رياض الباهيات

رياض الباهيات 🤍 الجزء 8

وصل الليل ودلى خواميه كتلمع بالنجوم الصافية..الجو كان جميل..ريح خفيفة كتميّل وراق الشجر ..الحس مقطوع كيتسمعو غير خطاوي حليمة لي شدات من يد جورية وخرجاتها من الباب الوراني للرياض حسي مسي ...غا فاتو العتبة بداو يخفو الرجل باش يتلاقاو بسيد التهامي للي كانت مشات عندو وطلباتو يعاونها  لبغاها تزوج بيه
حليمة:خفي رجليك جري راه لحصلنا يغبرو ليك الشقف....ها حنا قربنا أ بنيتي ....هاااااه ها  سيد التهامي
التهامي: ياكما شافكم شي حد .. زيدو بالخف نحيدو من هنا
حليمة:  لاواه  أنا عكوبتي لمكاني .. هادي أمانة عندك حسن بيها راها  يتيمة  حطها فموضع مأمن
جورية: (كتهضر وهي سخفانة من الجرا)عمر خيرك أ لالة حليمة ما نساه عتقتي جوج رواح ربي يرزقك الجنة ونعايمها
التهامي: ولا عاقو بيك ..نخاف عليك من الكفرة بالله
حليمة: ما عمرهم يشكو فيا حيت عارفيني ما كنت نحملها.. ومتنساش راني الحمامة للي كتبيض ليهم الذهب ...نتسناك غدا باش نوفي بوعدي كي وفيتي نتا  ...ودابا تحركو من هنا ..ربي معاك أ بنيتي ..هاكي هاد الخلخال بقاي تفكريني بيه ولا تحزيتي بيعيه
جورية:دعي معايا أ لالة حليمة ..تهلاي فراسك (عنقاتها وكل واحد عطا بالراس لطريقو)
********
فكروسة التهامي لي كانو جارينها جوج خيول كانت جورية شادة من كرشها وكتمعن فخاتم فيديها قطع تفكيرها صوت التهامي
التهامي: سمعي أبنتي لبغيتي تعيشي ما بقا ليك هانية مهنية سرك دفنيه وراك فرياض الباهيات من اليوم نتي وحدا خرا وبدلي حتى ديك السمية واياك تجبدي لشي حد ما داز عليك وبللي دزتي على يدين الحمانية ولا راك حاملة ...الدار للي غادي نديك ليها مولاها باغي يتزوج المرا الثانية وبغيها تحمل ليه من الشهر اللول...تمسكني حتى تمكني راه يعيشك فوق كفوف الراحة وسرنا يبقا بينا
جورية: غاتبقا سميتي جورية باش عمري نسا للي سماتني بيها وهادشي لي كطلب مني منقدرش نديرو ..واش نلبق لراجل ماليه دنب كرش من الحرام وهو عاشق ومتمني الذرية الصالحة
التهامي: لوكان تعرفي شنو دوز على البنات لي بحالك كاعما يبقا فيك ... وهو سبابي تا تبليت بلالة ومالي او وليت دايع نجمع فالعواتق ونوقف بيهم فبيبان الديور الكبار ...سمعيني الوزير باغي الولاد ونتي غادا تولدي ليه باش غيعرف راه ماشي ولدو ..لبغيتي العز أنا جبتو لبين يديك ولا ولفتي عيشة القهرة والدل رجعي للرياض راه رحم ليك من الزنقة
جورية : ولا شاف الوشام لي ففخضي لي وشمني بيه مسعود...ومنكذبش عليك بعد للي جرا ليا عفت الرجال ولا يقرب مني شي ولد المرا
التهامي: شدي هاد العشوب ...فينما يجي عندك يلقاك ديراهم ليه فأتاي وراه غادي ينعس وفالصباح متلي عليه باش يتيق راه وقع لي وقع بيناتكم ..نعسي شوية بيدما وصلنا
جورية: توب على هاد الطريق أ سيد التهامي باينا فيك قلبك بيض ..متخليش الدنيا تغرك راها قصيرة و اخرتنا شبر وربعة الصبعان...واش كتافك متقالوش بذنوب العواتق..راه الظلم صعيب .. كبرت يتيمة و فقلة الشي وليني العفة راس مالي وكان يتضرب بيا المثل ..شوف باطل راجل مي فين وصلني .. ملي مخليتوش يتكرفص عليا قال لمي بنتك زايغة و فاسدة و شوهني فالقبيلة بللي أنا كنتمحكك عليه ...و أخرتو  شد طريق بعيدة  ما يعرفني فيها لا حنين لا رحيم باعني للرياض و حرش مي عليا قاليها بنتك خرجات ليها نيشان لتقولي ظلمتها وخلاها تكرهني وتسخط عليا ...وبسبابو كليت العصا و تذليت و تكرفصو عليا و هزيت كرش من الحرام واش هذا ماشي ظلم واش هذا غادا تخرج ليه طريفة ...خايفة عليك من باب دعاوي المظاليم لي ما عليه بواب ........
**************
قدام واحد الرياض ما ليه مثيل وقفات كروسة التهامي وخرجات عندهم الخديمة دخلاتهم حيت كان موصيها الوزير علي عليهم
الخديمة: مرحبا بيكم مرحبا بلالة مراة سيدي... مولاي ما كاينش مشا يجيب العدول ...عطاتها الحليب والتمر وداوها يوجدوها ويغسلو ليها وهي تحبسهم فباب الحمام...دخلات كمدات عضيماتها ونسات راسها ملي ستحلات السخون حتى دقو عليها لبسوها وعطروها ...طلعات كتحمق

