كيان
صرت اعصاب بس اريده يحجي
مو دا اسألك عاصي احجي لخاطر الله
بلع ريكه و دار وجه كال
ماكو شي شبيك خبصتني وصوني يسلمون عليك
اهااا ... بس هيج يعني
اي وشنو رايد لعد
مدري شكلك جان يثير الشكوك و خليت بالي يروح بعيد
لا ماكو شي شبيك
الله يسلمهم
سكتت اباوع وجهه اصفر و عيونه زايغات ما خلاها بعيوني
فتحت عيوني عليه بشك
عاصي شبيك صوفرت
ارتبك و كال
هاااا ... مبية بس شوي مريض و الطريق طويل
اهااا !! خير من شنو تشكي
عندي حصو بالكلية و الوجع ينهيني لو اجة
هزيت راسي ضجت عليه حيل مبين مخطوف لونه
عندك العافية ... اذا هيج بعد لا تجيني لان سيارة و مطبات وطويل طريقنا فحصوتك تأذيك ع هالحال
اي فعلا ... احتمال حتى اني مراح اكدر اجيك لان دا افكر اخذ اهلي لتركيا
تفاجأت من الخبر
شنو تستقرون هناك !؟
بعدني ما مفاتحهم و اخاف الرفض ... اذا بقوا هنا مراح الحك عليهم كل يوم دكتور شكل و محد عرف العلة شنو
يصير خير ان شاء الله ...
صفن بوجهي يتمعن بتفاصيله و بعدين همس بخوف
كيان تتعاطى ؟!!
الجم لساني تصريحه و سؤاله المباغت و معرفت هو دا يسأل لو يحجي واقع و حقيقة !
دنكت و كتله اخصم اي كلام يؤدي لفرع ما اريده
سلملي عليهم كلهم
كمت و طلعت بلا ما اسمع اي حرف ثاني منه يمكن من كد الصدمة و مكدر يحجي اي شي او يعلق ع الموضوع
مددت بمكاني و طلعت الدفتر فتحته وكعت الحلقة منه بحظني
ابتسمت وشلتها اتذكر من رحنا سوية للصايغ و اختاريتها الها و هي اختارت الي
بس الابتسامة تلاشت و اني اتذكر من جابها عمي الي و كلي انها طالبة الطلاق
اقبضت ايدي بقوة عليها و رجع شعوري السيء الي
شعور الغدر و الخيانة و اليأس
ويرجع كلبي يحثني انتقم من كل واحد ظلمني و اتبرا منهم مثل ما تبرو مني
ويلقى قلبي الصد و يخرج صوت من داخلي يمكن ضميري يهمس و يكول لااا ميصير هيج مو كل اساءة نرد عليها بإساءة و مو كل انتقام يبرد الكلب و نهاية راحة
و يرجع صوت ثاني يصدح و يعارض بقوة لاااااا هذا حقك هذا اقل حق يتقدم الك و ملازم تتهاون بيه
اجفلت من ايد رست ع كتفي
التفتت لكيته ابو الحسن يباوعني بقلق
تهربت من عيونه و ابتسمت و فعلا كنت ممنون منه لان سحبني من صراعاتي الداخلية و الي دائما اكون ضحية بين هاي المناوشات
اشر براسه ع كف ايد المقبوض بقوة و صاير ابيض
