البقعة المحرمة

Part 41 🦅 .

#البقعة_المحرمة

#الكاتبة_ساره_جعفر

-لا تنسون التصويت + التعليق بين الفقرات
ومتابعة الحساب لطفًا.

-سواد بعينچ وبالگوة تحچين شبيها عيونچ تردين تبچين شبيچ أحچيلي لتخافين ليش هواي ذبلانة وليش بداخلچ بركان راح يموتچ الكتمان أشگد مكابرة وهلكثر تعبانة شنو متعب معانيچ أول مرة أشوفچ هيچ كبرانة أول مرة أحس مكسورة تمشين واني الاعرفچ أقوى إنسانة بيچ شمات فجأة وگمتي متحسين وعلى كلشي اليجرحچ گاعدة تضحكين بالچ شارد وكلساعة تنسين وحزنچ محد العرف عنوانة..

❐❐❐

"كاتيـا"

هزيت راسي وبدون تردد صعدت وياه بسيارتة، حسيت بآمل داخل عيونة وتوتر فضيع بين عليه ما گدر يخفي حماسة ولهفتة أتجاة ملك وطول الطريق يفكر ومتشوش أنطيتة عنوان المُكان وأخيرًا وصلنا بعده هسة طفة السيارة وصارت مقابيلنا ملك على جهة بعيدة واگفة ما منتبها النا..

بهت وجهة حيدر بصدمة عيونة تسولف لهفتة عليها صفن للحظات علمود يستوعب وفتح الباب وبدون تفكير مُباشرةً نزل وداخل وجهة بهجة وفرحة بعده هسة سد الباب وندارت ملك على سيارتنا لأن سمعت صوت وصفنت على حيدر صارت عينها بعينة

رمشت وحدقت على السيارة وهوَّ مشى كم خطوة بأتجاها تركت المُكان وركضت!!!

بسرعة فتحت الباب ونزلت مصدومة وحيدر ركض وراها وهِيَّ مُستمرة تركض بسرعة وتتلفت لوره خايفة وكأنما ملك الموت ديركض وراها..

بقيت مبحلقة عيوني بصدمة وأعجز بهل لحظة أشرح صدمتي ليش ركضت وليش لهل درجة خافت وليش جاي تتهرب خصوصًا حيدر ما عافها وبقى يركض وراها بَس هِيَّ تركض بسرعة ودخلت بين الدرابين القديمة!

دخلت ملك لمنطقة تخوف تخوف تخوف حرفيًا من گد ما تخوف ما تجرأت أدخل وراهم، ورُغم هذا هِيَّ دخلت بدون ما تخاف ولا تتردد مرة وحدة وشتت حيدر عنها وگد ما درابين هواي ما عرف بيا دربونة دخلت..

وگف حيدر وصفن على آثرها لأن أختفت كأنما الأرض نشقت وبلعتها وجهة أحتقن بضوجة وعيونة ذبلت بقهر جر حسرة حسيتها تعبر عن جرح قلبة، تقربت كم خطوة وصرت مقابيلة وثنينا صافنين على آثرها

أشگد حيدر بقى يركض وراها وأشگد حاول يلزمها بَس للأسف هِيَّ بسرعة نهزمت وما عرفت ليش نهزمت، حالها يُرثى إليه صايرة بحال يصدم بحيث أخذتلي صفنة يلة گدرت أستوعب هاي ملك!

-شفت شلون حالها متغير!

-مو ملك القديمة..

صايرة كُلش غريبة وضعيفة بشكل مو طبيعي كأنما بيها فد مرض خطير وعيونها حُمر دم وحالها غريب كأنما بيها شي ملابسها مشگگة وشعرها مگصص من فوگ ومن جوة بطريقة مو عدلة ومو حلوة وصايرة عبالك مُشردة!