ماهي الا دقايق معدودة حتى حلات عينيها لاقية راسها فجناحها كتقطع بالوجع وضايرين بيها الحكيمات لي طلبو من السلطان يخرج حيت غادين يكشفو عليها
( السلطان كان هو لي جابها من تحت الشجرة بعدما وصلاتو خبارها خرجات من القصر تبعها كيقلب بنفسو عليها)
عطاوها شي دوا يهمد عليها الحريق و مشات وحدة فيهم كتهضر مع السلطانة
السلطانة: أمضرا التيلاد بيخير ؟ و جورية كيف راها
- حفضها الله و حتى لي فكرشها كان غادي يموت كون ما لطف الله وليني لازمها الراحة ومتنوضش من الفراش ...ما تعصب ما تهز تقل راها نجات من الموت
السلطانة: دوزو عند هاشم تتخلصو (بقات وحدة فيهم واقفة فحين لخرى مشات تشد ليجارة) مالك ياك لاباس بحالا باغا تقولي شي حاجة ومقاداش
- لسمحات مولاتي وعطاتني الأمان نتكلم
السلطانة: عليك لامان قولو شنو عندك طلقيني
- لالة مراة المرحوم واش كتجيكم
السلطانة: لا ..علاش..
- او مولاي علي الله يرحمو واش خداها بنت الأصل معرفة
السلطانة: معرفتش ...لاش كتسولي فللي بعيد منك شهاد قلة العرض
- عذرو فضولي أ لالة ...حيت لالة جورية مللي جيت نقلبها لقيت فخضها موشوم ...والوشمة للي فيه كيتوشمو بيها غير ....
السلطانة: غير شنو
-(وشوشات ليها فودنيها )
السلطانة: (خرجات عينيها) واش نتي سخا عليك عمرك هاد الهضرة راه لازمني نقطع ليك عليها اللسان
- والله أ لالة ام سيدي ما كنكذب داكشي لي شفت قلتو ليك وراني شاب راسي فهاد الخدمة واش فنظرك غادا نتجرأ ونحل فمي راه دازو عندي عداد من بحالها
السلطانة:( زيرات على سنانها ..و شدات ليها فيديها) واياك هاد الكلام يتعداني أنا وياك ولا رقبتك طير ...يالله غبري عليا من هنا
***********************
وصل الليل وبدات جورية كتحل عينيها بشوية وحلاتهم على السلطانة واقفة عند راسها
أمرات الخدم يخرجو وبقات هي وياها الراس فالراس
السلطانة: حسبتك بنتي ودرت ليك العز او وقفت معاك ضد خويا ومراتو باش فاللخر طلعي مومس و أنا للي عند راسي راك لالة مولاتي تعفطي على الزبيبة وطلع معاك حلاوتها
جورية: تسندات على يديها باش تنوض تجلس وهي مصدومة ...سلطانة أنا...
السلطانة: ما عندك ما تقولي ليا الوشام لي ف فخضك بين عيبك
جورية: غير سمعي ليا أ لالة فخيتة مظلمينيش
السلطانة: نرجع ما نلقاكش كضوري فالقصر
جورية:(تحنات على ركابيها وشدات فجنبها لي كان عاطيها الحريق) أنا مزاوكة أ لالة لما غير سمعيني ...أنا راني غير مظلومة
(السلطانة جلسات عاطياها الإذن باش تتكلم..عاودات ليها جورية قصتها من اللول حتال الاخر)
جورية: انا ألالة كبرت يتيمة الاب ومي مسكينة قهرتها ليام ناضت تزوجات وما خفاك لي لقا راسو كيغرق فاشما لقا كيلصق...جابت راجل يكون بيها وبيا ساعة طلع ولد الحرام مقطر ...راس مالو قنطار من الشر .. لسانو سليط ويدو طويلة دوزها عليا من صغري لكبري ،ملي وليت عاطية للعين طمع فيا و حاول يتهجم عليا شحال من مرة ومي ساكتة وما قادة عليه وغير الفم باش تنهيه تقولي ملجمو ليها ..نهار عرف راسو ميصور مني والو و خاف نشوهو بين العباد سبق ليا الشوهة وحط عليا الباطل ...باعني لواحد الشارف وأنا مازال ما عارفة فسوق الزواج لا ما نقدم لا ما نتلي هربت قبل ما يحضر العدول، شحال وانا ملاوحة فالزناقي وكنت نبات غير حدا بيت الما ديال الجامع حتى لقاني فواحد النهار ..مرمدني تمرميد هيضورة العيد و وداني باعني لرياض الباهيات وشيع شلا خبارات عليا ما فيها ما يسوا ولا ما يصلاح ..وتم تكرفصو عليا مزيان عصا وجوع و ذل...........(.المهم خوات ليها المزود وما فيه كان قلبها طايب جاب ليها الله علامن تخويه).....
السلطانة: دازت عليك ونتي فهاد السن يشيب راسك بهاد الهموم ...هازاها فقلبك و طامة
جورية: كنقسم ليك بالله أ لالة ايلا كل كلمة قلت صادقة فيها و عمر ولد المرا ما حط عليا يدو كنت بشرفي حتال ديك الليلة ...
السلطانة: وليني شنو ذنب علي تغشيه وتبداي معاه بالغدر مخفتيش تحصلي
جورية:داك لي تعدا عليا نسا خاتمو فالبيت ... والمصيبة مللي هزيت داك الخاتم وسولت على مولاه فسوق الذهيبية تصدمت مللي عرفتو هو علي نفسو ...
السلطانة: دابا بغيتي تقولي باللي تزوجتي للي تعدا عليك ...مدخلاتش ليا العقل
جورية: وليت نحلم ويشدني بوغطاط كل ليلة من نهار عرفتو هو سبابي فديك الليلة ...ومرة مرة نتفكر حاجة ...ستريني أ لالة أم سيدي و أنا نبات ما نصبح راه مولاي بلاش مبقاش حاملني هنا ويلا عرف بهادشي يعلم الله شنو يدير فيا
السلطانة: وقفي وسمعيني.. سرك فبير ماليه حد مسحي دموعك و سيري ترتاحي ..أنا غادا نهضر مع السلطان باش يخليك هنا نتي ما ليك ذنب فللي دارو علي غير كوني هانية وهادشي لي قلتي مطيحش من مقامك ومعزتك عندي بالحق راه لعرفتك كذبتي عليا فكلمة وحدة ورضيتيني ضحكة منعاودش ليك شنو ندير فيك..
#يتبع
الحكرة حدجة وزايدة مر
موت وماليها قبر
قولو ظلام وماليه فجر
أنت تقرأ
رياض الباهيات
Tiểu thuyết Lịch sửسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
