فتحت عيوني و رجعت غمضتهن دا احاول افيق بس احس ثكل مو طبيعي ع عيوني و جسمي يرجف اعتقد ارتفعت حرارتي ...
لا الضاهر فولت اصلن
اسمع هوسة يمي و صوت دوي ناس هواي تحجي و ريحة الجكاير تارسة المكان حتى خنكت ريتي شكد اكرهها و اكره ريحتها و بعد روائح ثانية رطوبة دا تعط بالمكان و عرك دا تلعب نفسي منها
مرت ساعة كاملة و اني بمكاني هواي ناس حولي دا احس بهالشي بس محد دا يتقرب الي و يكلي شبيك
درت وجهي عيوني مغوشات كوة اشوف
ع جهتي اليمنى ما كدرت اشوف تفاصيل مجرد واحد كاعد بيده شي يمكن كتاب هيج اتصور .. حاولت اطلع صوتي بس صوتي يوكف عد طرف لساني يرجع كمت اوون و ابلع ريكي بصعوبة احس بلعومي صاير خشبة شفته التفتلي و رجع يقرا مدري شيسوي
شلت ايدي اريد امسح العرك ايدي تموتني و مضبرة مترفع ... شنو هاي هم رجعوا خطفوني ... زين وين اني اهلي وين ليش هالروائح النتنة
غمضت عيوني الصخونة دا دك برسي اخاف تصير مضاعفات غير...... واحد من هاي البشر يحس بونيني و يجي يساعدني
غفت عيني بعدما اتحمل نار جسمي و يرجف كوابيس استلمتني يعني لا اني نايم و مرتاح و لا اني كاعد مرتاح
نوب تورطت و نمت بطلت اريد اكعد كوابيس و احس احد كاتم انفاسي و كاعد ع صدري
كمت اتنفس سريع و جسمي صار سباحة من العرك
حسيت بواحد دا يضرب راجديات بية ع كيفه و يكول يولد اكعد ...اكعد دا تسمعني
ونيت و جلبت بإيده كتله مااا..ي ...اريد ما...ي
فتحت عيوني شفته كاعد يمي مشفت ملامحه الصخونة سطرتني حط ايده ع كصتي كتله ارييييد ماااي
هز راسه و سكت و كام مني
كلت بكلبي يمعود وين رايح دا اموت اطيني مي
ربع ساعة و رجع كعد شربني مي و غسل وجهي
كال يلا كوم ساعدني حتى اخذك للمستوصف
سندني و كام ما جانت عندي طاقة فوكعت بسرعة و ارجف
كال هاي شنو حالتك منتهية ... ضل هنا هسة اجيك
سندني ع الحايط و راح ورة شوي اجة وياه حمالة اسعاف حطني بيها و شالني من مكاني و وياه ولد ثنين لابسين صدريات بيض
وكفوا يم باب مشبك صاح واحد بيهم فتحه يابة الولد دا يموت
شنو هاي دا اخبص بتخيلاتي شنو هالمكان ...
لا لا لحظة صح اني بالسجن ما غلطان و مدا اتخيل
غمضت عيوني و عادت بية الذكريات اوجعني كلبي
صحت بيهم بس كوة احجي
رجعوني ما بية شي ... رجعوني اريد اموووت
محد اهتم لكلامي الي جان يطلع انين مو كلام
غمضت عيوني و ما سمعت شي بعد
كعدت احس براحة احسن من الجنت بيه جريت ايدي طلعت مكلبشة بالجرباية النايم عليها ...
ضجت حيل و تذكرت هالشهرين المرن علية بالضيم
و شلون معاملة وياية .... حتى الحيوان محد معاملة هيج ..
و الذل العشته بالسجن القديم شلون
اوووف خلوني اكره نفسي كلما اتذكر اخر مرة عذبوني ضباط التحقيق بيها شهرين و اني اتعذب حتى اعترف ع شي ممسويه
