الجزء 16
خرج وقلت لازم هكدا مانضمنش واصلا مانيش حاباتو يمسني .شوي دخلت عجوزتي قاتلي ساقطة لميناك وجبناك لعندنا وفلخر تتشرطي .استغربت وشبيها هادي تحولت ضربة وحدا .قلتلها راني قلت لوليدك الثقة فالوثية .قاتلي مالا وجدي روحك تدخل عليك ضرتك هاد ليام قلتلها ربي يسهل عليكم .رتاحت واخيرا .نحيت لاغوب ومسحت ماكياج ومشطت شعري وحكمت بلاصتي نرقد ماجانيش نوم بالاك كيبدلت لبلاصة بقيت فاطنا لفجر نضت توضيت وصليت ودعيت ربي ادا والديا مارماونيش وخطفوني منهم فيااارب رجعني ليهم راني محتاجتهم يوميا نفس الدعاء .حتا رقدت على سجادة وانا نبكي نضت صباح مكسرة .لبست وخرجت رحت للكوزينة لقيت عجوزتي وبنتها يفطرو فطرت معاهم وهوما يشنفو كلمة ماقالوهاش وخرجو لصالون شوي سمعت صوت عجوزتي تهدر بصوت اييه زوجناه بصح ببنت لحرام .تقلبت حالي وخرجت لعندها اسمعي اعرفي واش تهدري ادا جبتيني هما باه دليني انا برجلي نخرج من هادي دار .قاتلي واقيلا والفتي زنق طالعا هابطا فيهم .جاء رشيد قال يما نقصي صوتك راهو برا يتسمع .قاتلو شوف مرتك واش تهدر وحكاتلو .قالها منا على شهر نعرف نربيها .قتلو متربية حمدلله .قالي كون جيتي متربية تعرفي واجباتك .قتلو شرطي وقولتو ومشيت لشمبرة وسكرت الباب ونسمع فيهم يعيطو كل السب والشتم وجهوها ليا .اااه يابابا علاه طيشتني هنا مع هادو العباد المنافقين .بعد سمانة مع لعشية ماصبت حتا واحد فدار يكونو خرجو رحت للكوزينة لقيت بقلاوة كليت حتا شبعت ورحت قعدت فصالو شوي سمعت حسهم مالا جاو دخلو لصالو قعدو وبدات عجوزتي تقول ماشاء الله على عروستي زين ولاطاي وبنت أصل قال رشيد ايه عجبتني بزااف .انا مافهمتش قلتلها انا .قاتلي واش جاب عروستي ليرحت خطبتها ليك نتي .اااا درك فهمت راحو خطبولو .قتلو مبروك عليك ورحت لشومبرة حسباتلو رايحا نغير انا بالعكس ماعندي حتا شعور اتجاهو تقول عمود واقف قدامي مايهمنيش غرام واحد .عدت كل يوم نوض نخدم شغالاتي ونرجع لشمبرتي وحد نهار دخل رشيد لعندي قتلو على الاقل طبطب قالي نتي مرتي وهادي بيتي مانطبطبش قتلو واش جابك خير .قالي خير حابك تخرجي من شومبرة .علاه .كيفاه علاه باينا غدوا رايح نجيب مرتي معناها ضرتك .قتلو ااا ضرتي مالا غدوا تجي .اوك مايكون غير خاطرك روح نتا ريح لانو غدوا راك عريس وانا نفرغ لخزانة من حوايجي ونبدلك لفراش نخليهالك شومبرة تهبل تاع عرسان ماتخممش فيها .قالي مزية ماراكيش تعبي فيا وتاخدي راي وخرج بقيت نضحك حسباتلو ناخدلو راي وانا ماحابا منو يقربلي ماحابا انا وهو نعقدو يطلقني ونتهنى بصح مانرجعش لدارنا نروح لولاية خلاف ونخدم ونعيش وحدي.
أنت تقرأ
رهينة أمير الفصل الأول
Ficción Generalهيا بطلة عاشت صغرها محقورة من والديها وكانت تشوف بعينها كيفاه كانو يفرقو بينها وبين والديها حتا كبرت وقررت تقرا علم نفس غير باه نفهم علاه يعاملوها بهاديك الطريقة لكن القدر جمعها مع انسان متسلط وسادي لكن حبو ليها كان صادق وجميل بعد خبايا كثيرة وغموض...
