رهينة أمير الفصل الأول

الجزء 25

الحلقة 25
بعد ماقال بلي امير هو ليحاب يرجعني وقفت ماش مصدقة وتفاجأت .قتلو هدر معاك .قالي ايه عندو سمانة وهو يجي ويروح ويعاود يجي وكل مرة يجيب معاه واحد مرة باباه مرة خاوتو مرة الامام وانا بعد مافكرت مليح قلت هادا الانسان ماغلطش معاك من غير سمع واش قالو ناس فسخ كلش وطلقك يعني ماعشتي معاه ماضرك وسامع عليه كل خير  يعني متأكد رايحا تعيشي معاه هانيا .المعنى بابا .قالي المعنى تروحي ترجعي ليه وتكوني مرتو على سنة الله ورسوله تعاودو كلش من جديد وديرو عرس وربي يهنيكم .بابا بصح انا مانيش قابلا نرجعلو .ريان بعد كلمتي ماكانش كلمتك قلت قابل يعني قابل خلاص .دخلت ماما وموراها لبنات قاتلي .هادا امير مادام رجع يعني ناوي على الخير روحي تزوجي بركاي من دلال وهو عندو كل خير على الاقل نستفادو منك شوي .شفت ليال تبتسم بصح صفاء شر يطير من عينيها ماعجبهاش الحال او بالأحرى ماعجبهاش اني نتزوج بأمير بدات .درت لبابا وقتلو خمم غير هاد ليلة وغدوا قولي رايك الأخير بصح حط في بالك انا مانيش راضيا وخرجت ودخلت لبيتي قعدت نخمم قلت انا نقول وين راه مابانش وهو يوميا يجي عند بابا يهدر معاه باه يرجعني نتزوج بيه واش ناوي يا أمير ياربي ادا قبل بابا بهادا زواج معناها رايحا نرجع لنقطة صفر نرجع نخمم في حياتي المجهولة معاه مانعرف ادا يحبني ولا يكرهني جامي هدرلي على الحب ولا مشاعرو كل كلامو على الغزل برك .هزيت تيليفون عيطت لعبير وحكيتلها قاتلي  ماقالش لفاتح كون قالو كون جاء هدرلي صح عرفت بلي رجع من صحراء وماحبيتش نخبرك بصح ماخممتش انو يرجع يطلبك من جديد .شوفي ريان بابا وتعرفيه ماعندك حتا حل من غير تهزي يدك لربي وتدعي .قلتلها عندك حق كوبات ورحت توضيت وصليت الإستخارة ودعيت ورقدت .نضت صباح ليوم جمعة مانخدمش بقيت متكسلة في بلاصتي ماقدرتش حتا نخرج من بيتي على 11 سمعت صوت بابا يعيط عليا خرجت عندو .انعم بابا .قالي ريان وجدي روحك غدوا الفاتحة تاعك .بصح بابا .خلاص ريان كلمة ماتزيديهاش فوق كلمتي .غدوا من داك وجدت روحي دخلو نسا جات غير يماه ومرت باباه حطولي الخاتم وهزو الفاتحة ورجعت مرت أمير من جديد بصح ماشفتو ماعيط مابعت ميساج ياااادرا واش ناوي بعد هادا الجاست فاتو ايام رجعت نجهز واكيد أمير دفع شرط من جديد نخرجو انا  وعبير حتا مرات تخرج ليال معانا  بصح صفاء كون تصيب الموت تديني .وصل نهار العقد واخيرا نشوفو اليوم .رحت وانا بكل أناقتي وصلنا للبلدية استقبلنا باباه وخوه  دخلنا بقيت نسنى غير وقتاه يطل عليا امير حابا نشوفو .دخلنا للبيرو بقينا نسناو فيه طول بزااف قلت بالاك تراجع وندم .بصح واخيرا جاء ودخل وفرح قلبي قبل وجهي كما عادتو يدخل بكل ثقة لاح سلام بصح ماشافش معايا كامل مضينا على العقد وهو قال عندي خدمة وراح بكل برود سمطلي نهاري كيدار هكدا بصح متأكدة هاد تصرفات مايخرجوش على خير رجعنا لدار وفاتو ليام بعتلي نفس لاغوب بلونش ليقستها هاداك الوقت  ليال قاستها وتتصور بيها وصل نهار الحنة جاو حناولي بالقدر والقيمة وراحو شعوري مازال مخلط بين الخوف والفرحة خايفا من أمير من هادو تصرفات الباردة معايا ليماعبرنيش مامبا بكلمة وحدا بصح تعيا وتبان ونعرف علاه .غير كمل كلشي حكمت بلاصتي جات عبير عندي قاتلي علاباك راني مرتاحة لهاد زواج .قلتلها بصح ماهدرش معايا كامل .بالاك حاشم منك ولا حاجا نتي خلي إيمانك قوي وماتدري بالاك هادا هو الانسان ليعوضك على كلشي .انشاءالله .قاتلي اصلا باين يحبك وناوي على الخير .قلتلها واش يضمنلك .فاتح قالي راهو سمانة كامل مقلب الحالا بلغنا وشطيح في دارهم كل يوم سهرة ولمات .راكي تقوليلي راهو فرحان برك عابس وجهو عليا .ايه هادا ماكان سور اسمعي ريان  غدوا اول ليلة معاه حاولي تحسسيه انو هو اول انسان في حياتك .قلتلها ايه هو اول انسان في حياتي .بصح كنتي متزوجة قبلو أمير ماراحش يلقاك كما خلاك ماكيش فيارج وهادا شي رايح يقلقو .عبير انا رشيد عمرو لا مسني ولا شاف لحمي انا مازلني فيارج .تصدمت كيقولتلها هكدا حكيتلها كلش وقاتلي نستعرف بيك ياختي راكي فحلة مالا غدوا هيا اول ليلة ليك .مالا قوليهالو غدوا وعيشو أحلى ليلة في عمركم .انشاءالله عبير .حتا لقيت وصلني ميساج على تيليفوني  فتحت لقيتو أمير .قالي .ااااه يافاتنة قلبي كم مشاق لعينيك وشفتيك كم مشتاق لرائحتك الساحرة كم مشتاق لجمالك .اعدريني لأن كلماتي لا تكفي للتعبير عن سحرك يا قمرة عيوني .أحبك والله شاهد . وجدي روحك غدوا الكورتاج يوصل على  5 تهلاي في في روحك مرتي الغاليا .كيقريتها بقيت نسوطي  وحدي فرحانة طايرة من الفرحة خممت قلت لازم نردلو حاجا .وكتبتلو انشاءالله وربي يفرحنا .وبعتهالو قلت هكدا باه يفهم بلي راني قابلا هادا زواج .شكون كان يقول بلي يجي نهار وريان تعشق أمير ايه اكيد هادا هو الحب والعشق والغرام.