السلطان :(حط بين يدين مو راس علي) لاش أمي ديري هادشي ونتي سلطانة القصر وكلشي عند رجليك...لاش ضحكي فيا العادي و البادي لااش ظلمي و تقهري و تنهبي و تقتلي لااااش
(بقات السلطانة غير كترعد و ضاربة الطم ومصدومة من هادشي للي واقع)
من بعد هادشي خرجات من القصر كروسة واقفة فيها خناتة مكتفة و فجنبها راس علي معلق ومعاهم البراح
" يا هل البلاد يا الشرفة الملاح قالكم مولاي السلطان...الليلة ليلة الصلاح ..غادي ينعس وبالو مرتاح ...جاب منبع الفتنة و المصايب لبين يديكم .. يا تعفيو يا تاخدو حقكم او وحد فيكم ما يتلام "
(هبط السلطان من فوق عودو و الحجرة اللولة للي غادا تجي فمو تعرض ليها و ضرباتو فوجهو ..مقدرش يشوف مو كتضرب..)
السلطان: حسبوني عبد ضعيف بحالكم ...و خودو حقكم مني ..(وقف حداه خوه عدنان ودموعو هابطة شلال )
واحد من الناس: عاش مولاي السلطان سيد الرجال عفينا والله يتولا الظالم ...وتبعوه باقي الناس كيعاودو كلامو
نفيها أ مولاي و كسب شعبك ..باش ما تعاب و يقولو قتلتي مك و ما يلوموك لاش سمحتي فحقوق الناس
نزلها عدنان من فوق الكروسة وركبها على العود وهو متحسر على حالها للي ولا يشفّي ...قدامها الحرس او وراها هو وشي خدم قاصدين المنفى لي أمرهم بيه السلطان..
( ومشات ايام و جات ايام ...عادت بلاد السلطان عثمان يتضرب بيها المثال بين البلدان ...الخير غرق كل مكان و عاشو الناس فأمان و السلطان دار عرس وسبوع مطنطنين وتزوج جورية من جدة وجديد ...عرس لي القريب والبعيد بقا يهتهت بيه ايام وليالي ...عرس حضر فيه للي عندو وللي معندوش و كلاو او وَكْلو )
********
(كانت جالسة جورية و حداها السلطان لي مد ليها طبسيل عامر بالتوت )
السلطان: يالله كلعتو ليك ...دوقي و قولي ليا واش حلو أ الوردة الجورية
جورية: ههه حلو بحال حلاوة لسانك ..مولاي بغيت رياض الباهيات يتصلح
السلطان: للي أمرات بيه سلطانتي يتنفد ..غير هو مبان ليك غير داك الرياض المشؤوم...
جورية: بغيت داك الرياض نيييت أمولاي
السلطان: المهم ديري للي فخاطرك وللي خصاتك شوفي مع هاشم يقضيها ليك..أنا معليا غير منخصرش خاطر جوريتي وللي طلباتها تحضر واخة تكون فالسند ولا الهند
جورية أمرات باش يتصلح رياض الباهيات ويتفح من جديد بالحق هاد المرة فوجه كل مرا باغا تعلم صنعة تنفعها لدواير الزمان ...وعاد الرياض صيتو دايع بين الناس ها لي بغات تعلم الطياب ها لي بغات تعلم الطرز والخياطة ها للي باغا تنسج الزرابي ...ها لي باغا تحفظ القرآن ..كلهم كيقصدو رياض الباهيات زرݣات و يخرجو منو فهيمات ولبيبات و دايّات صنعة فيديهم ...فعهد جورية النسا تفقهو او وعاو وعادت المرا موقرة و يدّار ليها ألف حساب
الحاصول كيقولو سيادنا اللوالا شحال من زبالة رجعات جامع و هذا حال الدنيا ...رياضنا رجعات حليمة هي وام جورية مقابلينو و زنوبة معاهم ..وفينما لقات جورية الوجيبة كتزورهم واخة متقلة مع الحمالة(و ما خفاكم حمالة التوام صعيبة )
ومشات خبيرتنا من رياض لرياض وبقيت أنا مع بنات الجواد.
#النهاية🤍
أنت تقرأ
رياض الباهيات
Historical Fictionسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
