(كانت زهور جاية هي و ولادها لجناحها وكون ما دهاتهاش واحد الوصيفة بالكلام كون حصلات زنوبة كتختل فين تحط المكتوب..مع دخلات بان ليها المرسول فوق الفراش ..هزاتو وبدات تقراه)
" مكاين ما نخبي عليك أ زينة البنات ..عيونك داو عقلي و عدت نفكر غير فيك ...شحال تمنيتك نتي أم ولادي ..وليني مكتابش بالحق لقبلات عليا شهدة العيون مزال الحال ندركو ما فات ..باغي نقول ليك شي كلام مكرهتش نتلاقاو قبل العاصر بعيد على العيون ف جنان الزيتون ونسمع الجواب من فمك "
(طارت زهور من مكانها و بدات تلبس وتقاد ما قاداها فرحة خلات ولادها مع الخادم و خرجات تسلت من القصر )
(وفجنان الزيتون للي مالف كيكون فيه ولد هاشم كيف العادة كان جالس فوق زربية مسرح رجليه و قدامو صينية أتاي حتى جات قدامو حمامة هازة مرسول جبدو وبدا يقراه )
" بغيت نتلاقاو فجنان الزيتون عندي معاك شي كلام أ ولد هاشم "
(مجا فين يكمل حتى وقفات عليه كيف قباط الرواح
فهاد الوقيتة السلطان وصلو مرسول فحمامة حتى هو دخلات من شرفة جناحو )
" السلطان لي حاسب راسو نزق و مطور و كيلعب ببنات الناس لَعْب وعلى صباعو العويتقات كيف الخاتم كيدوّر ..نسا بللي عندو ختو وحتى هي دايرها واحد اخر جارية عندو تمشي وتجي مللي يطلبها ...و البرهان على كلامي نوض دابا لجنان الزيتون غادي تلقاهم بجوج عايشين الغرام فالحرام وكيكيلو الذنوب بالعرام.."
مزال ما كمل المكتوب طار كيف العجاجة ركب على عودو و قصد الجنان ..
(جورية كانت حاضية هادشي من شرفة جناحها ..تنهدات و قالت فخاطرها دابا عاد بدا اللعب
مشات تجلس مع السلطانة فالمنزه ديال الحريم ...لقاتها جالسة و معاها رحمة )
جورية: شحال زينة جماعتكم أ مولاتي لهلا يخيطكم علينا نتوما بركة القصر
رحمة : الله يرضي عليك أ بنتي ...قربي جلسي معانا
فاخيتة: سبحان مبدل الحوال واش هادي رحمة للي كتهضر ولا ودنيا صماكو عليا..عاودي عاودي شنو قلتي
رحمة: راك غير غالطة فيا ..قلبي بيض غير الله يطفي الغضب ..حرقتي على موت ولدي قصحات كبدتي..مللي ولليت نشوف وليداتو..قلت ولدي ما ماتش ندير الخير فتريكتو
فاخيتة: ايوا الله يحنن القلوب ..العجب ياكما اللسان عسل والقلب كحل
رحمة: لاواه ..الغفور الرحيم نساو ما فات و البركة فالجايات
جورية: مولاتي واخا نشوف المنزه شوية عجبني وبغيت نتسارا فيه (غمزات رحمة باش تهضر على موضوعهم)
فاخيتة: خودي راحتك أ بنيتي
رحمة: وشحال زينة ومسرارة ومصوابة هاد الطفلة ...و كرشها ولادة ...دابا هادي كون بقا ولدي حي غادا تغرقو تريكة ..تولد غير بالتوام.. تبارك الله حملات من نهارها
شوفي زهر مولاي عثمان ..كون غير طاح فشي وحدة بحالها تولد ليه التريكة..فراسك العيالات لي تلاقيتهم ..سوا عند الذهايبي سوا تجار الثواب يخطبوها مني هبلهم زينها..
فاخيتة : اش داك للسلطان أ رحمة خليك غا فمرت ولدك..على فين شافوها باش يعرفوها زينة ولا خايبة..ونتي لبغيتي هاد المرة شي حاجة عودي طلبي ماليها هوما يجيوك للقصر ماشي تخرجي تبرحي بزين البنت باغا تزوجيها وتهناي منها بلا وقت قولي
رحمة:( بقات دور فعينيها)أ ...أ..آه ..معرفتش فين شافوها كون راه من نهار جات لقدام الجامع فموت وليدي شاعت خبارها بين الفام..المهم أنا للي عجبني فيها حزامها دغيا كيعمر ..و كااااانت مرات ولدي ..دابا لجاها رزقها الله يسهل عليها
فاخيتة: ايوا العجب كيف وليتي تهضري عليها ...سكتي راها جايا..تقول جالسين نمنمو فيها ..نخليكم أنا عندي ما يتقضا
(الطريق للي دازت منها السلطانة ولات تسمع فيها اسم جورية ..مرة سمعات الخدم كيمدحو زينها وضرافتها ويقولو كون غير كانت هي السلطانة...مرة تسمع الجواري يقولو ما كاين ما حسن منها تولد للسلطان بالتوام ...المهم كلامهم ولا كيضور ليل ونهار فدماغ السلطانة )
جورية: أمضرا
رحمة: كوني هانيا قلت داكشي للي تافقنا عليه
جورية: وباش جاوباتك
رحمة: راها كترطاب بشوية بشوية ..
جورية: هي نشربو عليها شي كويس أتاي
رحمة: هي للي ما تعاود أ مرات ولدي
جورية: شنو
رحمة: أ مرات السلطان هههههه....شهاد الغوت
جورية:( حطات الكاس من يديها وهزات حليوة)..وحنا مالنا
رحمة: لاواه ..نوض نشوف شكاين ݣالاك
#يتبع
الحيلة خير من العار و للي بغا حاجتو يحفر عليها فالغار
أنت تقرأ
رياض الباهيات
Fiksi Sejarahسلطان عطاتو يامو كيشالي بكمامو مرة يعدل مرة يجور ...بهوا ذرة العواتق عاد سقيم سارح فمواج البحور
