كيان
فرحان حيل بشوفتك
ضحك و حضني حيل طول شوي من سمع ابو الحسن اعترض
انطينا مجال خلي نسلم عليه هم
بعدت عنه مبتسم و صافن عليه و اجوي الولد سلمو عليه واحد واحد
اخر شي كعدنا و كعد بيني و بين ابو الحسن مبتسم
اشوف ايده لافها بوصلة خافي بيها الاثار مالت الجروح و الندب و الايد الثانية طالعة عادي ...
شكد صابني الفضول حتى اعرف شنو القصة ورا هالشي تالي عرفت و صدفة !!
التفت علية كال
اخر شي متوقعه بحياتي ارجع المحك مو نوب اكعد وياك
هههه شفت القدر من يلعب لعبته
اي ههههه بس اذا هيج لعبات حلوة خلي دائما يلعبها ويانة
رفع حاجبه ابو الحسن و كال
ما شاء الله طلعتو تعرفون بعض و اني الناوي اعرفكم
ضحكنا و كلتله
اي جان زميلي بالسجن ... و اول صاحب الي ... لولاه ما جنت تغيرت و جان خسرت شخصيتي و كرامتي
التفتت عليه و ابتسمت كلتله
دفترك نقذني
حط ايده ع كتفي و يحجي وية الولد و نضحك و نسولف
تونست حييل بيهم
و من الضحك انتقلو للجد و شفت ملامحهم تغيرت حتى قرود صار يحجي جدي و بعيد عن التقليد و الضحك
واني صافن عليهم مستغرب
اخذتلي زاوية و ضليت استمع بلا ما اتدخل بالحديث
كال ابو الحسن وهو يأشر لأيوب
رجعوا خابروني اليوم
تغيرت ملامح ايوب و عماد و قرود ساكتين يباوعون لأيوب
دنك ايوب يلعب بسبحته و صفن كال بشرود
شنو رأيكم انتو ...
كاله عماد
ايوب احنا وراك شتكول احنا نكول الشغلة يمك و بكيفك
فر السبحة و رفع راسه دار وجهه علينا كلنا يباوع بالوجوه جر نفس و كال
لا مو بكيفي ... اني معندي مانع بخصوص هالشي و اذا تسألوني عن موافقتي فإي اني حاب الفكرة مراح اجذب عليكم لان ما اعرف اكعد بلا شغل
كال ابو الحسن
شوف ايوب اني الولد حاجيتهم و كلولي موافقين احسن من كعدتنا هيج بلا شغل و مشغلة و جنا نريد نعرف قرارك انت ... لان العرض جاي ع اساس انت الي تكون القائد فالموضوع يمك
تنهد ايوب و صفن ع عماد كله
انت مستبعد من هالشي
دنك عماد و عصب حيل ضل يشتم و يغلط ع روحه بصوت ناصي بعدين خله عينه بعين ايوب و كال
ايووب لا تخبلني اني ما اعوفكم و وياكم للموت
و اهلك ؟!! عماد احنا عادي ان جان اني لو ابو الحسن لو قرود ... ماكو شي ورانا لا عائلة لا التزامات و لهذا السبب اختارونا لذلك حتى لو قبلو اني ما اقبل و راح استبعدك
