كيان
كعدت وية زهير و بالي مشغول حتى خرب واهسي ضليت صافن
معقولة هيج ملاك تطلع منها سالفة محلوة ..
حرامات والله لا زهير ولا الحجي يستاهلون هيج مصيبة
هيي الله بالخير كيان فحمت الحمامة احتركت شو وخرها عن النار
انتبهت وبعدتها مبتسم بخجل
لك خوية وين صافن
حكيت راسي باحراج و كتله
لا مصافن شبيك هنا ...
اي مبين كلش ... يلا هم ايدك خلي اودي غداهم للبيت حتى اجي ع سريع و ناكل سوة
تمام ع راحتك
لم الغدا و راح و اني حضرت الاكل شكد جنت جوعان بس نسدت نفسي ..
طول زهير يلا اجة و من اجة جان كلش معصب و وجهه احمر شكيت بس لا عرف بأخته
كمت من مكاني و هو عيونه تجدح شرار
هااا شبيك زهير صار شي
لا لا ماكو شي اكعد اكعد الاكل راح يبرد
كعدت بس ما مطمن اخاف داري و شو شصاير
يبقى البنية مو ذنبها
اكل كم لكمة و بطل بعد ما اكل شي و اني هم شكد جنا متحمسين للغدا بعدين نسد نفسنا
كمنا و محد حجة كل واحد صافن و عايش وية همومه
رجعنا للبيت و طبيت اني للمظيف اريد انام
شوية واجة زهير بيده مصلاية
و صلاتي لساتني كاطعها
هزيت راسي بعناد و كتله
ما اصلي
عكد حاجبه
شنو ليش
مو لسبب بس اني تركت الصلاة
و مكيف حضرتك !! كوم يلا كدامي و صلي بلا سوالف الزعاطيط هاي
انحرجت حيل و كمت توضيت وكفت ع السجادة متردد مستحي من رب العالمين اخاف اتوجه و اصلي و اني الي نقطعت عنه طول هالمدة بس هو ما قطع عطائه الي رغم الكثير من سيئاتي شفته ينطيني بلا مقابل
وفعلا احن من قلب الوالده ع ابنها
بعدني باول ركعة و خنكتني العبرة و تفجرت عيني تبجي
فقدت بس ابجي ... دموع مذنب خاطئ حقير بس منكسر عرف ذنبه و يريد المسامحة
كطعت الصلاة من النواحي و خريت ع الكاع اسجد و انحب بصوت
انقطع نفسي و مرت فترة طويلة حسيت ذبيت ذنوبي و همومي كلها ع السجاد
كمت مسحت دموعي و عاودت صلاتي مدنك
صراحة مستحي حيل و اني اصلي ... اي مستحي امام هذا العطاء والي اقابله بعصيان ..
ما اكدر ارجع مثل الاول بس الاكدر عليه اسوي و طلبت من رب العالمين يرجعني للطريق و يسهل علية الامور ..
كمت و كلبي مرتاح حيل الم السجادة
التفتت لكيت زهير كاعد مبتسم يباوعلي
الله يتقبل
هزيت راسي رديتله الابتسامة
منا و منكم صالح الاعمال ان شاء الله
كام اخذ مني السجادة و كال
يلا امشي نروح اني وياك للعلوة نبيع المخاضير سوة
