كيان
قلب القاضي الاوراق بعدم اهتمام حتى مكلف روحه يقراها عدل مجرد ما شاف اسمي و طريقة تعامله بعدها عرفت ان القضية مدفوعة الثمن و قاضيها هم
عرفت هم محددين الثمن و الحكم بلي يعجبهم
سد الملف و رفع طرف عينه يباوعلي
و حجة كليشتهم المعتادة قبل اصارد اي حكم حد ما وصل حكمت عليه المحكمة بالسجن مدى الحياة
صراحة جنت متوقع الاسوء مثلا اعدام بس طلع عندهم رحمة هه
ضحكت بوجهه و كلتله بصوت هادئ
بشكد اشتروك ؟!
سمع كلامي و تنرفز زايد
ضل يتواعد و يهدد ان يغير حكمي للاسوء بس مهتميت اله و لا هز شعرة مني
درت وجهي عنه و مديت ايدي للحارس
كلبشني و طلعت
بس اريد اطلع لان احس راسي كبت بيه الحرارة و اذاناتي دخنن
ما اجذب و اكول ما ضجت .... شلون ما اضوج و اني اتحاسب ع ذنب مو مالتي و اتعاقب اشد العقاب ...
بس السويته داخل من ضحكة و هدوئي المزيف مجرد مكابرة و صون لكرامتي المجروحة
دخلت للقاووش و رحت لمكاني و نظرات الاستفهام تشع من عيونهم بس تجاهلت هالشي
مددت و حاولت انام بس مكدرت ... اريد فدشي ينسيني الصار و اللحظات السوداء الي مرت علية قبل شوي
ما لكيت غير الندم ...
لحظتها صابني مرض التفكير و جان بداية الارق
بعدها
مشاعر و افكار جنونية غزتني و
استغل الشيطان وقتها ضرفي
و بدت الملامة
ذبيت كل لومي ع اهلي ... ما اكول حقدت عليهم لو ما احبهم لااا ابدا ... بس اكول ما راضي ع اي واحد بيهم و ما راح ارضى بيوم ...
مرت ايام تعادل ضعف العشته سابقا اليأس صار صاحبي و صلاتي عفتها
من يأسي عفت و قطعت كل ارتباطاتي وية رب العالمين ...
ما اعرف ليش دا اعاقب نفسي هالشكل و ليش دا اسوي و احطم نفسي هيج
عمو ابو رؤوف جان يجي يطمئن علية و يروح من بعد ما يمل من استجابتي وياه
يجي ويروح كلمة ما احجي وياه
كل وقتي ساكت ... صافن
اجتني زيارات بس مطلعت و ضليت معتكف بمكاني ما اتحرك
بس اخر زيارة اضطريت اطلعلها من لح الحارس و كال
ابوك اجة يزورك
تحركت بلا وعي و كلي لهفة معقوولة بابا جاني
معقولة حن كلبه علية و اجة يشوفتي
و رجع عندي الامل و رجعتلي روحي حتى قبل لا اشوفه ...
مشيت ورا الحارس و طبيت وراه
بس ما لكيت بابا شفت عمو جاسم ابو نور
هو و بابا يتشابهون بالشكل و الحارس يعرف الوالد فعباله بابا
تصورت راح ياخذني بالاحضان بس من دخلت ضل بمكانه ما تحرك اصلا
و اكتفى بسلام بارد من بعيد بكل رسمية
