كيان
صرت مهووس بالطفل ما عفت المستشفى كاعد يمه
دخيل الله شكد حبيته
صحته جانت مو تمام فأخذته لطبيب خاص و طمني علي بس زهراء وضعها بالنزلان ...
مرت ٣ ايام و لسة ماتقبل احد يشوفها او يدخل يطمن عليها غير الممرضة
باقية ع المهدئات و المنومات ..
حتى الطفل ما شافته و لا رضعته باقي ع الرضاعة الاصطناعية ...
عرفت انها احتمال دا تعيش إكتئاب ما بعد الولادة ..
محبيت اضغط عليها و لسة ما دخلت و شفتها
مكتفي بسؤال الدكتور و الممرضة عنها .
حولتهم ع الجناح الخاص و خليت ممرضة خاصة بيها تهتم بيها بسبب وضعها هذا
الطفل طلعته من الخدج صار اسبوع هو تحت التبخير و المصيبة زهراء لسة ما طالبت بيه و لا سألت عنه
عصبت من الموضوع و صراحة ضليت حاير و شايل هم الطفل ..
فرحت يم غرفتها و دكيت الباب طلعت الممرضة و سدت الباب وراها من شافتني و ابتسمت
همست بصوت ناصي حتى متسمعني
هلوو شلونها ... ما تحسنت
هزت راسها مترددة و كالت
شوف استاذ مرتك دا تعيش حالة كآبة ما بعد الولادة و حالتها كلش متطورة ... يعني لازم تخاف و تتدخل لا يتفاقم الامر و يستفحل بعدين و احتمال تأذي نفسها او الطفل
مسحت وجهي بعصبية ضايقني كلامها .. موجديد علية و لا فاجأني لان اني اعرف حالتها زين و انما جنت اتهرب و اكابر ما اعترف بسوء حالتها
جريت نفس و بيأس سألتها
و الحل شنو ؟!!
الحل يمكم استاذ حاول تغير من نفسيتها
تمام مشكورة
طلعت من جيبي الفلوس و كلتلها
ما قصرتي ويانا تكدرين تاخذين راحتج من هذي اللحظة
بس قبل لتروحين تجيبين طفلها لهنا
تمام ان شاء الله تدلل استاذ
راحت و ضليت كلش متردد كدام الباب اطب او لا
خايف من ردة فعلها
فتحت الباب و صحت بصوت
يااا الله
طبيت و طاحت عيني عليها جانت صافنة ع الشباك و تلعب بأصابيعها
حتى ما انتبهت لوجودي او يمكن تتجاهلني
اقتربت اكثر و جريت الكرسي قريب عليها
كعدت صافن عليها وهي لساتها من حركت ساكن
احممم ... شلونج زهراء ..
باوعت بطرف عينها بنظرة خاطفة و رجعت لصفنتها ع الشباك
تقصدت اجر الكرسي و اصير كدام نظرها
باوعتلي بخزرة و دارت وجهها عني
شنو متسمعيني !!
جانت رافعة حاجبها و نفسها سريع مبينة معصبة و مراضية بوجودي
زهراء ليش هيج دا تسوين
