الحلقة 27
#بقلم_لينا
بعد ماغرقت لمخدة بدموعي رقدت بلا مانفيق مافقت غير بيد تمشي على شعري نضت مخلوعة لقيتو أمير متكسل قدامي ماتخافيش هادا انا .شحال ساعة راهي 3 تاع صباح .قتلو مالا تصبح بخير ودرت على جنبي التاني .قالي ترقدي وتخليني .ايه كما خرجت وخليتني .امممم يعني راكي تخلفي فيها . افهمها كما حبيت .ريان نوضي لازم نحكيو .في واش .على لهدرة ليقولتيها قبيل .قتلو خلاص ماكلاه نحكو فيها .والله أمنتك حبيبي نوضي برك .كيقالي حبيبي عجبتني قتلو شكون حبيبتك.نتي يالقمرة هيا نوضي بركايك دلال نضت تقعدت حكم يدي وقالي احكيلي كلشي راني نسمع .حكيتلو بلي شرطت عليه وكيفاه زاد تزوج وكيفاه فقتلو بلي يدروغي وحتا كيفاه حاوزني وطلقني .شفت معاه لقيتو الفرحة باينا على وجهو قالي من نهار سمعت بلي تزوجتي وانا نار تاكل فيا من داخل دايما كنت نسخايل تكوني بين يديه .لا كون هاني جامي صرات بيناتنا حاجا . الحمدلله ياربي .تمنيت ودعيت كوني ملكي وحدي وربي استجاب .تم لقيتو بدا يقرب مني بشوي حاب يبوسني كيقرب لشواربي حبستو قتلو قبل ماتقرب ليا لازم نعاودو شروط من جديد .وقالي واش من طشرط درك وانا ديخان من ريحتك .أمير نهدر صح .اوك ياسيدي درك نحكيو فيها واش شروطك .قتلو خليني نكمل وماتقاطعنيش .اوك اهدري برك .شرطي اني نخدم ونتا تعرف حلمي طبيبة نفسانية .وتاني عمرك ولا تقاطعني من دارنا .وشرطي تالت تبقى عمرك ككامل تحبني .قالي اوك قابل بصح الخدمة بعد 6 شهور نحكيو فيها ماش درك بصح نوعدك نخليك تخدمي .مالا هادي هيا .شاف معايا وقالي وشروطي .هنا تفكرت كلامو هاداك الوقت كيقالي كينحب نتزوج بتانيا تقبلي ونتي ساكتا تبدل وجهي تقلقت شاف معايا وقالي هاداك شرط تاع نعاود زواج باه نخوفك برك ماكانش منها قتلو صح .ايه ماتخافيش وماتقلبيش وجهك موحال نتزوج عليك .انا المهم تحبيني وتقادريني وحتا تحتارمي دارنا ونوعدك عامين نخرجو نسكنو وحدنا بصح حاب نعيش في دار والديا عامين لولين قتلو ماعنديش مشكل.نسقسيك ريان وجاوبيني بصراحة .ايه .مازلتي تخافي مني .جاوبتو لا فالاول صح كنت نخاف غير من شوفتك ومبعد كيخليتني نحس بالامان راح الخوف بصح رجع نهار رجعت وبدات نهار لخر بيناتنا ودرك لالا غير تعاملني مليح يروح الخوف .شوفي ريان انا هدرت مع فاتح قتلو شوفلي طفلة متربية من جيهتك نتزوج ونستقر قللي ايه ماش مشكل نشوفلك نسيبتي وفات وقت حتا شفتك قاعدا وتبكي شردت معاك صح عجبوني دموعك عينيك البريق تاعهم وصل لعندي بقيت نقول مع روحي وشكون بكاها واش مشكل ايعندها حتا طلعتي راسك بقيتي تشوفي فيا ودورتي وجهك عرفتك حشمتي بقيت تم في هاديك لبلاصة خفت يطيح ليل ونتي وحدك عرفتك تسناي في كاش حد .كنت نهدر مع سيد لحت عيني ليك لقيتك تشوفي جيهتي وجاء باباك داك من تم زدت شفتك واقفا مع فاتح قلت منين يعرفو بعض سقسيتو قالي نسيبتي وحكالي واش تخدمي هاداك نهار قلت هادي طفلة مانفرطش فيها حتا عدت نلقاك تروحي تتغداي عاندتك وحبيت نشوفك نهدر معاك نتعرف عليك بصح رفضتي وزدتيني هاداك لكلام القاسي وعرفت روحي غلطت بكلامي عليها كان ردها هكدا بصح قلت لازم نحصرها عندي بأي طريقة ورحت لباباك حكيت معاه وقبل وجيت وبقيت شغل نهدد فيك باه نحكمك عندي وتبقاي تخافيني وهكدا وجاني فاتح قالي طفلة ماش حاباتك بطل عليها نتا خير. هنا جن جنوني قلت غير هيا لينديها جيت هدرت معاك ومديتلك اقتراحات ورفضتيهم مالقيت اي طريقة من غير هاداك لكلام .ومبعد تعرفي واش صرا .قتلو نتا ماعرفتش برك تتعامل معايا كون عاملتني مليح وتأدبت في كلامك كون ماوصلناش للتهديدات ا.قالي ايه عندك حق بصح درك جاوبيني ريان تحبيني .سكت زمان وقتلو كيبعدت عليا وبدات هاد الفترة عرفت مشاعري وبواش نحس ايه نحبك وهبطت راسي طلعلي راسي بصبعو وقالي نوعدك نخليك اسعد وحدا فالكون ومايخصك والو معايا قتلو وربي يخليك ليا انشاءالله.قرب ليا وباسني وحضني وعطاني كل الحنانة طيرت معاه نساني في كلشي . غير كمل قالي كلشي مبروك والفرحة عامرا وجهو .عشنا أحلى ليلة في عمرنا وعمرنا ماننساها .
أنت تقرأ
رهينة أمير الفصل الأول
Fiksi Umumهيا بطلة عاشت صغرها محقورة من والديها وكانت تشوف بعينها كيفاه كانو يفرقو بينها وبين والديها حتا كبرت وقررت تقرا علم نفس غير باه نفهم علاه يعاملوها بهاديك الطريقة لكن القدر جمعها مع انسان متسلط وسادي لكن حبو ليها كان صادق وجميل بعد خبايا كثيرة وغموض...
