زهراء
دخلت وحدي للصالة لان الممرضات منعن اي احد وياي
عافني وحدي اطلك وراحن اختفن من كدامي و اني اتوسل و ابجي خاصة وهاي تجربتي الاولى
فما اعرف اي شي او شلون اطلك
بقيت ساعتين اني وحدي محد اجة يمي مثل البي مرض محد يدنة يمه
كمت من مكاني وضليت افتر بالصالة و الصياح داير مداير و هذا الشي خوفني بالزايد و تعامل الممرضات و الدكتورات و عصبيتهن هذي المناظر خلتني اخاف و ارتعب
عدلت حجابي و حطيت ايدي جوة ضهري و طلعت امشي ع السريع اكابر ع وجعي ضلن يصيحن وراي و يجرني
اني انحب و دموعي تجري اوهر بديهن و اطلع ليبرة
عوفوني ما اريد ... عوفوني
لكيت خالة ام رؤوف و رؤوف واكف يمها يخابر من شافني و شاف وضعي سد الفون و اجة يمي يريد يسالني و اني ابجي و اصيح
بطلت ما ااااريده عووووفوووني اموت اني وياه ... عوووووفوووني
ضليت اصيح بعلو حسي و انحب بصوت كلها اجت ع صوتي حتى مدير المستشفى و الدكاترة يحاولون يسكتوني و اني ابجي بكسرة كلب و خنكة
رؤوف ضل يصيح و يغلط و يسب بيهم و كلها تحاول تسكت و تهدأ الوضع و اني اروح و ارجع بالممر و الالم كاتلني و الناس رايحة رادة يحاولون يرجعوني للصالة
كلتلكم ماااا ااااريد اطب بعد فوتو حالي ... اني اريد اموت عووووفووني
صاح رؤوف وجان حاط ايديه ع راسه
يوووم فدوة لكلبج خلينا نروح لمستشفى خاص دشوفي حالها شلون صار
صحت اني و صوتي راح من الالم و الصياح و الطلوكة
لاااء ما اروح لمكان و لا اتحرك .... ما اريد بعد
جتي وحدة من الممرضات و جانن كلش معصبات و زهكانات مني هن و الدكتورات يكولن علية اتعاير و ادلل
جرتني من ايدي حيل و صاحت بية ترجعني للصالة
امشي تحركي مو هي لعب جهال و متردين ... رووح بداخلج شنو هالكلام التافه
ضليت ادفع بيدها و اصيح بصوت منتهي
عوفيني فدوة ابوس ايدج عوفيني
احس كلبي انتهى راح فما حسيت الا و راسي ضرب الكاع و ضلمت الدنيا بعيني ...
.
.
.
كيان
زهييييير باللك تسويها
كيان احسلك كولي وين زهراء
زهير ... اختك صارت مسؤوليتي و اني تزوجتها خلاص سد الموضوع
كياااااان لتخبلني ... مو سميتك اخوي ليش تطعني بضهري هيج
يشهد الله ما طعنتك بالعكس صنتك و راس امي ... زهير انسى موضوع اختك و...
