نور
نعزلت بغرفتي هذا اكبر شي اكدر اسويه ما عندي جرأة اواجه والدي كل الي اكدر عليه ابجي و اتوسل ما يزوجني
بس بابا معند و خاصة من حجي و نك خالتي براسه
اختنكت و تمنيت حيل اشرد لو ارجع و اعيش يم بيت عمو قاسم
زواجي هسة بهالفترة و من هالشخص معناتها التوقيع ع موتي و نهاية عمري
توسلت ببابا هووواي بس مجان يرد علية اصلا ميباوع بوجهي
اني كلبي دا ينزف ع كيان و بابا يريد يزوجني والله اتخبل غير
نزلت و كمحاولة اخيرة وياه و شفته بعده معند و مصر يزوجني من هذا المتزوج ثنين و رايدني ثالثة و المصيبة بابا كلش مقتنع لان جيبه مليان
رجعت لغرفتي و طلعت فوني ابجي بمنو استنجد هسة
و ضليت اكلب بالارقام معرف ليش ضغطت ع رقم دريد
شفته متصل و رجع عندي الامل مسحت دموعي
و كتبتله
هلوو دريد شلونك
هلا والله هلا نور شخبارج
مو زينة ابد دريد
ليش خير صاير !!
بابا يريد يزوجني من واحد متزوج ثنين و مقتنع حيل بالفكرة حتى عمو حاجاه و كله لا تتدخل
مرد علية خاب ظني و رجعت كتبتله
دريد وياي ؟
شوية و رجع جاري الكتابة ابتسمت ورجعلي الامل
راح ادك عليج اكو احد يمج ؟
لاااء محد اني بغرفتي
دزيتها ورا ثواني دك علية
سمعت صوته معصب و يحجي بحركة
ادري اريد افتهم شبيه عمي ع شنو مستعجل مصارلج هواي من فسختي من كيان
ما اعرف دريد تعبت و اني اقنع بيه
عفية اني مخنوكة شسوي و الله اموت اذا صارت اتخبل
راح اتخبل اني ما اعرف ليش حاس مرت ابوج ورا هالسالفة
هسة هي مو هي اني تورطت و مستقبلي كله صار ع المحك
اشوف عاصي و اخابره افتهم شنو الصار بلكي الوالد يقنعه
حجيت بصوت اشبه بالنحيب اتوسل بيه
دريد فدوة خلصني اني بركبتك
محسيت الا و انفتحت الباب بغضب التفتت اشوفها مرت ابوي و عيونها شرار ممليات حقد و كره
وكع فوني مني و اني ارعش و عيوني تصب
جتي وكفت كبالي جرت شعري و نزلت اخذت فوني من الكاع و اني ادفع بإيدها بيأس
تفحصت بعيونها المسمومة و رفعت و ابتسامة الحقد ع شفتها
مشايفة هيج وحدة ممرباية و بايعة اهلها مثلج
مسويت شي والله
جرتني حيل وجعتني
لج لوما سمعت باذني كلتيله اني بركبتك ولج شمصخم وياج ولج عوبة راح تجيبين العار لابوج
لا و النوب ويامن وية حماها
سوة عملته و سافر
