جُور السِنين!

9

...

وصل الشيخ هجرس لقبيلته ونزل من الخيل وقال بصوت عالي:  سويييلم يا فيصل تعالوا لي المجلس..

قفز راكان من على ظهر الخيل ولحق بالشيخ هجرس للخيمة..

طلعت فَجر على صوت ابوها وهمست:  يا الله سترك..

دخل الشيخ هجرس للمجلس وجاء سويلم يركض ومعه فيصل ودخلوا للمجلس:  سَم يا شيخ آمر..

الشيخ هجرس كان يدور في الخيمة كنه فاقد عقله وراكان يحاول يهديه..

عقد سويلم حواجبه وقال:  عسى ما شر يا شيخ علامك؟..

الشيخ هجرس التفت لهم وقال:  سويلم اجمع شباب القبيلة وخلهم يجوني الحين...

سويلم:  ابشر يا شيخ، مير ليه وش صاير؟

الشيخ هجرس: اجمعهم الحين يا سويلم وبعلمكم..

سويلم اومئ وطلع من الخيمة وقال فيصل: وانا يا شيخ بطلع اشوف الشباب وبنرجع كلنا..
اومئ الشيخ هجرس وهو يمشي في الخيمة بقلق..

راكان : يا شيخ توكل على الله ووكل أمرك إليه..

الشيخ هجرس:  اللهمَّ أني وكلت أمري إليك اللهمَّ إني وكلت أمري إليك...

طلّت فَجر براسها من ركن الخيمة وهي تناظر أبوها وتسمع راكان يهديه..
عقدت حواجبها بقلق على ابوها واندفعت كل الأفكار السلبية لراسها..
خافت يكون ابوها تعرض لغدر من قبيلة الشيخ ضرغام..

دخل سويلم ومعه مجموعة شباب و دخل فيصل ومعه مجموعة..

رفع راكان راسه ولمح فَجر تتنصت عليهم..

انتبهت فَجر انه يناظرها وانسحبت بسرعه داخلة للشق..

راكان خفض نظره وهو يسمع الشيخ هجرس يقول:  اسمعني انت وياه هالموضوع الي بعلمكم فيه بيبقى بيننا انا اخترتكم من خيرة شباب القبيلة...

الشباب:  تبشر يا شيخ بالي يسر خاطرك..

فيصل: حن تحت امرك يا شيخ وترباة يمينك ولك منا الي تبي..

سويلم: تحت امرك يا شيخ لو تبينا نقطع من لحمنا لجلك..

الشيخ هجرس  :  هذي الهقوة فيكم... اسمعني انت وياه... الي صار بيننا  وبين قبيلة الشيخ ضرغام فتنه كبيرة.. وبعد ما انتهت واضح ان قبيلة الشيخ ضرغام ما بتسكت وبتقعد تلحق هالموضوع لين توصل للي سبب الفتنه... والي ابيه منكم انكم تلقونه قبلهم..

سويلم:  ابشر يا شيخ نلقاهم بس شلون؟

فيصل:   وليه يا شيخ نلقاهم قبلهم؟

الشيخ هجرس اومئ وقال: حقك انت وياه تسئلوني ليه... الجواب هو ان الي سبب الفتنة هي بنتي..

اتسعت عيونهم وناظروا بعضهم بعدم فهم وقال سويلم: فَجر؟؟  وش خلها في الموضوع!

الشيخ هجرس بضيق:  ماهي فَجر ماهي فَجر...
بنتي قمر..