بقايا ناي

13

كيان

وكفت بين السيارات صافن شلون هسة وين اروح و فلوسي قليلة ..
رفعت راسي للسماء و همست
يا ربي اعترف اني حقير و هواي سويت شغلات مترضى عنها بس اعرفك متترك مخلوقك هيج بحيرة

دنكت و غمضت عيوني و رددت بقلبي آلاية الي نحفرت بروحي
( افوض امري الى الله ان الله بصير بالعباد )

توكلت ع الله و سألت ولد و حاجيته ع سيارت الركبة بألف
شلون موقف كلما اتذكره اشبع ضحك عن نفسي ههههه
صعدت بسيارة كيا باص و كعدت بالصدر و ضلو واكفين حد ما تقبط
واني فاصل عن العالم كلها فرحان حيل و اخاف يطلع حلم لو مشتبهين ولا صدك

قبطت السيارة وطلعت و اني اباوع من الشباك صار هواي مشايف طبيعة و ناس و عالم
جانت نظراتي و لهفتي مثل المحروم تماما
كل شي عنده عجبه
و الناس متغيرة كل شي متغير من 2003 وهسة 2008 ....
خمس سنين نقلة نوعية بحياة العراق
ففعلا جنت مستغرب من هواي شغلات جديدة دا تطلع كدامي
تحمست راح ارجع اشوف اهلي ...
لاااا هم تبروا مني اعرف والدي مراح يستقبلني و متأكد راح يدوس ع جروحه و شوقه الي وميكسر كلمته
جريت نفس بقوة الله ينطيني العون حتى انساهم مثل ما نسوني ...
بس جذاب اني مكدر ابو كليب من هسة اتمنى اروح بيتهم و اشوفهم و ابوسهم واحد واحد

لا راح اروح لرؤوف و افتهم منه السالفة اكيد هو ورا طلعتي
بس شلون و حظي الفكر ... اليكول عنده فلوس يروح بيهن للبصرة
احسن شي ااجر تكسي يوصلني لعنوان انطانياه ابو الحسن و الولد ينطيه فلوس ...
شلون مواقف سخيفة ...

صاح رجال من العبرية ورا اجفلني و طلعني من صفنتي
سايقنا عندك نازل بسيد دخيل ع الشارع ...

اني كبل التفت لا يا الله هاي شنو نفسها المنطقة الي جيت الها من شردت من الخطف
التفتت للسايق حاجيته

اكول حجي هي هاي سيد دخيل

هز راسه هو ويسوق وصل قريب مسافة و طبك ع صفحة نزل الولد
و اني ضليت بمكاني متردد ها انزل ها لااا
و تحركت السيارة تريد تطلع فكلتله بسرعة

نازل نازل يمك ..

ضاج السايق وكال من ورا خشمه
اي مو جنت واكف ليش منزلت

نزلت و طبكت السيارة وراي
امشي بكل ثقة بالبداية جنت امشي بمنطقة ما مألوفة بس من كمت اتقدم شوي شوي صرت اتذكر هالدروب
اي فعلا مشيت بيهن و اني اشرد من الخطفوني و ياريتني مشارد ...
مو وقت الامنيات و الحمد لله من صارت كلها سوالف و دا اتذكرها ...

رجعت ذاكرتي و عرفت و تذكرت مكان السيد الحجي مالي غيره وهو صاحب ضيافة و غيرة مراح يبخل علية بكم يوم يمه ..

وصلت لمنطقتهم بالذات و جان هواي اكو تغير بيها
بيوت ع الطراز الجديد و اكو لا مثل ما هي ما تغيرت
ضليت واكف متحير اراقب البيوت استذكر منو بيهن يا ترى
ولقطته و شفته بعد معاناة لان بالمرة السابقة جان بلا سياج او سياجهم عبارة عن اسعف نخل في حين اليوم لا كان سياجهم طابوق و مغيرين الباب هم
فعرفته من البيوت القريبة عليهم