صبح الصباح و كانت السلطانة خناتة خارجة مزروبة من القصر ..شدات الطريق حتى وقفات عند بير مردوم جا فالخلا والقفار بدات تلفت وراها و فجنابها ..بحالة كتسنا شي حد حتى جا عندها واحد كيبانو غير عينيه
خناتة: ياك كنقوليك أ علي ما تعاودش مزال ترسل ليا شي مرسال للقصر .. واش بغيتي نحصلو ...كفاش هربات من يديك ديك اللفعة و رجعات للقصر ..شفتك مبقيتيش كتقن خدمتك
(هبط الملثم من فوق العود)
واش مناويش تهضر ...شنو بغيتيني لاش رسلتي ليا .. واش كاين شي مشكيل فسلعة البارح؟
(حدر الملثم لثامو و خلا خناتة غير حالة فمها)
هاشم: باش تعرفي أ لالة أم سيدي راه ساهل يطيحك الواحد فالفخ
خناتة: شكادير هنا ؟
هاشم: ما بقا ميتخبا جميع مكايدك تكشفو عند مولاي ...وعرف كلشي ..وانا غير بحكم العشرة جيت ننبهك بللي مولاي غادي ينفيك
خناتة: بغيتي تقول ليا بللي غادي توقف معايا ضد السلطان..للي حياتك كلها كتفديه بروحك
هاشم:أنا مزالني مع مولاي عثمان وليني معطاتنيش خاطري نفوتك...
خناتة: و شكون قاليا هادي مشي مكيدة من مكايدك
هاشم: هانا قدامك أمري نعمل..عندك حل واحد لبغيتي مولاي يسمح ليك هي تورينا طريق علي ...أما لبغيتي تخسري كلشي نتي تعرفي
خناتة: زعما عثمان مكانش قادر يقول ليا هادشي بفمو ..ونتا براصك لاش هاد الخبير كلو ...كنتي تقول ليا هاد الكلام وسط القصر
هاشم: مولاي مقادرش يواجهك دابا خايف يتسرع فحكامو و يولي نادم كيما كان الحال كتبقاي مو ... و مبغيناش الخبار ديع و القصر حيوطو سماعة او الودنين فيه كثار ...دابا اش قالت لالة ام سيدي ...غادا ديري يدك فيد مولاي ولا غادا تختاري ولد خوك
فهاد الوقت كانت جالسة جورية و بين يديها ولدها وهي ساهية فطبسيل التوت للي قدامها ...رجع بيها عقلها ليامات الصغر نهار كانت كتلعب الغميضة مع بنات قبيلتها ومها وعيالات القبيلة كينقيو الزرع ويغنيو..
وفاش سالات التغماض وبدات تقلب على البنات باش تقشقشهم و قف قدامها ولد كبر منها شوية فالعمر
****: شنو كديرو
جورية: كنلعبو
****:نلعب معاكم
جورية:مكنلعبوش مع الصبيان
****: مسمومة ..
جورية: سير بحالك ولانعيط لبا
****: كيعجبك التوت
جورية: لا
****: هاكي دوقي عاد حكمي ..
جورية: مي كتقوليا مناكلش من عند لي منعرفش ..واش سكنتو جداد فالدوار
****: لا أنا ماشي من هنا ..جينا ضياف و ملقيت معامن نلعب بقيت كندور هنا حتى تلفت على الدار
جورية: مي هاد الولد تالف على دارهم
زوبيدة: مزيناتك وليد.. ومزين لباسك.. قول ليا عندمن جيتي ؟
****: معرفتش..ملقيتش عندهم معامن نلعب وخرجت زوبيدة:خليوه يلعب معاكم حتى يجيو ليه هلو ..ولا حتى يجي باك ويديه يحطو فالجامع
بقاو كيلعبو مجموعين حتى جا واحد بغا يلعب معاهم صحة و ضرب جورية هو يصلخو الولد للي تالف او وقف جورية ساس ليها حوايجها ومسح ليها الجرحة للي فركبتها بطرف قطعو من حوايجو...ومشا قطع ليها وريدة باش تسكت من البكا وجبد ليها التوت من شكارتو و عطاه ليها داقتو
****: عجبك دابا
جورية:(وهي كتمسح دموعها) اه حلو
جا البراح كيقلب عليه او وراه رجال فوق الخيل داوه معاهم مللي طلع ورا واحد فيهم شاف فيها و قال ليها بسلاما
****: بسلاما عليك أ الوريدة الجورية
(فهاد الوقت دخلات على جورية خادم باش تدي عثمان لبلاصتو ...)
الخادم: لالة جبنالك الخادم مريشة للي كنتي موصية مولاي هاشم يقلب عليها
جورية: وفين هي دابا
(الخادم شافت فالخديمات للي قدام الباب وهوما يدخلوها)
جورية: دخلي أ مريشة مرحبا بيك بيناتنا
مريشة: ترحب بيك الجنة ألالة جورية ...والله ومتساليني حلوف الا توحشتك
جورية: جبتك تكوني فجنبي فهاد القصر الكبير ...حيت مكنتيق فحد هنا ..قولي ليا واش نعول عليك
مريشة: الله يا لالة مرات سيدي ...عينية نعطيهم ليك
جورية: المهم من اليوم نبغيك طلقي ودنيك و عينيك الشادة والفادة نبغي نعرفها قبل من أي واحد
#يتبع
أنت تقرأ
رياض الباهيات
Ficción históricaسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
