رياض الباهيات

رياض الباهيات 🤍 الجزء 39

هاشم: مفهمتش ...كفاش ..فين ولاد السلطان
جورية: سلطانك مللي أمرهم يسدو رياض الباهيات ورجالو ذبحو النسا ..وسط دوك النسا راه قتل خالتي للي بنتها نتاقمات منو بولادو ..واحد مات او واحد غير جا من جيهتو مولانا
هاشم: مولاي ماعندو علاقة بالرياض ..وهادوك رجال ماشي من رجالنا
جورية: اذن هضرتي بصح هادوك رجال السلطانة فخيتة
هاشم: وباش عرفتي نتي
جورية: والو ...واخة نهضر مكينش لي يتيقني
هاشم: واش نتي لي سرقتي كتوب علي ياك ؟ و عرفتي لي فيهم
جورية: إنا كتوب كتهضر عليهم ...معارفة كتوب
هاشم : غير دوي عليك لامان ..قبل منك قريت لي فيهم و عرفت سرار السلطانة ...ونهار كان مولاي غادي يعرف تسرقو الكتوبة و ضاع من يدي الدليل وانا نسكت
رجعي معايا القصر و نديرو اليد فاليد ..نفكو الناس من شر ديك العقروشة .. و أنا معاك او ورا ظهرك ..متنسايش راك وليتي سلطانة و أم ولي العهد دابة
جورية: واش مو عرفات بللي السلطان كاين لي يخلفو
هاشم: القصر كلو صايق الخبار ومقلوب سفاه على علاه ..هي مللي عرفات السلطان تزوجك ولات تقول ليهم جيبو ليا مرات ولدي فينما كانت ...عنداك تجرا بيها شي حاجة
جورية: هادي فكرشها العجينة و ظاهر ليا ناوية على خزيت..حيت آخر هضرة دارت بيناتنا بينات فيها على مَعْدَنها
هاشم : متخافي من والو ..عرفي كفاش تكسبي قلب السلطان و كلشي غادي يكون لصالحك
(دوز هاشم جورية او ولدها لدار ولدو غسلات حالتها و لبسات و تقادات عاد دوزهم للقصر واخة ما كانت عندها ݣانة وليني بزز منها خاصها تشد فراسها باش ترجع حق ولدها و تنتاقم من للي كان سباب ...مللي دخلو القصر كلشي كان فرحان حيت كانت عزيزة عليهم جورية للي ديما كانت كتعاونهم فالسر و دور معاهم و فرحو كثر بولد السلطان ...الا خناتة للي شر الدنيا كلو تجمع فعينيها ودايرة راسها فرحانة ..)
خناتة: مرحبا بمرت ولدي ...القصر نور ...سيري مع الوصيفات لجناح مولاي و عطيني الولاد نشبع منهم...ريحة الغالي هادو...فين التويمي لاخر؟
جورية: ولدي ميفرقش يدي ...و كنظن مولاي مشتاق لولدو كثر منك (زادت وخلات هضرتها واحلة ليها)
مللي وصلات جورية لقدام جناح السلطان ترددات باش تدخل و قلبها بدا كيزدح زعّمها غير هاشم .. ملي دخلات مدات للسلطان عثمان ولدو وهي مكتشوفش فعينيه
السلطان: (عنقو وباسو وهو كيقلب بعينيه على الولد لاخر) فين الولد لاخر أ هاشم
هاشم: مولاي عظم الله الاجر ف مولاي مراد
السلطان: كفاش و امتى؟ هز لجورية راسها تشوف فيه
جورية: عاودات ليه ما جرا وليني مدخلاتش مو فالهضرة
السلطان: هضرة فهمها وهضرة لا ..آخرو عنق ولدو و مشا باش يعنقها هي وهي تصدو
جورية: (كتهضر حادرة راسها) ولدك ها هو .. أنا حسبني هنا غير وصيفة مقابلاه ..متقرب مني منقرب جيهتك..بغيتي تعنق راه الجواري عطاهم الله
السلطان:( سرط كلامها بزز) ...غادي نعذرك هاد المرة على مضاوة لسانك غير بسباب ما داز عليك ..و بسباب دوك العينين لي...( مجا فين يكمل كلامو سدات ليه فمو بيديها )
جورية: بغيتي نبقا فقصرك ...خليني فجناحك معاك هنا ...حيت هاد القصر عامر قتالة( (وشوشات) واخة نتا هو رأس الحربة الكبير ..) نخاف على ولدي و راسي
السلطان: شنو وشوشتي مسمعتكش مزيان ...معاك أنا وغادا تخافي .. ديري للي غادا تريحك ..المهم يصفا خاطرك من جيهتي..غير أمري ونهي نتي هي سلطانة هاد القصر دابا
(جلس وهو متحسر على موت ولدو وبقا فيه الحال بزاف)
جورية: للي بغيتها نقدر نديرها
السلطان: اه غير أمري
جورية: بغيت نخوي القصر من الجواري ...
السلطان: جاتك ...وشنو تاني
جورية: بغيت رحمة تخرج من الحبس لي دخلاتها ليه السلطانة
السلطان: جاتك ...اللهم تخرج بخباري ولا تهربيها كيف هربتي عناية
جورية: (دورات عينيها منو مللي شافتو كيقرب جيهتها ) وبغيت نتا تبقا فداك البلاصة و أنا هنا ..
السلطان: واخة أ لالة ..السمع والطاعة
السلطان كيحاول ينسيها شوية من للي داز عليها فداك الرياض واخة حتى هو حزين على ما جرى...و حيت من ديك الليلة للي دوز معاها مقدر يحيدها من بالو كان حبها تسلل لقلبو بلاما يحس .. وحتى ايام جلوسها فالقصر بعد موت علي خلاتو تعلق بيها واخا مكانش عارفها هي نفس المرا لي كان كيحلم بيها ويرسمها ليل ونهار ..السلطان كلو ولا باغيها غير ترضا عليه و تبغيه وتبادلو نفس الحب ..خصوصا مللي هي لي خلاتو يولي اب و حقات ليه حلمو زاد تعلق بيها كثر حيت رجعاتو راجل و هزات بيه و سقطات عليه تهمة مكيولدش ...هي الوحيدة لي خلاتو يعرف شنو هي يكون أب ..كانو جميع الأحاسيس مخلطين عليه ديك الساعة ..حزن على فراق واحد من ولادو ...و فرحة بسباب أنو ولا أب ...و ندم على داكشي لي دار لجورية..و حيرة ..كيفاش غادي يرجع تيقتها فيه و يخليها تبغيه كيف كيبغيها ..وكيفاش يقربها منو وينسيها ما داز

دازت ايام هادئة فالقصر ..ذاك الهدوء للي كيخلع ...كينبأ بللي شي عاصفة جايا فالطريق ...خصوصا أن السلطانة فخيتة تقبلات جورية تكون مرات ولدها ..
هاشم كان ديما مراقب فخيتة لي كانت حاضية سواريها وأي خبار كيتقاسمها مع جورية على الله يلقاو منين يشدوها
فواحد الليلة كانت الشتا خيط من السما ..جورية كانت ناعسة او ولدها بين يديها ...
#يتبع