كيان
كعدت الصبح و رؤوف بعده عفته
رحت مريت ع زهراء دكيت الباب و مطلعت شكيت شاردة و ضليت اضرب الباب بكل قوتي وهم ماكو جواب
عفتها دا اريد اروح اجيب المفتاح من الاستعلامات بس اول متحركت سمعت قفل الباب تحرك رجعت بسرعة لمكاني
فتحت الباب شفتها واخيرا اطمنت
جانت واكفة وحاطة ايدها ع خاصرتها تباوعلي بقلق
ضليت اباوعلها صافن و اتنفس سريع لان انفعلت و اني ادك الباب و متطلع لي
همست بصوت يا دوب اسمعه
عبالي عفتني هنا لوحدي
درت وجهي عنها بغضب و نترت بيها
المفروض هيج اسوي بس الزاد و الملح مخلاني
بعدتها عن الباب و فتت اراقب شنو ماكلة شفت الدجاجة مثل ما هي اشرت لها بغضب
شنو هاي اني شوصيتج البارحة مو كتلج تاكليها كلها
رحت جريت السفري و صارت عيني ع فراشها
جانت بقعة دم جبيرة عليه التفتت عليها وهي دنكت فورا
احمم هاي شنو متحسنتي لساتج تنزفين
فتحت عيونها علية محرجة و تباوع بتعجب شلون رجال و غريب احجي بهيج موضوع !!
لانو جان اختصاصي في يوم من الايام في مجال الطب فما عندي هالشي مستحة او خجل يعني عادي
مهتميت لنظرتها و عدت السؤال
دا احجي وياج جاوبي
دارت وجهه و كالت بصوت ناصي
لااا بس اول مجيت البارحة هسة احسن
تمام ذني عصاير جبتلج شربيه كله حتى تعوضين السوائل و متصير مضاعفات
هزت راسها ودنكت
حضري نفسج فد نص ساعة ساعة و نطلع
ااه !!وين نروح ؟
لجهنم
شفتها نهضمت و دنكت تجري دموعها بسكتة حيل كرهت نفسي و ع معاملتي وياها
فركت وجهي بعصبية و كلتلها
للبصرة اجة صاحبي نروح وياه .... لبين ما تولدين هاي اذا بقى و نشوف شلون تصفى ... الله يحلها
كاعدة و عيونها تبجي حيل كسرت خاطري
وكفت كدامها اسالها كوة ضاغط ع نفسي واحجي
يدري ابن عمج انتي حامل
رفعت راسها تباوع لي متعجبة
هزت راسها و كالت بخفوت
لااا حتى اني ما ادري ... بس هو طلكني بعد ما كسرني الحقير
جريت نفس و باوعتلها صفح مدري شاحجي والله
درت وجهي عنها و طلعت
رجعت لرؤوف لكيته توه كاعد
هاا عريس صباح الخير يلا كوم اخرتني بساع خلي نطلع
تثاوب و كال
ع كيفك وياي ترة لساتني فاصل
