شايفين من تاخذك الدنيا و توديك و انت مثل السكران وسط ريح عاصفة هوجاء متعرف شسوي تروح يمين توديك يسار ... تروح يسار توديك يمين ... تمشي للامام ترجعك للوراء.
مثل شخص تايه مليان جروح و وحده بصحراء جوعان .. عطشان ..عريان ... ما عندك غير تدعو رب العالمين و تضرعله .
و نعم بالله ميخيب احد ... بس احنة بشر و نريد من نوكع بشدة شخص يوكف ويانة نحجيلة نفضفضله حتى الكلب ما يطك و يموت ....
و اووووف شلون صعبة من تنخذل من المنك و بيك و اول المفروضين يوكفولك يتبرون منك ....
اي يگلبي اشعدنه يمهم
هاي موش اوجوه اهلنه
ذوله.. ملگاهم غريب
امبين الينگط محنه
يللّه گلبي !
العوض بلله
ولاتگول اهناك چِنه
هذا كيان ... لا الدنيا رحمته و لا أهله....
دار بدولاب الدنيا و جان فوك و صار جوة .
.
.
.
.
.
جريت نفسي من الفراش و ضربت المنبه ... يالله شكد اضوج منه و النغمة تسبب لي أزمة نفسية .
ولو ما الوقت راح يروح علي و ضارب محاظرات كومة جان ما كطعت هاي النوم الحلوة و الفراش الدافي . كمت و اني العن حظي و أي جماد أمر من يمه اكله هنيالك ما داوم ... هههه .
رحت طلعت ملابس ع السريع و غسلت وجهي كوة لأن الجو يكص كص . بدلت و طلعت البيت ولا صوت بيه بس اني اطلع هيج وكت . وكفت ع الشارع متاني الخط يمته يجي و اني اطكطك من البرد ادية ضامهن بجيوبي ... هاي عود ماكو شي ما لابسه !
والله فد عشر دقايق و اسمع هورن الخط ... كتله بكلبي اييي .. الله جابك و رحمني .
اول ما صعدت حتى ما سلمت كبل كتله و اني اطكطك : افتح التدفئة يمعود ... غير انجماد .
ضحك السايق و كال : ع كيفك دكتور كيان ... تدلل يابة انت بس تؤمر .
اني ضحكت و كتله : هي مال دكتور بهل الزلك خوية حتى الهيبة راحت ... متت يلا شرفت .
ضحك : اعتذر دكتورنا بس هذا صديقك الحباب سنة اضل واكف يمه يلا يطلع ... و من يطلع عوزنا بس نغنيله طلع البدر علينا من كد الفرحة .
جنت كاعد بالصدر التفتت ليورا و شفته ضام راسه بالملزمة : ضمه ضمه ... بالكلية الحساب ولا تبطل سوالفك الناقصة دومك مأخرني و صالبني .
وصلنا للكلية و نزلت وية رأفت و لزمته من كفشته كتله : ولك هسا اذا اضربك هم احد يعاتبني ؟!
هو يضحك و يكول : التسريحة خربت ... وجه البومة هدني . البرستيج خرب منا العالم .
هديته : هسا مال اخرب وجهك مو بس هاي الكفشة مسويها طابقين الله يعينه الي يكعد وراك هذا شيشوف خطية اكيد ساد الشاشة ... لا والمصيبة تجمدت من وراها .
رفع ايده و كام يرتب بيها ضحكت باستهزاء عليه هو رفع حاجبه و كال : امشي راح تروح علينا المحاظرة الاولى .
رحنا طبينا و كالعادة اخر لاين كعدنا حتى ناخذ راحتنا طبعا . عايشين بعالم وحيدنا سوالف وضحك و تحشيش و الدكتور كل شوي صاح : الاخير صوتكم .
و المفعول ساري لخمس دقايق و يخلص حد ما يمل و يسكت من وحده .
هو عاد فهم العادة فكام اول ما يطب يصيح رأفت و كيان كومو يمي هنا كعدو كبالي .
و يفرقنا و احنا كوة مصبرين ع رواحنا و ما نضحك و نكت .
خلصت المحاظرة بطلاع الروح و كبل رحنا للنادي ضلينا هناك سوالف و ضحك و اكل اصلا الشي الوحيد الحلو بالكلية هالفقرة بس ... البقية لعبان نفس . ورطوني اهلي من مشيت ورا حجيهم ... روح طبية ترتاح . يا ارتاح مدكلولي !!! و نوب اني لازم ما اطلع من التقليد مالتهم عائلتنا كلها لو دكتور لو صيدلاني يعني بدل ما نبني بيت نسوي مستشفى اشرف النا و نعيش بيها .
