رياض الباهيات

رياض الباهيات 🤍 الجزء 27

فاق الصباح من نعاسو وتسالمات السما مع الشميشة و بْحَر التعنيقة خيوطها البراقة لمعات رقيقة دافية فالبلاد و ضوات على العباد ..الطيور غردات بصوت متناغم مواتي الجو و الزهر عطرو فاح وتسلل لجناح جورية لي كانت مزال ناعسة

زنوبة:لالة فيقي..لالة العيالات فياقك نعمة ونعاسك يخلي القصر فغمة ..مولدات بحالك ولادة لا فزين ولا رزانة
جورية: صباح الخير (فاقت كتكسل دارت شافت فولادها وناضت)
زنوبة: يسعد صباحك أ لالة.. لالة فخيتة طالباك لجناحها
جورية: معرفتيش لاش؟
زنوبة: لا أ لالة...
جورية: ردي البال للولاد متحركيش من حداهم .. خبار الخير
(دخلات جورية وسلمات على كاع للي تم ومنهم رحمة للي دارت ليها سلام ناقص)
السلطانة: جلسي أ بنيتي ...جبتك اليوم قدام عجوزتك باش نقول ليكم الغفور الرحيم طفيو هاد الغضب ...نوضي بوسي لمك رحمة راسها و ساليو عليا هاد الخصام
جورية: أنا يشهد عليا الله مشاداش فقلبي من جهتها هي لي محملانيش ..وماباغاش ولاد ولدها من نهار تزادو مطلات عليهم ...(ناضت تبوس ليها راسها وهي دفعها حتى جرحاتها واحد الحسكة ديال الشمع فيديها)
رحمة: كون يصحاب ليا أ فخيتة هادشي لاش جايباني منجيش ..أنا هاد خيتي ما كنعرفها مكنعرف ولادها ...تعطيني تيساع
(خرجات جورية ودموعها فعينيها واخا عياو يناديوها مرداتش)
زنوبة:ياك لاباس أ لالة منين داك الدم للي فيديك
(وهي كضمد ليها جراحها جورية بدات تحلف وتوعد ف رحمة للي قمعاتها قدام عناية و خت السلطان و الخدم )
جورية: عاودي ليا على علي وعلى مو وتريكتو من اللول حتى اللخر ...كل كبيرة وصغيرة ...بغيت شي راس الخيط منين نفدي دقتي فهاد الجيفة للي خلات اللفام يتبسمو عليا
زنوبة : (بقات تعاود حتى سخفات) وكيما قلت ليك هي طماعة و تموت على الريال وحبيبها هو للي يصرف عليها بالليل والنهار ..ونزيدك  عندها عادة تكتب كاع ما يجرا ليها ...و حتى ولدها علي ورث منها هاد القضية ..
جورية: بغيت الكتاب للي كتكتب فيه ...وفين نلقا كتوب ولدها
زنوبة:(بدات تهضر بشوية حدا ودن جورية) سيدي علي الله يرحمو كتابو يالله وصل البارح ليد السلطان ... حتى حد معارف هادشي من غيرو هو وهاشم ...أنا غير بالصدفة سمعتهم داويين عليه
جورية : اليوم يكونو عندي ..وبحلاوتك..للي طلبتيها جاتك
زنوبة: مولاي اليوم عارض للغدا شي ناس ...هادي هي الوجيبة فين نهز كتاب علي ...غير راه لحصلت راسي غايطير ...أما حتى رحمة حالها ساهل
(المهم يا سيادي فليفلة ديال زنوبة ماعرفت كي كدير لهاد التنوعير ...كطير مع الطيور ...خلات حتى كلشي كان مدهي و هزات الكتوبة ...وهي خارجة من جناح السلطان سمعات شي حد جاي ..تخبات بالزربة حتى كتبان ليها عناية داخلة كتسل و كتقلب على شي حاجة فالصنادق لي هزات منهم زنوبة الكتاب مللي قطعات لياس خرجات )
زنوبة: حفضني الله أ لالة ...لالة عناية شوية وتحصلني ..دخلات معرت علاياش كتقلب فجناح مولاي
جورية: ياك قلتي ليا السلطان منع عليها دور بيه ...و البارح أنا شفتها بالليل غادا دخل لبيت مسك الليل شافتني تلف ليها الكلام ..

