كيان
عيوني ميقبلن ينزلن من وجهها ضلن يسافرن بملامح وجهها الي تقريبا نسيته
ابتسمت و فرحت ما اجذب و اكول عادي و هي صافنة و عيونها تلمع دموع و عتب ...
منو المفروض يعتب اني لو انتي !!؟
مو انتي ردتي البعد ...
حقج هذا و ما الومج عليه ... بس لتواخذين كلبي و الذكريات الي وياج و العايش ع طاريها بهاي السنين الفاتت
كمز احمد ابن ضياء و طفر يمها
يجر بملابسه و يصيح و يكمز كدامها
ماما ماما اروح وياج حبابة ....
هاي اللحظة بالذات جانت القاضية ....
حسيت الهوى تجمد بصدري و كتم ع انفاسي و بلا حول و لا وقوة التفتت ع امي اخاف متوهم من الي دا اسمعه ...
دنكت امي تمسح عيونها و جرت الكرسي و كعدت
رجعت التفتت ع نور شفتها دايرة وجهه و تبجي بحركة و اولادها واكفين صافنين عليها
سافرت عيوني لإيديها تدور ع ذاك الطوق المطوق اديها و مطوق روحي وياه و خانكها
جريت نفس قوي و دنكت من شفت الحلقة بايدها اليسرى
و شكو حيل باقي بية حاولت اجمعه و اطلعه بابتسامة ... لازم ابين قوي و ما مهتم
بس شلون !!! يربي لو غير واحد عادي ... ابن عمي ؟!!
احس الشغلة غدر و خيانة اكثر من ما هي حب طفولة ...
و يرجع عقلي يكول حقهم يعيشون ... اكيد مراح يكتلون نفسهم لخاطرك و يعيشون بتعاسة
رفعت شعري و بينت طبيعي حيل ابتسمت و كلتلها
شلونج نور
نزلت عيني ماينفع ارفع عيني عليها بعد لو انظر غير نظرة حيل واكفة ...
سمعت صوتها المخنوك
الحمد لله ع سلامتك ... مبروك طلعتك من السجن
شلت عيني عليها جانت مدنكة تلعب بشعر ابنها و الدموع تنزل من عيونها
الله يبارك بيج ... انتي هم مبروك ع ذولة الشياطين
رفعت راسها و عيونها غركانات تطلب مني اغفر الها
ابتسمت اريد ابين ميهمني السووه و صاروا مجرد ماضي و ما يربطني حاليا هي مجرد صلة دم لا اكثر
فدوة حلوين بس لسانهم طويل
درت وجهي ع امي شفتها حاطة ايدها ع صدرها و تباوعلي مكسورة
اشرتلها مبتسم
يلا حجية ادري بيج تردين تأخريني حتى تحصلين ع كم يوم وياي مو ؟
هزت راسها و كالت تلتفت لنور
ترحين ويانة
لاااء راجعة للبيت
صحت وراها
ليش شصار لان اني راح اوديج بطلتي
دارت علية و كالت متوسلة
كيان فدوة لا تحجي هيج
هه شنو شحاجي ... غلطان شي ... شوفي وجهج شلون نخطف اول مشفتيني
رفعت ايديها بالهوى و تحجي
و شلون رايد تكون ردة فعلي و اني مشايفتك من سنين و انصدم بشوفتك صدفة و بلا مقدمات
