كيان
المسؤولية ع راسي جبيرة و خاصة بعد ما تحملت زهراء و صارت بركبتي ...
كعدت برة بالحديقة اشرب جكارة و اجة رؤوف كعد يمي ...
ربت ع فخذي و كال
هونها تهون ...
هزيت ايدي باستهزاء
شهون منها ... شما اهونها تبقى هي ذيج هي ... شكبراتها
تنهد و كال
لك اول و تالي خلصانة شوف وين جنت و هسة وين مو جانت عندك الطلعة من السجن حلم و شوف هسة صارت سوالف ... وداعتك ما دوم لابد الها تالي
هزيت راسي و حجيت
هي مو هنا المشكلة ما ملاحظ مدا الحك ارفع راسي و تجيني ضربة اقوى ع راسي ترجع تنزله و تنعل والد والديه
ضحك و كال
الله حابك غير والله الصفنة متفيدك بس تصفن تغرك و الله التهي احسلك
ههههه بالمصايب يول
ههه خويي باي شي اهم شي النتيحة تلتهي
هههه خرب حظي المطفي
مو هو عايز تدعي عليه
جريت نفس من الجكارة و ضليت صافن ع الطيور الطايرة شكد جنت اتمنى اكون مكانهن من جنت بالسجن ....
الحمد لله من طلعت و خلصت من ضلمة الدنيا
درت وجهي ع رؤوف شفته صافن ع صفنتي ذبيت الجكارة بالكاع و التفتت عليه
رؤوف اكو حاجة اوصيك
لا ماكو داعي حالها حال امي و خواتي لا تخاف
المخوفني لا يجي زهير و ياخذها و ادري رجعتها بهالوكت نهايتها و نهاية زهير بيها ...
اخاف زهير يشيل ذنبها و ادري بيه يعزها و بس تروح ساعة الغضب راح يتندم و يكتله الندم
كيااان
هممم
ليش مهتم لهدرجة ترة انت معايز ولا مجبور او تربطك صلة بيهم حتى هيج تشيل هم و مصيبة
رجعها لاخوها وهي ووياه عائلة و يحلون مشاكلهم
ازعجني كلامه و باوعتله صفح
وكفاتهم وياي مستحيل انساها تعرف لو لا ... شغلة ثانية ارجعها لاهلها و هي حامل شنو رؤوف لك والله هالنذل يذبها براسي و يكتلنا ثنينا اني وياها
تنهد و كال
اصلا غلط منك و جبتها و ياك خيي من شفتها بسيارتك المفروض تعوفها وين تلكاها و تكمل طريقك بلا دوخة راس
استغفر الله هسة هذا شيفهمه ... شوف يابة اني كاعد يمهم و صار بينا ملح و زاد شلون اصير قليل اصل و هيج بسهولة اغلس عن الشفته و اخليها تحير بوكتها ... ولك بالوكت الجنت بي حاير بوكتي اواني بيتهم و ضليت و داروني مرتين و اعتبروني مثل ابنهم اجي انكر الزاد و المعروف شلون ؟!!!
اي تمام تمام علويش هالعصبية خويي هدي حبيب
كلامك ينرفز غير
