اغتيال براءة

البارت الخامس والعشرون

الكاتبة الاسدية

اعـــض اصبع نــدم وادري الندم ميفيد
غشيم ومــا عــــرفت اختار واستاهل

ورطه تورطة مــــحد جبرني عــــــليك
الكلب مسكين جان مغفل وجـــــاهل

كلبك مـــــــو كلب يشبه كــراج العام 
مشرع لليطب بــــــــي صاعـــد ونازل

حجــــولي شكثر كالو خاين وجــــذاب
جـــذبت الحجالي وكــــلـت لا عـــاذل

اعتب عـــــالزمــان العرفاني عـــــليك
مــن يوم العرفتك بالعشك فــــــــاشل

سلمتك كــلب صافـي وذهــــب تيزاب
رجع فشلان باسهام الغــدر حامــــــل

الـي حـوبه التعثرك هــتـــم اشوربيـك
فـرح بيه وتشمـــت خــــــــايب العاذل

تـــذكر من كلتلي اوياك اظـــل للموت
جا وين العهد هم كــول مـــــــــاكايل

طلـــع كلبك قفل يرهمله كــل مفتاح
جـــــــا المـــن بعــد مفتاح الك شايل

المـــهم هسه دكلـي شراح اسميك
بس كلـــــــي اليعجبك وانه بـي قابل

خــــــاين والكرهـــــــتك راح اسمــيك
هـذا اخرقراري و حكمي الك عــــادل

رجعت من المحامي واني منهارة من كلامه احس روحي مخنوكة اوف شدعي عليك مازن

ام مازن ها يمة بشري شكال المحامي

امل مادري شكوللها

ام مازن ها يمة شو سكتي

امل يمة شكول ماقبل على البيت يكول ميفيدني وميجيل ٥٠ مليون والقضية صعبة حيل

ام مازن يمة جا باجر اني وياج نروح ندور على مازن ونشوف وين حابسي ونعرف شنو قظيته خوما نعوفة مندري مصيرة وين

امل يمة وين نروح وين ندور

ام مازن يمة يكولون روحو للتسفيرات لو للامن العامة

امل زين وماهر وثائر ليش ميروحون على اخوهم يدورون الله يقبلها نسوان اتدور عليه

ام مازن يمة اموله الخاطري عوفي اخوته هم تبرو منه من زمان خلينا اني وياج ندور خوما نعوفة

امل الله كريم باجر الصبح نطلع نسال عليه

ثاني يوم من الصبح اخذت عمتي والجهال ورحنا للامن العامة حتى نسال عليه

اشكد ماريد احجي عن الي صار ميوفي حقه من اول حرس يتلكانا يبدي يساومنا الى ان وصلنا للاستعلامات

حتى نستفسر عن مازن الي يكول انطوني عنوانكم واو رقم تليفونكم واني اتصل بيكم

والي يكلي بعد لتجيبين العجوز والجهال وياج تعالي وحدج