زهراء
بس سمع مني اول ما نطقت اسم عاصي طفر من مكانه و شمر الريمونت من ايده بعيد
حاط ايده ع صدره و يمشي بسرعة مرتبك اكثر من مرة شفته يريد يعثر
قلقني و صرت امشي وراه
كيان حبي شبيك ! كياااان !!؟
كيان و لا يمي تركني وراح لباب البيت
صرت اباوع من شباك المطبخ ضل فترة واكف وساد الباب بس شوي مفتوح منه . عباس شافني وين واكفة وراح يباوع من باب المطبخ بعدين راح اله كوة يمشي مثل البطة
كيان فتح الباب اكثر ووجهه مغيم و شارد بملامحه
صارت عينه ع عبسي وعيونه شردت
بين ولد شاب جان مرتب حيل ملابسه و سيارته حديثة بس عيونه ع كيان متعلكة وكيان شارد يباوع لعبسي
دنك الولد ع عبسي الصار بصفه يباوعله بفضول
شاله و كال لكيان
ابنك هذا
كيان صفن بوجه عاصي و هز راسه و يباوعلهم
عاصي حضن عباس حيل و ضل يبوس و يشم بي مبتسم بس وجوهم حزينة حيل ... كلها حزن
كيان تنحى عن الباب و مد ايده كاله بس عيونه بالكاع
تفضل ادخل
ابتسم عاصي و طب ورا كيان و عبسي بين ايديه شايله يباوعله مستغرب بس يلعب بنظارته ساكت
صاح كيان بصوت عالي
ياا الله يا الله
فاتو للاستقبال صبيت جاي اني و حضرت طب كيان علية
احواله مو تمام بس يتصفن
شبيك حبيبي
هز راسه و كال
سلامتج عيني .. شداتسوين
صبيت جاي
لا حياتي صبي الغدا اذا خلص
صار تدلل .. منو هذا كيان
صفن بوجهي بعدين بلع ريكه و كال
اخوي
دار ضهره و طلع حتى مخلاني اسال شي ثاني ما انطاني مجال ... شفته يتهرب
خليته براحته
صليت و حطيت الغدا و دكيت الباب عليهم
طلع كيان و اخذ الاكل بلا كلمة وملامحه باهتة
ضليت ملتهية بالشغل رايحة جاية
نص ساعة و اجة سمعته يصيحني جنت ارتب بملابس الطفل بالجنطة حتى اتحضر خاف ع ساعة يعني
طلعت من الغرفة و ايدي ع ظهري
ها حبيبي
حياتي لمي ملابسنا ع السريع و اخذي التحتاجيه
وين رايحين
جر نفس قوي و باوعلي
لأهلي
تقربت منه اكثر اقرا ملامحه ...
بيهم شي
هز راسه و كال
ما بيهم شي بس والدي يريد يشوفني
ابتسمت فرحت حيل واخيرا طنخ راسه و لان عناده اليابس