الشعر حرير مدلي على الكتاف مزينو خيط الريح , الرقبة بقات تبياض حتى بياضها ولا يشع فنظر للي شاف و ما سمّا، و الكحل فالعيون الزيتية الدباحة للي تخلي الكافر يسلم ،ظل شفارها طايح على الخدود المزنكة بعكر الحشمة لي تهلك الذات  ..أما الفم مرسوم خويتم كيبري مدهون بالعسل قطرة منو تشعل العوافي فالجوف ...تبسيمتها حكاية تسحر العقول و عطرها الفواح خلاها تاج الباهيات وميزها عن باقي البنات

الخديمة زنوبة: العاشقين فالنبي صليو عليه ... تبارك الله عليك أ لالة بلارة شافتك عيونا بالرحمة مولاي عرف أش يختار ..عود يعمي العين للي شافتك وما صلات على النبي
(جورية تبسمات ليها وهي ما عالم بيها غير لي خلقها كطلب هاد النهار يدوز على خير)
وصلوها عند الوزير للي غير شافها تلف وداخ سلبات ليه العقل بزينها الفتان كتبو الكتاب وبقاو ناشطين حتى ودنات المغرب.. مشاو وخلاوهم الراس فالراس
علي: تبارك الله على التهامي وخلاص عرف يختار ..(قرب جيهتها وهي تبعد) مالكي واش خايفة مني..هز ليها وجها وقالها شوفي فيا زادتك الحشمة سر و بها..
جورية: لا ...مولاي تقدر تقولهم يوجدو لينا كاس دأتاي
علي: أتاي فهاد الليل ..يطير ليك النعاس
جورية: داكشي لي بغينا غير نباتو سهرانين حتى يصبح الصباح..كويس أتاي كايقاد المجاج ويحلي السهر حتى يطلع الفجر
علي: هههه أييه أ لالة ما قلتي عيب هادي عجباتني عندك
أمر الخدم يدخلو ليهم الصينية وهي تلاهيه بكلامها الحلو حتى دارت العشوب فالبراد..حيت مالقات منو هروب ...بقاو كيتسامرو حتى داه النعاس ناضت حيدات ليه حوايجو و نقصات حوايجها وجرحات صبع من رجليها قطرات دمو على الفراش وحوايجها وتخشات حداه ...باتت الليل كامل كتفكر فالصباح وللي غادي يوقع فيه أنبها ضميرها وليني ملقات جهد توقف على رجليها ويحن الله من بعد

#يتبع

وعدي يا المكحل سعدي ..خرجت من حفرة ،طحت فبير