اغتيال براءة

البارت الخامس عشر

الكاتبة الاسدية

لسان حال حيدر بيوم زواج امل

لو ادري هيچ يصير بيه وتروحين

چا جبت ملح الگاع طشيته بالعين

چا وين كل ذاك الحجي الماعوفك

چنگ عفتني بعذر چان اضروفك

شلون اقتنع للغير هسه تروحين

وكلشي انتها ومتشوفني ولاشوفك

خلصت عمري مناطرك واحلم بيك

وعايف حرير الناس وارضى بصوفك

معذوره انتي وعاذرچ الله وياچ

هم انعم الله الليل جاب طيوفك

شكرا للشاعر المتالق حيدر كاظم بحساب على الانستا ha.k.89

سحر اموله كعدي حبيبتي وين اكو عروس نايمة للساعة ٩

امل ليش هم حاسبة نفسي وية العرايس اني

سحر حبيبتي كومي ياعيني وفرحي مثل البنات هذا اليوم ميتكرر عيشي حياتج قانعة بقسمتج حتى تفرحين وتعيشين حياتج براحة

امل الله كريم البيت هوسة شربت جاي ودخلت للحمام قبل لا اروح للصالون مريت على امي جانت نايمة وتعبانة فد مره ابد ماعاجبني وضعها حظنتها  بقيت ابجي عليها

ام سالم لاتبجين يمة ميصلح عروس تبجي الله يسعدج ويريح كلبج

امل يمة شلون اعوفج ماكدر اشوف هذا حالج واني اروح اتزوج

اميرة ليش قابل احنا عايفيها لو منداريها شو عمتي فقيرة وكلنا نحبها

سحر اموله والله ازعل ليش عايفتها وحدها هي مو امنا

امل والله مو قصدي بس اني ماكدر هاي امي تعرفون شنو يعني امي

ام سالم يمة برضاية عليج ماريد اشوف دموعج روحي بفالج الله يسعدج

سحر يلا عيني كومي اتاخرنا على الصالون ولج انتي عروس وبعدج ما رايحة شوفي ايمان من الصبح اتحضرت وراحت للصالون

امل ضحكنا كلنا على سوالف سحر

رحنا اني وبيداء للصالون وبيداء بقت تسولف وياية وتوصيني وشنو اسوي وشلون اتصرف

اسمع كلامها واتذكرت ايام الطفولة والي سوو بية محمد وفراس ومخلص وماجد بقيت ارجف من الخوف يعني الماضي راح يتكرر من جديد

اتمنيت بلحظة اكون بحلم وافز منه والكي نفسي كل هذا ماصاير واني بعدني ابيت اهلي بس وين يبقة هذا حلم

اجتي البنية الي تشتغل عرايس وبقت تحجي فدوه يمة شنو هذا الجمل
كلشي متحتاجين لو بس اتغسلين وجهج وتلبسين بدله تصيرين احلى عروس

بيداء حبيبتي شفتي عروستنا حلوه ماريد تخليلها مكياج هواي وشعرها لترفعي عالي تسريحة بسيطة