كيان
كاعد اشمس برة صار تقريبا ٣ اشهر مشايف الشمس لان دائما اضل بالداخل و امتنع عن الطلعة
شفت شخص كدامي كاعد يدخن و لحيته طويلة كلها شيب حسيته كلش مألوف عندي
حاولت اتذكره بس ما طلع بيدي شي لان جان بعيد عني
كمت بحجة اتمشى و مريت بقربه حتى اشوفه عن قرب و اتفحص ملامحه
شكيت فعلا هو
رجعت و كعدت بصفه هو ما هتم و ضل يشرب جكارته بسكون و لا كأنو اكو شخص كعد يمه!
خلصها و راد يكوم
لزمت ايده
عمو ابو رؤوف مو ؟!!
هو وكف وضل صافن علية عقد حاجبه و كال بشك اي... خير شتريد
ما عرفتني !!؟ معقولة !
لا زغرن بيك بس منو حضرتك
اني كيان عمو
تقرب من وجهي و تفحصه زين حتى يبعد الشك الي غزى ملامحه
نصدم من سمع اني كيان و جان صافن مذهول مرتبك ما بين يسال عن وجودي بهالمكان لو عن احوالي لو عن رؤوف
جرني و حضني حيل و ضل يبجي عبالك اني رؤوف و شافني توه
ضلينا مدة ع هالحال
ابتعد و مسح دموعه
شخبارك وليدي .. شجابك لهذا المكان
هزيت راسي و كتله بتعب
القدر لعب لعبته و صرت هنا .... عوفك مني عمو انت شنو اخبارك تصدك ما عرفتك الا تقربت منك يلا
والله حتى اني لو ما تكولي اني كيان جان معرفتك و الله
جريت نفس و سكتت مرات المصايب ع كد ما هي قوية حتى شكلنا تغيره
لمعت عينه و جانت اللهفة واضحة بكلامه
رؤوف و اهله شلونهم ما تعرف عنهم شي
بخير عمو بس جده بي مرض مزين و دا يعالج بيه بالهند
هز راسه و كال وين هم بعدهم عايشين وين عفتهم
لااا راحوا انتقلوا للبصرة يم بيت جده
ابتسم بحزن و حجة بصوت ناصي
من هيج دزت اوراق الطلاق اثاري عمي شرط عليها يلا رضا عنها ....
جر حسرة و كال بصوت حزين
ما تعرف ليش رؤوف ما يمر علية ؟
والله يا عمو هواي فتحت وياه هالموضوع بس هو ماخذ بخاطره ع الصار
جر باكيت الجكاير و طلع يدخن ساكت بس مبين داخله نار بس يكابر
غير الموضوع
انت شسوي هنا !!؟
تهمة قتل
انت !؟
اي عمو اني
ما صدك ...لا تشاقة هالشكل
والله عمو ما اشاقة
