زهراء
واكفة اباوعله من بين دموعي و هو نظرته الحقارة و الحقد طاغية عليه
وكف نص البيت كبال زهير و ابوه وراه و جدو خطية واكف كوة يتصنت لحجية الباطل
صاح بوجهه زهير و يأشر علية بدناءة
ها اختك و كبالكم كلكم طالق ..طالق ... طالق ..
حجاها ببرود و الابتسامة تارسة وجهه
واني اردد بكلبي الك يوم يا ظالم وين تروح من الله اذا مو بالدنيا بالاخرة
جرة زهير من ياخته تسودن عليه
شدا تاكل خ... انت شنو طالق شنو هذا الحجي
ضحك حامد و كله
والله اختك متشرفني تصير زوجتي
دار وجهه زهير علية متعجب وفاتح عيونه بعدين رجع التفت لحامد
وليش متشرفك شنو سوت ...
دنك هو عود خجلان بس ضحكة الشماتة ع وجهه
خوية زهير رأفتاً بحالك و احنا ولاد عم فخليها سكتة و خلي الطبك مستور
زهير تخبل و اني كمت ابجي بصوت صاح بي
شنو شايف عليها !!! احجي لا اكتلك والله
ههههه تكتلني !!!؟ متكدر
صاح بيه يحذر بعصبية
حااااامد لا تجفص بالحجي و كول التريده
اي مو كلتلك اختك ما اريدها صراحة ما أمن عليها و ع البيت الي راح تفتحه
تهدلت ادين زهير من ياخته و باوعلي ما مصدك
ضل صافن لحظات و ما اشوفه الا وفوك حامد و عمو يوخر بيه واحد يشتم بالثاني
سديت اذاناتي و ابجي قرفصت ع نفسي و اباوع بس بعيوني
من فاككهم عمي بعد ما شبعوا زهير ثنينهم ضرب عود ع اساس دخل يفاككهم اثاريه فزع لابنه
وضل يضرب زهير
وكف حامد وصاح
ابن الكلب فوك ما يضرب اخته الي كل يوم لاكيها وية رفيجها
شهكت متعجبة و دموعي تجري حطيت ايدي ع حلكي و ابجي
زهير ضل يباوع بشك و حامد الحقير ضل يتبلى علية و بعدما ملى راس زهير بالكلام السافل المثله طلع هو وابوه و اجة زهير يمي
ضل يهز بية و يسال و اني عبرتي خانكتني اريد احجي ما اكدر دموعي تطلع قبل صوتي و مانعته
ضل صوتي مخنوك و زهير تخبل علية و ضل يضرب عباله سكوتي هو مجرد تأييد لكلام الحقير ذاك
و كوة جدو خلاه يبعد عني
و كبرت السالفة براس زهير و حامد ضل يكبر بالموضوع و وصل بيه بفد يوم بكل حقارة جاي و كدام جدو و زهير يطلب مني اروح للدكتورة ....
جانت غايته يذب فعلته بغيره و ادري بمخططه من اوله من اجة و تبلى علية و اتهمني بعلاقة وية غيره
زهير جن جنونه و تخبل
جان رافض اول الشي بس بعدين من كد ما شكك حامد بية زاد شك زهير و ضل هو يلح علية و اني ما اقبل ادري راح يكتلني والله ...
و ما طولني ارفض اروح بدأ يتاكد من شكوكه و بدل مجان سندي انكلب علية يطلع و يطب يضرب بية
و اخر مرة جنت دا انزل من السطح اشر ملابس وهو اجة شافني و هجم جرني من شعري
ركضت منه اريد اشرد بس مشفت مفر رحت جوة الدرج قرفصت و هو ضل يضرب بية بحزامه جان فاقد
شكد حنين هو بس من يعصب يفقد و يخسر الاول و التالي و بس يهدأ يندم
روحي راحت واباوعله بعيون زايغة و اشوف اجة كيان و وخره عني و طلعه برة
