أحببته كثيراً💙💚

الحلقة ٢

((((((الحلقة الثانية )))))))

#احببته_كثيراً
#بوسى_مصطفى
*********
الحلقة الثانية :-
*********
في صباح اليوم التالي داليا خارجه من بيتهم في طريقها للجامعة قابلت عادل جارهم

عادل بينادي/ انسه داليا
داليا بتتلفت ناحية الصوت إللي بينادي تلاقي عادل بدأ يقرب منها

داليا بنت ملتزمة مبتكلمش شباب حتي كلامها مع لؤى في أضيق الحدود وكل مرة مابيتكلموا بتحاول تفتح معاه موضوع الإرتباط علشان كل شيء يكون رسمي

أما عادل فبدأ يتكلم
عادل/ صباح الخير انسه داليا

داليا / حضرتك في حاجة

عادل / لأ بس كنت عايز اخد منك ميعاد اقابل والدك

داليا ردت عليه بعفوية / طيب وأنا مالي اخدلك من بابا ميعاد ليه عايزة هو موجود في البيت. .
قالتها داليا وهي مش مستوعبه يقصد ايه

داليا وهي ماشية ركبت تاكسي وقاعدة سرحانه افتكرت كلام عادل بتقول لنفسها ازاي مفهمتش كلامه الموضوع واضح
لكن ردي عليه ممكن يفسره أني موافقة.. يووووه ليه بس الإحراج ده

داليا داخله الجامعة وهي مضايقة قابلت سوسن دخلوا المدرج مع بعض أول بينش قاعد لؤي وعمر ومجموعة من البنات نصه شباب والنص التاني بنات لؤي جمبه بنت شافته داليا وتجاهلته

لؤي شافها بينادي / داليا تعالي هنا في مكان فاضي

داليا / آسفة مبقعدش جمب شباب قالتها داليا لؤي أحرج

عمر / كبسة يا نهار ايه دا يا ابني روح استخبي 😂😂
 
لؤي بضيق / ما تبطل استظراف بقي يا أخي وذقة جامد في كتفه

سوسن / تعالى هنا يا داليا

قعدت داليا وسوسن في البينش التاني جمب مجموعة بنات

"لؤي كل شوية يلتفت للبينش اللى وراه فيه داليا ويرجع يبص قدام تاني فضل علي الحال ده لحد ما جه الدكتور "

"قربت البنت اللى جمب لؤي بتهمسله وبدأت تشوشه في ودانه
داليا قعدة شايفة الموقف قدامها اتغاظت "

الدكتور لمح البنت وهي بتكلم لؤي
الدكتور / الولد والبنت اللى قعدين في البينش ده يخرجوا بره
بدأ يوقف بنت وولد
الدكتور / لأ مش انتوا وشاور علي لؤي والبنت اللي جمبه

لؤي / يا دكتور ولسه هيكمل كلامه قاطعه الدكتور وقاله

الدكتور/  بره أنت وهي علشان تبقوا تحترموا المحاضرة والأستاذ بتاعكم

في منزل حمدي والد داليا

نادية قاعدة مع جارتها
الجارة / "امال لو شوفتي شقتو هتقولي ايه دا من ساعة ما شافها وهو عمال يزن عليه يقولي يا خالتي كلميها وكان عايز  يجي عندكو البيت أنا اللى قولتله لأ سيبني أكلم والدتها وناخد منهم ميعاد"

نادية/ مش عارفة اقولك ايه بس دا مستعجل اوي وداليا زي ما أنتي عارفة آخر سنه ليها في الكلية مش عايزة اضيع مستقبلها

الحاره / يا اختي هي البنت لما تتعلم اخرتها ايه أهي هتقعد في البيت ودا  لا محتاج لوظيفتها ولا مرتبها

نادية / أنا هقول لحمدي وهو ليه الكلمة الأولي والأخيرة في الموضوع قالتها نادية علشان تنهي الموضوع

في الجامعة المحاضرة خلصت والطلبه خرجوا
داليا خارجة لؤي بيكلمها

لؤي / ازيك يا داليا

داليا / الحمد لله وسبته ومشيت

لؤي / استني يا داليا أنتي زعلانه مني ولا ايه

داليا / وهزعل منك ليه انا اتاخرت ولازم امشي

لؤي/ متمشيش أنا كنت عايز اوضحلك الموقف اللي حصل هي اللي حاولت. ..قاطعته داليا

داليا / الموضوع ميخصنيش  ولا يهمني في حاجة وسبته ومشيت

عمر ل لؤي / ههههه معلش خبطتين في الرأس توجع

لؤي/ أنا مش فايق لهزارك ده يا عم عمر

عمر/ متتنرفزش اوى كدة تعالي بس نشرب حاجة وتقولي البت دي كانت بتقولك ايه

لؤي/ بت؟! بت مين؟

عمر / البت يا عم اللى كانت بتوشوشك في ودنك

لؤي / يا عم هو أنا سمعت منها حاجة وبعدين البت دي لزقه كده ومبتنزليش من زور

عمر / يا عم البت شكلها بتحبك وواقعة سيبك من داليا دي اللي كل شوية تقولك لازم تيجي وتكلم بابا لازم نحط حدود لعلاقتنا وكلام كدة مياكلش عيش

لؤي/ بقولك ايه قفل علي الموضوع هي اصلا شكلها قفشة من آخر مرة أتكلمنا فيها في الموضوع ده

في منزل حمدي
حمدي/ أنتي الظاهر جرا لعقلك حاجة جواز ايه وبتاع ايه اللى بتتكلمي فيه وكمان البنت تسيب كليتها دي اخر سنه ليها

نادية/ استني بس اديني فرصة أكمل كلامي ما هو الست رجعت تاني بعد ما كلمتني وقالتلي إنها كلمته وقالها لو عايزة تكمل مفيش مانع يتجوزوا والشهرين دول تكملهم عندنا وبعدين لما تخلص يبعتلها وتسافرله

حمدي / وانا مش أغرب بنتي الوحيدة وتعيش بعيد عني

نادية/ يا راجل دي فرصة الواد مرتبه كويس بره وبتقولي عندوا شقة قد شقتنا مرتين تلاته وهيجيبلها كل اللى نفسها فيه

حمدي / اتكلمي مع بنتك وهي اللى تقرر محدش مننا هيغصب عليها في حاجة

في منزل محسن والد لؤي
محسن / يلا يا أم لؤي وقعنا من الجوع وابنك الظاهر هيتاخر
كان وقتها لؤي داخل من باب الشقة

محسن / أهو جه أهو يلا اغسل ايدك وتعالي اتغدا

لؤي / لا يا بابا مليش نفس انا هدخل انام
وفعلا دخل اوضته

عايدة / أنت مش قولت لؤي جه آمال هو فين

محسن / قال ملوش نفس ودخل ينام لما تاكلي أبقى ادخليلوا وشوفيه ماله
   ***************************