رهينة أمير الفصل الأول

الجزء 26

الحلقة 26
#بقلم الكاتبة Lina_sabrina
اليوم واخيرا عرسي انا عروسة أمير اليوم رحت للحفافة خدمتلي لاكواف لشعري ومكياتلي رجعت لدار لبست لاغوب بلونش غونفلي شوي وديلها طويل وشفت روحي فلمراية انا بروحي تسحرت من نفسي  .خرجت عروسة وعليها لكلام اي وحدا تشوفني تسمي بسم الله ماشاءالله .عبير غير تبكي بصح هاد المرة من الفرحة ليال تتصور وتضحك معايا حتا حضنتني وصفاء مازالت مشنفه وماما زاهيا مع العرس خلاص تهنات مني .انا ليوم وبكل ثقة من روحي فرحانة زاهيا .تفكرت فريد عيطتلو غير شافني هبطولو دموع قالي راني فرحان بيك فرحان لانك واخيرا هاد لحياة زهاتك وعرفتي معنى الحب .انا حشمت هبطت راسي .قالي ماتحشميش ختي هادا راجلك وحبيتيه قبل مادخلي دارو شي عادي باين  انسان يستاهل وعرف قيمتك وغلاوتك  نعرفك كون جاء العكس كون راكي عابسا وحازنا .ملا ياختي ربي يهنيك ويفرحك .حكينا شوي وكوبا دخل بابا شافني وبالاك اول مرة نشفى عليها قالي كلمة يابنتي .يابنتي ربي يفرحك ويهنيك وربي يبعتلكم يامات حلوة ويرزقكم الدرية الصالحة .نوصيك احترميه وقادريه وماتكسريش كلمتو .انشاء الله بابا وخرج .وصلت 5 ووصل الكورتاج وقلبي بدا يضرب فالألف البارود ولغنا والحس داير حالا برا طليت شوي لقيت كلشي بيض من البارود ماقدرت نشوف والو من غير الغاشي بزاااف .شوي ودخل وأخيرا شفتو وأول مرة نبتسم إبتسامة عريضة معاه حتا هو ابتسم معايا كان لابس كوسيم نوار هاد المرة هو ليسحرني قرب لعندي وقالي كون نصيب نهزك درك ونهربو بعيد مانيش قادر نصبر عليك ماخليتي فيا والو  تسحرت بيك  من نهار لول وزدتيلي ليوم شفت معاه وقتلو مانكدبش عليك حتا نتا سحرتني ليوم .ابتسم معايا وقالي وينو البرنوس استري روحك .جات عبير  لبستلي برنوس وحكمت يدو وخرجنا ركبنا طونوبيل وديمارا كان كورتاج كبير بالبارود والخيالة وصلنا لاصال دخلنا وشطحنا على اغنية رومنسية .وتصورنا وقطعنا لاطارت ولبسلي خاتم لاليونس .وقدم عندي قالي نعشيو المعاريض ونحني ونروحو لوتال .قتلو اوك وخرج .وانا كملت تصدرت بالطبع والشان وكملت سهرة جاء خرجني ورحنا لوتال .دخلنا شومبرة لقيتها مزينة بالورد والشموع والبالونات كلش بالاحمر والابيض .وكاينا طابلا فيها عشا ومكسرات ومشروبات .دار لعندي  راكي مليحة مرتاحة .ايه حمدلله .قرب ليا وحكملي يديا قالي علابالي لقاء لخر بيناتنا كان ماش مليح وكنت غالط في حقك بزااف بصح بعد هاداك نهار انا عرفت حاجا وحدا عليها ماقدرتش نزيد نقرب ليك كتر ونآديك .قتلو واش عرفت .حبيتك وعشقتك .كيسمعتها منو فرحت قلت واخيرا قالهالي .قتلو من قلبك صح تحبني .ايه ريان نحبك نحبك نحبك.حطلي يدي جيهة قلبو .وقالي هادا القلب من اول نهار شافك فيه عشقك  .كنت  نكدب على روحي ونقول مجرد نزوة وإعجاب برك بصح كوصلت اني ماقدرتش نآديك فهمت بلي حبيتك وعشقتك .قتلو بصح ولا مرة برهنتلي بلي تحبني .لالا برهنتلك نهار كنا فطونوبيل نتي برك مافهمتينيش .ريان ونتي واش تحسي من جيهتي .هبطت راسي حشمت .قالي ماعليش درك  هيا روحي دخلي بدلي وخرجي باه ندخل وراك رحت لدوش باه نحي لاغوب بصح مانقدرش حشمت بصح ماعنديش حل عيطتلو قتلو فتحلي لاغوب مانقدرش فتحهالي وانا حكمتها من جيهة صدر حسيت بيدو تقيس بضهري غمضت عينيا كلما يقيسني تقول قاسني تريسيتي .حتا قالي وشبيكي حابا ترقدي ونتي واقفا .قتلو لا برك غمضتهم تبسم باسني من كتفي وخرج دوشت ولبست ديزابيي وفوقها حجاب الصلاة وخرجت قتلو دالتك دخل مورايا  دوش وخرج كان لابس سيرفات غرونا هزينا صلاية وصلينا غير كملنا قعدنا تعشينا وحكينا على ليفات سقسيتو على برود ليكان فيه قالي خفت نغلط ونفسد كلشي قلت من الأحسن نبعد على قد مانقدر لاه مانغلطش  .حتا قالي ناويا ترقدي بحجاب تاع صلاة .لالا درك نحيه .ايه نحيه مالا .حشمت منو وقفت نحيتو غير درت لقيتو وجهو مدبال عرفت تخمامو وين قعدت وقتلو أمير حابا نقولك حاجة .ياااا قمرة أمير شحال اسمي شباب من فمك واش حابا تقولي .جيت نهدر صونا بورطابلو وصلو ميساج كيفتحو وشافو تبدل وجهو .قتلو كاش ماكاين .لالا ماكاين والو .بصح علاه تبدل وجهك هكدا .لا خدمة برك واش حابا تقوليلي .لا خلاص ماكاين والو .اهدري ريان ماتقلقينيش .علاه ديجا قلقتك .حكمني من دراعي بالقوة وعلا صوتو  كينقولك اهدري مانحبش نعاود الهدرة .خفت منو قولتلو وانا مترددة امير انا  مازلت فيارج .عقد حواجبو ونحا يدو عليا وناض وقف .كيفاه راكي فيارج ونتي كنتي متزوجة حابا تهبليني .والله عمرو ماقاسني ولا رقدنا في نفس لفراش .قالي اسمعيني مليح .ادا لاعبتها عليا راني نفيقلك .والله  راني نهدر صح .ريااان ماتكدبيش .نضت وقفت وبصوت عالي قتلك عمرو ماقاسني ادا ماش مصدقني الله لا صدقت .طلع صبعو في وجهي ردي بالك تزيدي تعلي صوتك عليا وهز مفاتحو وخرج .ايه خرج وخلاني غارقا بدموعي ندمت كيحكيتلو كون خليتو وحدو عرف الحقيقة .بصح تفرت صباح كنت فرحانة ونضحك ودرك حازنا ونبكي.