كيان
اروح و اجي بالممر و عيوني ما بطلت عجيب
شكد مرت مصايب و طول ايام السجن ما دمعت عيني ليش هسة دا تنزل هيج
حتى ما بطلت عيوني ....
كعدت تعبت من الروحة و الجية
عيوني متنصبات ع الباب متاني طلعت الدكتور بس ماكو لسة و هالشي خلاني بقلق اكثر
مرت نص ساعة وطلع الدكتور
اجيت يمه كال
ان شاء الله احسن ... اسعافاتك و جيبتك للمستشفى بسرعة منع هواي مضاعفات تصير ... الله ستر والا حالته صعبة خاصة هي ضاربته مرتين قبل هاي يعني هاي المرة الثالثة
حطيت ايدي ع صدري اوجعني كلبي
شلون تحمل كلبك ... ما تحجي و تاكل بروحك من جوة و يطلع بعدين ع مرض
تنهدت كتله
اريد اشوفه
براحتك طب اذا تريد هسة
فات الدكتور من كدامي و اني وكفت يم الباب متردد حيل
اريد اطب و احضنه و اعاتبه و ابجي و ارجع طفل زغير بحضنه
اشكيله منه واله ع وكتي و شبابي الضاع و مستقبلي الي تلاشى ...
حاولت اهدي نفسي الي يشوفني يكول جنت اركض بماراثون
دست ع كلبي و فتحت الباب و طبيت
جان نايم و ارتاحيت حتى اخذ راحتي وحتى ابوسه و اخلص من نظرات عيونه التكسرني
اقتربت و عيوني اكلته بنظراتها هلكد مشتاقله و ميت ع شوفته
معقولة بوية ما حنيت و لا هزك كلبك علية شعراية مو جنت تصيح العزيز ليش هيج موتتني و اني عايش ..
ليش انتو كدرتو تعيشون و تكملون و اني البقيت ...
دنكت ع راسه شميته حيل احس هسة ردتلي روحي هسة لكيت نفسي الضايعة و عرفت وين جانت ضايعة
بسته بين عيونه و ضليت ساكن ما احب اتحرك
اوووف شكد مشتاقلك ...
سحبت ايده و بستها وضميتها بين ادية حاضنها
ما صدك عبالك حلم و هو كبالي
بدا يفتح عيونه و يرجع يسدها
صحه و اني بعدت عنه صافن عليه وهو صافن علية يبجي شفت ضربات كلبه تخربطت
نصيت يمه و همست
لا تخليني اشيل ذنبك .. اذا وجودي يتعبك فاني طالع
وكفت وهو يباوع و بعده ع نفس وضعه
اشرتله براسي
راح اوكف برة
دنكت و طلعت صعبة علية اشوف عيونه تطلب السماح بس ما اكدر اسامح اعذرني بوية ضلمتوني هواي
كل شوي اطب اباوعله من بعيد و اطلع اخاف اضل كدامه و يضل يلوم بروحه و ينتكس
صار الليل و طبيت يمة انام عنده خاف يتخربط او يحتاج شي
جريت كرسي و خليته مو كلش قريب عليه و كعدت هو يباوع و يدير وجهه
محد بينا يحجي عيونه تحجي و تعتب و تلوم
بس اني اتهرب منه وهو يتهرب
بس عاجابنا الوضع فرحانين بشوفة بعض
جريت حسرة شكد عنيد درت وجهي
سمعت صوته كوة يحجي
خابر ع عاصي هسة يضل باله علية
صفنت عليه و غرت من اخوي شلون خايف يضل باله عليه يعني حرف واحد محجة وياي و من حجة يكلي خابر اخوي
درت وجهي و كلت بلا مبالاة
معندي رقمه