زنوبة: متكونش كانت كتقلب على صنادق مولاي علي حتى هي ...حيت راه كانت لالة مسك لليل مسكينة هي للي مكلفة بيهم ...
جورية: هاد الكتوبة فيهم شي حاجة ...و عناية خايفة يتفضح شي سر مخبياه ..خاصنا نعرفوه
(العشية تعاشات ...صيفطات جورية زنوبة للسلطانة باش تجيب الحكيمة للدراري حيت مراض زعما  و هي راه غير مرضعاتهمش باش يشدو البكا ميطلقوه)
السلطانة: ياك لاباس شنو بيهم وليداتك
جورية: معرفتش أ مولاتي مبغاوش يسكتو من البكا ..راضعين و مبدلين ومافيهمش السخانة ..خلعوني
(مللي جات الحكيمة قالت ليهم يمكن يكون غير شي وجيع....
مللي مشاو ضياف مولاي عثمان..وسمع بللي ولاد علي مراض قصد الجناح يشوفهم ...بيني و بينكم هو ولا باغي غير شي سبة تخليه يشوف جورية ...الحاجة مللي مكيقدرش الواحد يدركها كتولي ديما فبالو
وصلات ليها زنوبة الخبار ..وهي تنوض لبسات وتقادات و شدات ولدها عثمان و بدات كتراري بيه فهاد الوقت كان السلطان فباب الجناح و سمع كلامها لي كانت متقصدة تسمعو ليه)
جورية: حبيبي عثمان ...الزين ديالي ...مال الكبيدة مريض ليا ...نمرض أنا أ حبيبي ومتمرضش نتا ... اااااه أوليدي ايمتا تكبر و تولي دافع على ميمتك نتا وخوك...الحمل ثقال عليا و أنا غير بوحدي هازاكم مبقيتش نرضا بشي حد يصرف علينا...تيتمتو من صغركم .. حتى كلمة جدة ولا جدي عمركم أتقولوها ...مللي زعما مشيت لجداكم نصفي معاها الخاطر دفعاتني حتى طحت و يدي ولات دمايات ... حتى لمن نشكي أولدي مكاينش ...كون غير لقيت فاش نخدم نبات ما نصبح ...وليت مثقلة عليهم حتى ولات تدفعني قدام الخدم ...حكراتني حيت أنا وحدانية ومكاينش فجنبي الراجل للي يحميني ..الغالب الله
السلطان: (دخل وهو مقلق من لي سمع) سمعت الولاد مراض شنو بيهم..ولاش ما نسيق الخبار حتى اللخر
جورية: ( ضارت عندو وهي كتمسح جوج دميعات من فوق اللثام) غير البرد ضربهم لمصارن  ...شكيت فالجناح حيت مكدخلش ليه الشمس مزيان ..مبراد ..داكشي لاش ...كنت جاية عندك أمولاي ساعة مللي قربت الجناح بانت ليا لالة عناية دخلات عندك وانا نرجع ...مبغيتش نقلقكم .. معندك لاش تشغل بالك بولاد واحد خلا وراه العجاجة
السلطان: عناية فجناحي أنا ...أنا كنت مع شي ناس...المهم ما علينا الا كان الجناح هو السبب غادي نهضر مع لالة فخيتة تبدلو ليك ..أنا كندير هادشي بلا مزية ... شكون غادي يهزهم الا سمحت فيكم
جورية: بلاش امولاي هاد الجناح وراه بزاف عليا أنا او ولادي...الله يكثر خيرك للي مزال مجلسنا معاك ...بلاش متشغل لالة فخيتة بالخوا الخاوي
السلطان: اخر مرة نسمع هاد الكلام...و زايدون مغادي نشغل حد ...جناح علي القديم للي حدايا كبير و مفوه و الشمس ساكنة فيه غادي نقول ليهم يوجدوه ليك وبلاما تعتارضي وجدي راسك
(حتى خرج هاد الكلام من فمو و هو يحس بالغيرة ..ندم لاش عطاها جناح علي )
#يتبع