زهراء
مر اسبوع واني مشايفة كيان بعيني ... اجة مرتين
اني و نايمة سابح و بدل و طالع
البيت وحشة بلياه و ضليت هواي الوم بنفسي
يصعب علية اشوفه هيج مدري شصار و تغيرت احوالنا هيج جنا مثل العصافير
بعد الصار مكليت شي و هيج ضايجة كلش و تعبانة و صار عندي الم قوي كعدت ما اتحرك اخاف يصير شي
صارله تلاث ايام مجاي والله خايفة عليه
نمت بالصالة و عبسي عاقج وجهه يلعب بصفي
وعيت ع صوت حركة كعدت شفت عبسي نايم بصفي
عكدت حاجبي مستغربة خاف كيان اجة
كمت بس وجعتني بطني حيل فونيت بصوت شوي عالي لان فجأة كمت ع السريع
حطيت ايدي ع بطني و عيني اجت ع باب غرفتنا شفت كيان طالع و بيده تراكه و يباوعلي بخوف
شمر الملابس ع الميز و اجة يمي كعد ركبه
يباوعلي و يباوع لبطني و حط ايده يتحسس بقلق
اباوعله و عيوني دمعت ... ملامحه غير
صاير جوة عيونه اسود و شعره طولان حتى لحيته و ذبلان حيل حتى عيونه صايرات حمر و بداية انفه احمر
همس بصوت ناصي
موجوعة ؟
هزيت راسي و عيوني بعيونه وهو يعتب علية بنظراته
اممم كلش ... بس مو هنا
شلت ايده و حطيتها ع كلبي
هنا وجعي
دار وجهه عني و جر نفس ضل يدور بعيونه داير مداير البيت بعدين باوعلي و جر ايده مني و ضرب صدره حيل و حجة من بين سنونه
مو بكد وجع هذا ...
صار يضرب اقوى و اقوى سحبت ايده بخوف والله خايفة لا ضربة من ضرباته و يكسر ضلوعه ع كد ما جان يضرب بحركة
كااااافي فدوة دا تعذبني و الله دا تضربني بكلبي من تسوي هيج
جر نفس قوي و صاح
ولكم ااااااااااخ ... اريد ارتاح كافي عذاب ....
لميت وجهه بايدي و توسلت بي
لا هيج تسوي كيان والله ممتعودة اشوفك هيج ...
رفع حاجبه و باوعلي صفن و كام . اني تعلقت بيده
وين رايح .. هذا بيتك وين هادنا و رايح
هز راسه بلا ميباوعلي
ما اكدر اضل هنا هالفترة اني وحش اخاف اذيكم وياي ... يمتى ما احس نفسي تحسنت ارجع عود
كيان شبيك متحس ... ما اكدر ع فراكك و الله ندمانة ع الكلام الحجيته وياك و تفكيري بطلعتي من البيت بس والله انصدمت
غمض عيونه و برز عضام فكه من جوة لحيته
همس بخنكة
حتى انتي جرحتيني ... انتي الجنتي بلسم لجروحي ضربتيني بكلبي و خاصة حجايتج من كلتي زهير ارحملي منك
ما اعرف بشنو قصوري وياج ... مالي ذنب ترة
اني اشتغل بيد الحكومة بس شغلتنا مخفية لليوم ما لطخت ايدي بواحد بريء كل الي اكتلهم اني بإيدي و نطلع عليهم عمليات تنفيذ عدهم فضايح و سوالف عار ... ولانهم تحت جناح الحكومة ميكدرون يحاجوهم لذا نضطر نطلع نقتلهم و نسوي يا حادث يا سطو .... ذولة يتمادون و خواي مأذين بشر حتى متاجرة بشر يتاجرون
