نور
طلعت من الغرفة دايخة حيل و نفسي رايحة
وكفت بالصالة مشفت ضياء بيها
رحت امشي بتعب للمطبخ و تفاجأت بيه كاعد يطبخ بكل أريحية
تقصدت اطلع صوت من دخلت هو التفت بسرعة الي
مبتسم و وجه هادئ
صباح الخير ... شلون صرتي حبي
دك كلبي بسرعة من هاي الكلمة جديدة علية و خاصة منه و حسيت خدودي يطلعن نار من الخجل
سحبت الكرسي و كعدت بتعب
صباح النور ... احسن ان شاء الله
ترك الماعون من ايده و اجة قرفص يمي و مسك ادية ودفنهن بأديه مبتسم
مشتهية شي معين اجيبلج اياه ع الريوك ؟
درت وجهي عنه لسة مدا اتقبل وجوده كل شي صار بسرعة ومشاعري متلخبطة حيل ...
جريت نفس و حاولت اسحب ايدي منه بس مهتم و لا انطاني فرصة حتى
طلع صوتي بصعوبة من تعب و احراج و خجل كلهن اتجمعن سوى
لا ع كل حال اني مالي نفس و مدا اشتهي العسل
عكد حاجبه و كال
ما مقبول هالكلام راح نكعد سوة و ناكل سوة و اي اعتذار ممقبول
شفته كلامه الصارم و بنفس الوقت لطيف
نزلت راسي
تمام مثل متريد
كمت وياه اساعده بالاكل وهو اعترض بدايتها بس بعدين ضل كل شوي واكف يتصفن و يرجع يحط الاكل ...
مراقبته و نظراته الي تربكني فحاولت طول ما احنا واكفين وقريبين من بعض اتجنب نظراته و احاول اشغل نفسي بأي شي غيره
سحبني من ايدي و كعدني كباله و ضل يخلي بماعوني ويقدملياه
اخر شي مليت من كثر ما حط بيه
حجيت معترضة
ضياااء ترة لخاطرك كعدت لا تستغل هالشي والله مالي نفس اكله كله
حط كوب الجاي الجان يشرب بيه و باوعلي بإبتسامة عريضة وصفن وسرح بوجهي اربكني حيل وجيت اوكع الجاي علية
زفرت بضيق هالرجال راح يخبلني كوة دا احاول اتأقلم وياه و حضرته يصعب الامور ع الاخر
رجاءا ضياء وقف هالنظرات عني اذا ضليت هيج تباوع مراح اكعد وياك
رفع اديه بإعتراض
آسف والله آسف ... بعدين انتي دا صدميني وحدة ورا الثانية
آني !!!
ايي انتي !.. اول شي حضرتج لأول مرة تتفصلين و تنطقين اسمي من يوم الخطوبة لليوم ما كلتيه و ثاني شي و الاهم كلتي مالي نفس آكل بس لخاطري كعدتي ...
شوفي اكو هواي تطورات و متفاجأ و هايم بيها اني كردة فعل تجاهها
دنكت و التهيت باكلي اووووي شكد صريح و يحجي ميضم مشاعره
اكول نور شنو رأيج بالشقة
امم حلوة و مرتبة
يعني عجبتج
ايي كولش ... شنو راح نستقر بيها
