尹琊's 传说之主的夫人{The Legendary Master's Wife}

Chapter - 369 ( သတိလက်လွတ်ဖြစ်သွားစေရန် ၊ သတိလက္လြတ္ျဖစ္သြားေစရန္ )

[Unicode]🌪️

ပွဲကြည့်ပရိသတ်များ၏အာရုံစိုက်ခံမှုနှင့်အတူ နှစ်ဦးသားလည်း တိုက်ပွဲစတင်လိုက်ကြသည်။

ယူရှောင်မို့ထံတွင် ပြိုင်ဘက်၏စကားအား အလွယ်တကူသဘောတူပေးလိုက်သည့်အကြောင်းအရင်းရှိပေသည်။ သူသည်ယင်းအားအခွင့်ကောင်းယူကာ ဂန္တဝင်မှော်သိဒ္ဓိကျင့်စဥ်၏ ဒုတိယမှော်သိဒ္ဓိဖြစ်သော မဟူရာမှော်သိဒ္ဓိိအားစမ်းသပ်ကြည့်ချင်၍ဖြစ်၏။

မဟူရာမှော်သိဒ္ဓိသည် သူလေ့ကျင့်ထားသည့်ဒုတိယမြောက်မှော်သိဒ္ဓိသာဖြစ်ပြီး ကမ်းမဲ့ပင်လယ်မှပြန်ရောက်ပြီးနောက် လေ့ကျင့်ထားခြင်းဖြစ်သည်။ သို့သော်သူသည် ထိုမှော်သိဒ္ဓိအား ယခုထိတိုင်အောင် မည်သူတစ်ဦးကိုမှ တိုက်ခိုက်ဖူးသေးသည်မဟုတ်။ ယူရှောင်မိုကား ထိုမဟူရာမှော်သိဒ္ဓိ၏စွမ်းအားအကြောင်း ဘာတစ်ခုမှမသိရသေးပေ။

ထို့ပြင်ချန်ချင်းအာမှာ မသင်္ကာစရာကောင်းနေသည်မို့ သူသည်မဟူရာမှော်သိဒ္ဓိအား သူမနဲ့စမ်းသပ်ကြည့်ရန်ဆုံးဖြတ်လိုက်ခြင်းဖြစ်သည်။

မြေပထဝီတုန်လှုပ်စေသည့်စိတ်ဝိညာဥ်စွမ်းအားများမှာ ယူရှောင်မို့ဆီသို့ လှိုင်းလုံးကြီးများသဖွယ် ဦးတည်ထွက်ပေါ်လာပြီး သူ၏ရှေ့မှောက်၌ပင် ကြောက်မက်ဖွယ်ကောင်းစွာ စုဝေးလိုက်ကြသည်။ ရွှေဝါရောင်မှော်သိဒ္ဓိလှိုင်းများမှာ ယူရှောင်မို၏ရှေ့ဘက်၌ ပျံ့လွင့်လူးလာနေပြီး လူပုဂ္ဂိုလ်အားလုံးသည်လည်း ၎င်းထံမှပဲ့တင်ထွက်ပေါ်လာသော သြဇာကြီးသည့်စွမ်းပကားအား ခံစားမိလိုက်ကြသည်။

ပြိင်ပွဲမှာယခုမှစသည်ဖြစ်သော်လည်း ယူရှောင်မိုကမူ ဂန္တဝင်မှော်သိဒ္ဓိကျင့်စဥ်မှ ပထမမှော်သိဒ္ဓိအားထုတ်သုံးလိုက်သည့်အတွက် ကြည့်ရှုနေသည့်လူပုဂ္ဂိုလ်အားလုံးမှာ ရင်သပ်ရှုမောကြက်သေသေသွားရ၏။

ယူရှောင်မိုကချန်ချင်းအာကို လုံးဝလျှော့မတွက်တာမှမဟုတ်ရင် ဒီအတိုင်းလန့်ဖြန့်သွားအောင်ခြိမ်းခြောက်ချင်လို့ပဲနေရမယ် ။ အဲ့လိုမှမဟုတ်ရင် ဒီလိုမျိုးပွဲသိမ်းတဲ့အခါမှထုတ်သုံးကြတဲ့ စွမ်းအားကြီးတိုက်ကွက်ကြီးကို ဘယ်သူကထုတ်သုံးမှာတုန်း ?