جُور السِنين!

35

......
جلس عسّاف خارج المغارة وهو ينتظرهم يخلصون.. مد يده وطلع خنجره من حزامه وناظره بهدوء وهو يشوف الشعرة الي ملتوية على خيط مرر اصبعه عليها وهمس: ناري ما طفت!

ناظر الوادي بصمت وهو يدخل الخنجر لحزامه مرة ثانية.

سمع صوت واحد من الرجال خلفه يقول:  يا شيخ المكان جاهز.

اومئ عسّاف ووقف وهو يدخل للمغارة وناظر الفراش صار مرتب فيها او على الأقل فيه ملامح ترتيب..

أشر لهم يطلعوا منها وطلعوا الرجال وبقى عسّاف يناظر الفراش ويناظر المكان الي كان مربوط فيه بالتحديد ولف بجسده وطلع من المغارة وهو يسحب الحجار ويبدأ يرصهم على بابها ويجيب شجر ويغطي الباب..

ونزل متوجه لفرسه والرجال من خلفه وعلى عيونهم نظرات استغراب!.

انطلق عسّاف للقبيلة بكل سرعته يسابق الريح..

ومر وقت ودخل القبيلة وشد لجام الفرس ووقفه وقفز من عليه متوجه لخيمة اخوه الشيخ ضرغام..

وعيونه حاده ووجهه مظلم...  دفع الستار ودخل وناظر اخوه الي جالسه عنده نرجس وتمسح على شعره وتتحمد له بالسلامة..

عسّاف بحده:  صحيت؟

الشيخ ضرغام رفع راسه بتعب وناظره ولا قدر يتكلم..

عسّاف بنفس الحده:  سودت وجيهنا بين العرب وفشلت قبيلتنا بين القبايل..الحين القبايل كلها ملتفه حول الشيخ هجرس.. الحين كل مصالح قبيلتنا بتروح بسبتك..

نرجس بعصبية:  عسّاف اخوك تعيب لا تسولف معه بهالشكل..

عسّاف التفت لها بحده وصرخ:  انتي اسكتي... كنتي تدرين انها بنت الشيخ هجرس؟؟؟

نرجس نزلت راسها بقهر وقالت:  لا ما كنت ادري انها بنت الشيخ هجرس.

عسّاف ناظر ضرغام وقال:  ليه؟  ليه تسود وجيهنا؟!

ضرغام بدأ يكح وفتح فمه بيتكلم لكن عسّاف رفع يده وقال:  انا اقول لك ليه.. لأنك اناني ما فكرت الا في نفسك ونسيت كل الناس الي بقبيلتك نسيت وش الي بيصيبهم لو عرف الشيخ هجرس نسيت وش الي بيجيهم لو قطعت القبايل علاقتهم معنا.. نسيت او ما اهتميت؟!... تدري ان الورعان بيموتون جوع لو انقطعت التجارة؟  تدري ان كل اهلنا وناسنا بيتضررون من هالقطعان؟؟؟  وين كان عقلك يوم خطفت بنت شيخ!

ضرغام ما قدر يتكلم ولكن عسّاف نطق بحده:  اسمعني زين يا ضرغام الحين انا الشيخ وانا الي مسؤول عن هالقبيلة وانا الي بتصرف تصرف يعيد الحياة لديرتنا ويخلي قبيلتنا ترجع لوضعها وانت ان دريت انك تخفي عني شي ثاني او انم تشتغل من ورى ظهري لأنتقامك الي ماله معنى وقتها صدقني بتشوف شي ثاني...

نرجس بحده:  و الله كبرت يا عسّاف وصوتك اعتلى على اخوك الي رباك!؟؟  اقول الشيخ ضرغام هو الشيخ ولا يمكن احد ياخذ مكانه دامك بديت تقل ادبك عليه الله يستر من تاليها..